ਭਾਰਤੀ ਟੀਮ ਤੋਂ ਬਾਹਰ ਚੱਲ ਰਹੇ ਸਲਾਮੀ ਬੱਲੇਬਾਜ਼ ਸ਼ਿਖਰ ਧਵਨ ਨੇ ਇਕ ਸ਼ੋਅ ਦੌਰਾਨ ਹੈਰਾਨੀਜਨਕ ਅੰਦਾਜ਼ 'ਚ ਐਂਟਰੀ ਕੀਤੀ। ਇਸ ਦੌਰਾਨ ਉਹ ਮੂੰਹ 'ਤੇ ਪੱਟੀ ਬੰਨ੍ਹ ਕੇ ਬਾਲੀਵੁੱਡ ਦੇ ਕਿੰਗ ਖਾਨ ਸ਼ਾਹਰੁਖ ਖਾਨ ਦੀ ਫਿਲਮ ਜਵਾਨ ਦੇ ਲੁੱਕ ਦੀ ਨਕਲ ਕਰਦੇ ਨਜ਼ਰ ਆਏ। ਧਵਨ ਨੇ ਜਵਾਨ ਫਿਲਮ ਦੇ ਇੱਕ ਡਾਇਲਾਗ ਨੂੰ ਵੀ ਦੁਹਰਾਇਆ ਅਤੇ ਭਰੋਸਾ ਪ੍ਰਗਟਾਇਆ ਕਿ ਰੋਹਿਤ ਸ਼ਰਮਾ ਦੀ ਅਗਵਾਈ ਵਾਲੀ ਟੀਮ ਇੰਡੀਆ ਵਿਸ਼ਵ ਕੱਪ ਟਰਾਫੀ ਜਿੱਤੇਗੀ।
ਧਵਨ ਭਾਰਤ ਲਈ ਆਖਰੀ ਵਾਰ ਦਸੰਬਰ 2022 'ਚ ਖੇਡੇ ਸਨ। ਸ਼ੋਅ ਦੌਰਾਨ ਸਟੇਜ 'ਤੇ ਧਵਨ ਦੀ ਐਂਟਰੀ ਨੂੰ ਲੈ ਕੇ ਉਲਝਣ ਸੀ ਕਿ ਸਟੇਜ 'ਤੇ ਕੌਣ ਆਇਆ। ਜਦੋਂ ਮੇਜ਼ਬਾਨ ਨੇ ਪੁੱਛਿਆ ਕਿ ਉਹ ਕੌਣ ਸੀ ਤਾਂ ਦਰਸ਼ਕਾਂ ਨੂੰ ਅੰਦਾਜ਼ਾ ਲਗਾਉਣ ਲਈ ਕਿਹਾ ਗਿਆ। ਕੁਝ ਪਲਾਂ ਬਾਅਦ ਜਦੋਂ ਲੋਕਾਂ ਨੇ ਧਵਨ ਦਾ ਨਾਮ ਲਿਆ ਤਾਂ ਉਨ੍ਹਾਂ ਨੇ ਆਪਣੇ ਆਪ ਨੂੰ ਉਜ਼ਾਗਰ ਕੀਤਾ ਅਤੇ ਕਿਹਾ, 'ਇਸ ਵਾਰ ਅਸੀਂ ਵਿਸ਼ਵ ਕੱਪ ਜ਼ਰੂਰ ਜਿੱਤਾਂਗੇ।'
37 ਸਾਲਾ ਖਿਡਾਰੀ ਨੇ ਟੀਮ ਇੰਡੀਆ ਦੀ 2013 ਚੈਂਪੀਅਨਜ਼ ਟਰਾਫੀ ਦੌਰਾਨ 5 ਪਾਰੀਆਂ ਵਿੱਚ 90.75 ਦੀ ਔਸਤ ਨਾਲ 363 ਦੌੜਾਂ ਬਣਾ ਕੇ ਗੋਲਡਨ ਬੈਟ ਜਿੱਤਿਆ ਸੀ। ਉਂਗਲੀ ਦੀ ਸੱਟ ਕਾਰਨ ਧਵਨ ਦੀ 2019 ਵਿਸ਼ਵ ਕੱਪ ਮੁਹਿੰਮ ਨੂੰ ਛੋਟਾ ਕਰ ਦਿੱਤਾ ਗਿਆ ਸੀ ਪਰ ਉਨ੍ਹਾਂ ਨੇ ਆਸਟ੍ਰੇਲੀਆ ਵਿਰੁੱਧ ਮੈਚ ਜੇਤੂ ਸੈਂਕੜਾ ਲਗਾਇਆ। ਆਪਣੀ ਖਰਾਬ ਫਾਰਮ ਅਤੇ ਸ਼ੁਭਮਨ ਗਿੱਲ ਦੇ ਵਧੀਆ ਪ੍ਰਦਰਸ਼ਨ ਕਾਰਨ ਧਵਨ ਹੁਣ ਟੀਮ 'ਚ ਨਹੀਂ ਹਨ।