ਅੰਤਰਰਾਸ਼ਟਰੀ ਕ੍ਰਿਕਟ 'ਚ ਕ੍ਰਿਸ ਗੇਲ ਦੇ ਸਭ ਤੋਂ ਜ਼ਿਆਦਾ ਛੱਕਿਆਂ ਦਾ ਰਿਕਾਰਡ ਤੋੜਨ ਤੋਂ ਬਾਅਦ ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਨੇ ਕਿਹਾ ਕਿ ਉਨ੍ਹਾਂ ਨੇ ਇਸ ਸਫਰ 'ਚ ਖੁਦ 'ਯੂਨੀਵਰਸਲ ਬੌਸ' ਤੋਂ ਪ੍ਰੇਰਨਾ ਲਈ ਹੈ। ਅਫਗਾਨਿਸਤਾਨ ਖਿਲਾਫ ਫਿਰੋਜ਼ਸ਼ਾਹ ਕੋਟਲਾ ਮੈਦਾਨ 'ਤੇ ਖੇਡੇ ਗਏ ਵਿਸ਼ਵ ਕੱਪ ਮੈਚ 'ਚ ਰੋਹਿਤ ਨੇ 81 ਗੇਂਦਾਂ 'ਤੇ 131 ਦੌੜਾਂ ਬਣਾਈਆਂ। ਉਸ ਨੇ ਪੰਜ ਛੱਕੇ ਲਗਾ ਕੇ ਤਿੰਨੋਂ ਫਾਰਮੈਟਾਂ ਵਿੱਚ 556 ਛੱਕੇ ਪੂਰੇ ਕੀਤੇ, ਜੋ ਗੇਲ ਤੋਂ ਤਿੰਨ ਵੱਧ ਹਨ। ਰੋਹਿਤ ਨੇ 453 ਮੈਚਾਂ 'ਚ ਇਹ ਅੰਕੜਾ ਛੂਹਿਆ, ਜੋ ਗੇਲ ਤੋਂ 30 ਮੈਚ ਘੱਟ ਹੈ।
ਰੋਹਿਤ ਨੇ ਬੀ. ਸੀ. ਸੀ. ਆਈ. ਦੁਆਰਾ ਪੋਸਟ ਕੀਤੇ ਗਏ ਵੀਡੀਓ ਵਿੱਚ ਕਿਹਾ, 'ਯੂਨੀਵਰਸਲ ਬੌਸ ਤਾਂ ਯੂਨੀਵਰਸਲ ਬੌਸ ਹੁੰਦਾ ਹੈ। ਮੈਂ ਉਸ ਤੋਂ ਹੀ ਪ੍ਰੇਰਨਾ ਲਈ ਹੈ। ਸਾਲਾਂ ਦੌਰਾਨ ਅਸੀਂ ਦੇਖਿਆ ਹੈ ਕਿ ਉਹ ਇੱਕ ਛੱਕਾ ਮਾਰਨ ਵਾਲੀ ਮਸ਼ੀਨ ਹੈ। ਉਸ ਨੇ ਕਿਹਾ, 'ਉਹ ਵੀ ਉਹੀ ਜਰਸੀ (ਨੰਬਰ 45) ਪਹਿਨਦਾ ਹੈ। ਮੈਨੂੰ ਯਕੀਨ ਹੈ ਕਿ ਉਹ ਖੁਸ਼ ਹੋਵੇਗਾ ਕਿਉਂਕਿ ਜਰਸੀ ਨੰਬਰ 45 ਉਸ ਦੇ ਨਾਂ ਵਿਸ਼ਵ ਰਿਕਾਰਡ ਹੈ। ਰੋਹਿਤ ਨੇ ਕਿਹਾ ਕਿ ਛੱਕੇ ਮਾਰਨ ਦੀ ਸਮਰੱਥਾ ਹਾਸਲ ਕਰਨ ਲਈ ਕਾਫੀ ਮਿਹਨਤ ਕਰਨੀ ਪਈ।