ਅੱਜਕੱਲ੍ਹ ਸਾਈਬਰ ਠੱਗਾਂ ਦਾ ਜਾਲ਼ ਹਰ ਪਾਸੇ ਫੈਲਿਆ ਹੋਇਆ ਹੈ। ਫੋਨਾਂ 'ਤੇ ਅਸੀਂ ਅਕਸਰ ਲੋਕਾਂ ਨੂੰ ਉਨ੍ਹਾਂ ਦੇ ਝਾਂਸੇ ਵਿੱਚ ਆ ਕੇ ਪੈਸੇ ਗੁਆਉਂਦੇ ਸੁਣਦੇ ਹਾਂ। ਪਰ ਹਾਲ ਹੀ ਵਿੱਚ ਇੱਕ ਅਜਿਹੀ ਘਟਨਾ ਸਾਹਮਣੇ ਆਈ ਜਿੱਥੇ ਇੱਕ ਸਾਧਾਰਨ ਵਿਅਕਤੀ ਨੇ ਇਨ੍ਹਾਂ ਠੱਗਾਂ ਨੂੰ ਹੀ ਮਾਤ ਦੇ ਦਿੱਤੀ ਅਤੇ ਕਹਾਵਤ "ਚੋਰਾਂ ਨੂੰ ਪੈ ਗਏ ਮੋਰ" ਨੂੰ ਸੱਚ ਕਰ ਦਿਖਾਇਆ।
ਇਸ ਘਟਨਾ ਵਿੱਚ ਠੱਗਾਂ ਨੇ ਉਸ ਵਿਅਕਤੀ ਨੂੰ ਫੋਨ ਕੀਤਾ ਅਤੇ ਕ੍ਰਾਈਮ ਬ੍ਰਾਂਚ ਦਾ ਅਧਿਕਾਰੀ ਬਣ ਕੇ ਉਸਨੂੰ ਡਰਾਇਆ। ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਕੋਲ ਉਸਦੀਆਂ ਅਸ਼ਲੀਲ ਵੀਡੀਓ ਹਨ ਅਤੇ ਜੇਕਰ ਉਹ ਇਸ ਮਾਮਲੇ ਤੋਂ ਬਚਣਾ ਚਾਹੁੰਦਾ ਹੈ ਤਾਂ ਉਸਨੂੰ 20,000 ਰੁਪਏ ਦੇਣੇ ਪੈਣਗੇ।
ਉਹ ਵਿਅਕਤੀ ਤੁਰੰਤ ਸਮਝ ਗਿਆ ਕਿ ਇਹ ਇੱਕ ਸਾਈਬਰ ਠੱਗ ਹੈ ਪਰ ਉਸਨੇ ਘਬਰਾਉਣ ਦੀ ਬਜਾਏ ਇੱਕ ਹੁਸ਼ਿਆਰੀ ਵਰਤੀ। ਉਸਨੇ ਠੱਗਾਂ ਅੱਗੇ ਗਿੜਗਿੜਾਉਂਦੇ ਹੋਏ ਕਿਹਾ ਕਿ ਉਹ ਇੱਕ ਵਿਦਿਆਰਥੀ ਹੈ ਅਤੇ ਉਸ ਕੋਲ ਇੰਨੇ ਪੈਸੇ ਨਹੀਂ ਹਨ। ਪਰ ਉਸਨੇ ਇੱਕ ਝੂਠੀ ਕਹਾਣੀ ਬਣਾਈ ਕਿ ਉਸਦੀ ਇੱਕ ਸੋਨੇ ਦੀ ਚੈਨ ਕਿਸੇ ਕੋਲ 5,000 ਰੁਪਏ ਵਿੱਚ ਗਿਰਵੀ ਰੱਖੀ ਹੈ। ਉਸਨੇ ਠੱਗਾਂ ਨੂੰ ਕਿਹਾ ਕਿ ਜੇਕਰ ਉਹ ਉਸਨੂੰ ਇਹ 5,000 ਰੁਪਏ ਦੇ ਦੇਣ ਤਾਂ ਉਹ ਚੈਨ ਛੁਡਾ ਕੇ ਵੇਚ ਦੇਵੇਗਾ ਅਤੇ ਉਨ੍ਹਾਂ ਨੂੰ 25,000 ਰੁਪਏ ਵਾਪਸ ਕਰ ਦੇਵੇਗਾ।
ਲਾਲਚ ਵਿੱਚ ਆਏ ਠੱਗਾਂ ਨੇ ਉਸਦੀ ਗੱਲ 'ਤੇ ਯਕੀਨ ਕਰ ਲਿਆ ਅਤੇ ਉਸਨੂੰ 5,000 ਰੁਪਏ ਗੂਗਲ ਪੇਅ ਰਾਹੀਂ ਭੇਜ ਦਿੱਤੇ। ਇਸ ਤੋਂ ਬਾਅਦ ਉਸ ਵਿਅਕਤੀ ਨੇ ਇੱਕ ਹੋਰ ਬਹਾਨਾ ਬਣਾਇਆ ਕਿ ਚੈਨ ਵਾਪਸ ਕਰਨ ਵਾਲਾ ਵਿਅਕਤੀ 1,000 ਰੁਪਏ ਵਿਆਜ ਮੰਗ ਰਿਹਾ ਹੈ। ਠੱਗਾਂ ਨੇ ਬਿਨਾਂ ਸੋਚੇ ਉਹ 1,000 ਰੁਪਏ ਵੀ ਭੇਜ ਦਿੱਤੇ। ਇਸ ਤਰ੍ਹਾਂ ਉਸ ਚਲਾਕ ਵਿਅਕਤੀ ਨੇ ਉਨ੍ਹਾਂ ਠੱਗਾਂ ਤੋਂ ਕੁੱਲ 6,000 ਰੁਪਏ ਠੱਗ ਲਏ
ਇਹ ਘਟਨਾ ਸਾਨੂੰ ਸਿਖਾਉਂਦੀ ਹੈ ਕਿ ਸਾਨੂੰ ਸਾਈਬਰ ਠੱਗਾਂ ਤੋਂ ਹਮੇਸ਼ਾ ਸੁਚੇਤ ਰਹਿਣਾ ਚਾਹੀਦਾ ਹੈ। ਕਿਸੇ ਵੀ ਅਣਜਾਣ ਵਿਅਕਤੀ ਦੀਆਂ ਗੱਲਾਂ ਵਿੱਚ ਆ ਕੇ ਆਪਣੇ ਪੈਸੇ ਨਹੀਂ ਗੁਆਉਣੇ ਚਾਹੀਦੇ। ਇਸਦੇ ਨਾਲ ਹੀ ਇਹ ਘਟਨਾ ਇਹ ਵੀ ਦਰਸਾਉਂਦੀ ਹੈ ਕਿ ਜੇਕਰ ਸਮਝਦਾਰੀ ਅਤੇ ਹਿੰਮਤ ਨਾਲ ਕੰਮ ਲਿਆ ਜਾਵੇ ਤਾਂ ਠੱਗਾਂ ਨੂੰ ਵੀ ਮਾਤ ਦਿੱਤੀ ਜਾ ਸਕਦੀ ਹੈ। ਹਾਲਾਂਕਿ, ਅਜਿਹੇ ਖ਼ਤਰਨਾਕ ਲੋਕਾਂ ਨਾਲ ਸਿੱਧਾ ਟਕਰਾਉਣ ਤੋਂ ਬਚਣਾ ਹੀ ਬਿਹਤਰ ਹੈ ਅਤੇ ਕਿਸੇ ਵੀ ਸ਼ੱਕੀ ਗਤੀਵਿਧੀ ਦੀ ਤੁਰੰਤ ਰਿਪੋਰਟ ਕਰਨੀ ਚਾਹੀਦੀ ਹੈ।
ਨਾਲ ਹੀ ਸਾਨੂੰ ਆਪਣੇ ਆਲੇ-ਦੁਆਲੇ ਦੇ ਲੋਕਾਂ ਨੂੰ ਵੀ ਸਾਈਬਰ ਠੱਗੀਆਂ ਬਾਰੇ ਜਾਗਰੂਕ ਕਰਨਾ ਚਾਹੀਦਾ ਹੈ, ਖਾਸ ਕਰਕੇ ਬਜ਼ੁਰਗਾਂ ਅਤੇ ਘੱਟ ਜਾਣਕਾਰ ਲੋਕਾਂ ਨੂੰ। ਉਨ੍ਹਾਂ ਨੂੰ ਇਹ ਦੱਸਣਾ ਚਾਹੀਦਾ ਹੈ ਕਿ ਕਿਸ ਤਰ੍ਹਾਂ ਦੇ ਫੋਨ ਕਾਲਾਂ ਜਾਂ ਸੰਦੇਸ਼ ਧੋਖੇਬਾਜ਼ ਹੋ ਸਕਦੇ ਹਨ ਅਤੇ ਉਨ੍ਹਾਂ ਨੂੰ ਆਪਣੀ ਨਿੱਜੀ ਜਾਣਕਾਰੀ ਨੂੰ ਸੁਰੱਖਿਅਤ ਰੱਖਣ ਲਈ ਕੀ ਕਦਮ ਚੁੱਕਣੇ ਚਾਹੀਦੇ ਹਨ। ਇੱਕ ਸੁਚੇਤ ਸਮਾਜ ਹੀ ਸਾਈਬਰ ਠੱਗਾਂ ਦੇ ਖਿਲਾਫ ਲੜਾਈ ਵਿੱਚ ਸਫਲ ਹੋ ਸਕਦਾ ਹੈ।
ਚਾਨਣਦੀਪ ਸਿੰਘ ਔਲਖ, ਪਿੰਡ ਗੁਰਨੇ ਖ਼ੁਰਦ (ਮਾਨਸਾ), ਸੰਪਰਕ 9876888177