ਇਸ ਦੇਸ਼ ਵਿਚ ਕਿਸਾਨਾਂ ਨੂੰ ਮੁਫ਼ਤ ਮਿਲ ਰਿਹੈ ਜ਼ਹਿਰ

ਆਸਟ੍ਰੇਲੀਆ : ਆਸਟ੍ਰੇਲੀਆ ਵਿਚ ਚੂਹਿਆਂ ਦੀ ਬਹੁਤਾਤ ਕਾਰਨ ਪਲੇਗ ਫ਼ੈਲਣ ਦਾ ਡਰ ਬਣਿਆ ਹੋਇਆ ਹੈ ਇਸੇ ਕਰ ਕੇ ਇਥੋਂ ਦੀ ਸਥਾਨਕ ਸਰਕਾਰਾਂ ਕਿਸਾਨਾਂ ਨੂੰ ਚੂਹੇ ਮਾਰਨ ਦੀ ਜ਼ਹਿਰੀਲੀ ਦਵਾਈ ਮੁਫ਼ਤ ਦੇ ਰਹੀ ਹੈ। ਇਸੇ ਸਬੰਧੀ ਖੇਤੀਬਾੜੀ ਮੰਤਰੀ ਐਡਮ ਮਾਰਸ਼ਲ ਨੇ ਇੱਕ ਜਾਣਕਾਰੀ ਰਾਹੀਂ ਦੱਸਿਆ ਹੈ ਕਿ ਹੁਣ ਤੱਕ 400 ਤੋਂ ਵੀ ਵੱਧ ਕਿਸਾਨਾਂ ਨੇ ਚੂਹਿਆਂ ਨੂੰ ਮਾਰਨ ਵਾਲੀ ਦਵਾਈ ‘ਬਰੋਮੇਡਿਓਲੋਨ’ ਨੂੰ ਮੁਫਤ ਵਿੱਚ ਪ੍ਰਾਪਤ ਕਰਨ ਵਾਸਤੇ ਆਪਣੇ ਆਪ ਨੂੰ ਨਾਮਾਂਕਣ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਰਾਜ ਸਰਕਾਰ ਹਾਲੇ ਵੀ ਏ.ਪੀ.ਪੀ.ਐਮ.ਏ. (Australian Pesticides and Veterinary Medicines Authority) ਕੋਲੋਂ ਉਕਤ ਦਵਾਈ ਦੀ ਵੰਡ ਲਈ ਇਜਾਜ਼ਤ ਦਾ ਇੰਤਜ਼ਾਰ ਕਰ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਜੇਕਰ ਉਕਤ ਦਵਾਈ ਦੀ ਇਜਾਜ਼ਤ ਮਿਲ ਜਾਂਦੀ ਹੈ ਤਾਂ ਇਹ ਦਵਾਈ ਕਿਸਾਨਾਂ ਨੂੰ ਚੂਹਿਆਂ ਵੱਲੋਂ ਕੀਤੀਆਂ ਜਾਣ ਵਾਲੀਆਂ ਬਰਬਾਦੀਆਂ ਤੋਂ ਨਿਜਾਤ ਪੁਆਉਣ ਵਿੱਚ ਕਾਫੀ ਮਦਦਗਾਰ ਸਿੱਧ ਹੋਵੇਗੀ ਪਰੰਤੂ ਉਨ੍ਹਾਂ ਇਹ ਵੀ ਕਿਹਾ ਕਿ ਇੰਨੀ ਦੇਰ ਅਸੀਂ ਹੋਰ ਦਵਾਈਆਂ ਅਤੇ ਢੰਗ ਤਰੀਕਿਆਂ ਦਾ ਇਸਤੇਮਾਲ ਵੀ ਜਾਰੀ ਰੱਖਾਂਗੇ। ਆਸਟਰੇਲੀਆਈ ਕਿਸਾਨਾਂ ਨੂੰ ਉਮੀਦ ਹੈ ਕਿ ਉਹ ਬਾਰਸ਼ ਤੋਂ ਬਾਅਦ ਕਮਾਈ ਕਰਨਗੇ। ਪਰ ਚੂਹਿਆਂ ਨੇ ਉਨ੍ਹਾਂ ਦੀ ਆਸਾਂ ’ਤੇ ਪਾਣੀ ਫੇਰ ਦਿੱਤਾ ਹੈ। ਬਰੂਸ ਬਾਰਨਜ਼ ਨਾਮਕ ਇੱਕ ਕਿਸਾਨ ਨੇ ਦੱਸਿਆ ਹੈ ਕਿ ਉਹ ਬੋਗਨ ਗੇਟ ਸਿਟੀ ਨੇੜੇ ਆਪਣੇ ਖੇਤ ਵਿੱਚ ਫਸਲਾਂ ਬੀਜ ਕੇ ਇੱਕ ਕਿਸਮ ਦਾ ਜੂਆ ਖੇਡ ਰਿਹਾ ਹੈ। ਅਸੀਂ ਸਿਰਫ ਬਿਜਾਈ ਕਰ ਰਹੇ ਹਾਂ ਅਤੇ ਉਮੀਦ ਕਰ ਰਹੇ ਹਾਂ ਕਿ ਮਿਹਨਤ ਵਿਅਰਥ ਨਾ ਜਾਵੇ। ਇਹ ਚੂਹੇ ਨਾ ਸਿਰਫ ਫਸਲਾਂ ਨੂੰ ਤਬਾਹ ਕਰ ਰਹੇ ਹਨ, ਬਲਕਿ ਹੁਣ ਉਹ ਘਰਾਂ ਵਿੱਚ ਵੀ ਦਾਖਲ ਹੋ ਰਹੇ ਹਨ. ਇਹ ਬਿਜਲੀ ਦੀਆਂ ਤਾਰਾਂ ਚਬਾ ਰਹੀਆਂ ਹਨ, ਜਿਸ ਨਾਲ ਘਰਾਂ ਵਿਚ ਅੱਗ ਲੱਗ ਰਹੀ ਹੈ। ਇਸ ਦੇ ਨਾਲ ਹੀ ਚੂਹੇ ਸੁੱਤੇ ਪਏ ਲੋਕਾਂ ਨੂੰ ਕੱਟ ਰਹੇ ਹਨ। ਇਸ ਤੋਂ ਪ੍ਰੇਸ਼ਾਨ ਆਸਟਰੇਲੀਆਈ ਸਰਕਾਰ ਨੇ ਭਾਰਤ ਤੋਂ 5000 ਲੀਟਰ ਬਰੂਮਿਡਿਓਲੋਨ ਜ਼ਹਿਰ ਦੀ ਮੰਗ ਕੀਤੀ ਸੀ ਤਾਂ ਜੋ ਚੂਹਿਆਂ ਨੂੰ ਮਾਰਿਆ ਜਾ ਸਕੇ।