ਜੈਨੇਵਾ : ਵਿਸ਼ਵ ਸਿਹਤ ਸੰਗਠਨ ਨੇ ਚਿਤਾਵਨੀ ਦਿੰਦੇ ਹੋਏ ਕਿਹਾ ਹੈ ਕਿ ਭਾਰਤ ਵਿਚ ਹੁਣੇ ਹੁਣੇ ਮਿਲੇ ਕੋਰੋਨਾ ਦੇ ਨਵੀਂ ਕਿਸਮ ਦੇ ਵਾਇਰਸ ਖ਼ਤਰਨਾਕ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਸਭ ਤੋਂ ਪਹਿਲਾਂ ਭਾਰਤ 'ਚ ਪਾਏ ਗਏ ਬੀ.1.617 ਕੋਵਿਡ-19 ਦੀਆਂ ਤਿੰਨ ਕਿਸਮਾਂ 'ਚੋਂ ਇੱਕ ਬੀ.1.617.2 ਚਿੰਤਾ ਦਾ ਵਿਸ਼ਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਭਾਰਤ ਸਰਕਾਰ ਨੂੰ ਹੁਣ ਤੋਂ ਜ਼ਰੂਰੀ ਕਦਮ ਚੁੱਕ ਲੈਣੇ ਚਾਹੀਦੇ ਹਨ ਕਿਉਂਕਿ ਇਹ ਸਾਬਿਤ ਹੋ ਗਿਆ ਕਿ ਲੋਕਾਂ ਦੀ ਜਾਨ ਨੂੰ ਸਭ ਤੋਂ ਵੱਧ ਖਤਰਾ ਬੀ.1.617.2 ਤੋਂ ਹੈ। ਸੰਯੁਕਤ ਰਾਸ਼ਟਰ ਦੀ ਸਿਹਤ ਏਜੰਸੀ ਵੱਲੋਂ ਜਾਰੀ ਇੱਕ ਬਿਆਨ ਵਿਚ ਕਿਹਾ ਗਿਆ, ਬੀ.1.617.2 ਹੁਣ ਵੀਓਸੀ ਹੈ ਤੇ ਅਸੀਂ ਇਸ ਇਨਫੈਕਸ਼ਨ ਦੇ ਫੈਲਣ ਦੀ ਵਧਦੀ ਦਰ ਤੇ ਇਸ ਕਿਸਮ ਨਾਲ ਕਈ ਦੇਸ਼ਾਂ 'ਚ ਵਧਦੇ ਇਨਫੈਕਸ਼ਨ ਦੇ ਮਾਮਲਿਆਂ 'ਤੇ ਨਜ਼ਰ ਰੱਖ ਰਹੇ ਹਾਂ।
WHO ਨੇ ਕੋਵਿਡ-19 ਦੀਆਂ ਅਹਿਮ ਕਿਸਮਾਂ ਨੂੰ ਨਾਂਅ ਦੇਣ ਲਈ ਨਵੀਂ ਪ੍ਰਣਾਲੀ ਦਾ ਐਲਾਨ ਕੀਤਾ ਤੇ ਨਾਂਅ ਗ੍ਰੀਕ ਵਰਣਮਾਲਾ ਜਿਵੇਂ ਕਿ ਅਲਫਾ, ਬੀਟਾ, ਗਾਮਾ ਆਦਿ ਉਤੇ ਆਧਾਰਤ ਹੈ। ਜਿਸ ਨਾਲ ਇਨ੍ਹਾਂ ਨੂੰ ਨਾਂਅ ਦੇਣਾ ਤੇ ਯਾਦ ਰੱਖਣਾ ਸੌਖਾ ਹੋ ਗਿਆ ਹੈ। ਅਪਡੇਟ 'ਚ ਕਿਹਾ ਗਿਆ ਕਿ ਭਾਰਤ 'ਚ ਪਿਛਲੇ ਹਫ਼ਤੇ ਕੋਵਿਡ-19 ਦੇ 13,64,668 ਨਵੇਂ ਮਾਮਲੇ ਸਾਹਮਣੇ ਆਏ ਜੋ ਪਿਛਲੇ ਹਫ਼ਤਿਆਂ ਦੇ ਮੁਕਾਬਲੇ 26 ਫੀਸਦ ਘੱਟ ਹੈ। ਬ੍ਰਾਜ਼ੀਲ 'ਚ 420981, ਅਰਜਨਟੀਨਾ 'ਚ 219,910, ਅਮਰੀਕਾ 'ਚ 153, 587 ਤੇ ਕੋਲੰਬੀਆਂ 'ਚ 150, 517 ਨਵੇਂ ਮਾਮਲੇ ਆਏ। ਦੱਖਣ ਪੂਰਬੀ ਏਸ਼ੀਆ ਖੇਤਰ 'ਚ 15 ਲੱਖ ਤੋਂ ਜ਼ਿਆਦਾ ਨਵੇਂ ਮਾਮਲੇ ਸਾਹਮਣੇ ਆਏ ਤੇ 29,000 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋਈ ਜੋ ਪਿਛਲੇ ਹਫ਼ਤੇ ਦੇ ਮੁਕਾਬਲੇ ਕ੍ਰਮਵਾਰ 24 ਫੀਸਦ ਤੇ ਅੱਠ ਫੀਸਦ ਘੱਟ ਹੈ। ਇਸ 'ਚ ਕਿਹਾ ਗਿਆ ਕਿ ਇਨਫੈਕਸ਼ਨ ਦੇ ਮਾਮਲਿਆਂ 'ਚ ਲਗਾਤਾਰ ਤੀਜੇ ਹਫ਼ਤੇ ਕਮੀ ਆਈ ਹੈ ਤੇ ਮਾਰਚ 2021 ਦੀ ਸ਼ੁਰੂਆਤ ਤੋਂ ਬਾਅਦ ਤੋਂ ਮੌਤ ਦੇ ਮਾਮਲੇ ਪਹਿਲੀ ਵਾਰ ਘੱਟ ਹੋਏ ਹਨ। ਦੱਖਣੀ ਏਸ਼ੀਆ ਖੇਤਰ 'ਚ ਸਭ ਤੋਂ ਜ਼ਿਆਦਾ ਮੌਤਾਂ ਭਾਰਤ 'ਚ ਹੋਈਆਂ। ਇਸ ਤੋਂ ਬਾਅਦ ਇੰਡੋਨੇਸ਼ੀਆ ਤੇ ਨੇਪਾਲ 'ਚ ਜ਼ਿਆਦਾ ਮੌਤਾਂ ਹੋਈਆਂ ਹਨ।