ਸੁਨਾਮ : ਸਥਾਨਕ ਸ਼ਹਿਰ ਅੰਦਰ ਸਥਿਤ ਸ੍ਰੀ ਮਾਤਾ ਮੋਦੀ ਦਰਬਾਰ ਦੇ ਸਾਹਮਣੇ ਦਹਾਕਿਆਂ ਪੁਰਾਣੇ ਮਾਤਾ ਮੋਦੀ ਪਾਰਕ ਦਾ ਨਵੀਨੀਕਰਨ ਕਰਕੇ ਸਵਰਗੀ ਬਾਬੂ ਭਗਵਾਨ ਦਾਸ ਅਰੋੜਾ ਮੈਮੋਰੀਅਲ ਪਾਰਕ ਰੱਖੇ ਜਾਣ ਨੂੰ ਲੈਕੇ ਸਿਆਸਤ ਗਰਮਾ ਗਈ ਹੈ। ਸ਼੍ਰੋਮਣੀ ਅਕਾਲੀ ਦਲ ਦੇ ਜਨਰਲ ਸਕੱਤਰ ਅਤੇ ਵਿਧਾਨ ਸਭਾ ਹਲਕਾ ਸੁਨਾਮ ਦੇ ਇੰਚਾਰਜ਼ ਵਿਨਰਜੀਤ ਸਿੰਘ ਗੋਲਡੀ ਖਡਿਆਲ ਨੇ ਇੰਟਰਨੈੱਟ ਮੀਡੀਆ ਤੇ ਵੀਡੀਓ ਸਾਂਝੀ ਕਰਦਿਆਂ ਆਖਿਆ ਕਿ ਸੂਬੇ ਦੀ ਹਾਕਮ ਧਿਰ ਨੇ ਦਹਾਕਿਆਂ ਪੁਰਾਣੇ ਮਾਤਾ ਮੋਦੀ ਪਾਰਕ ਦਾ ਨਾਮ ਬਦਲਕੇ ਸਵਰਗੀ ਬਾਬੂ ਭਗਵਾਨ ਦਾਸ ਅਰੋੜਾ ਮੈਮੋਰੀਅਲ ਪਾਰਕ ਰੱਖ ਦਿੱਤਾ ਹੈ, ਅਜਿਹਾ ਕਰਕੇ ਪੁਰਾਣੇ ਪਾਰਕ ਦੀ ਹੋਂਦ ਨੂੰ ਹੀ ਖਤਮ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਆਖਿਆ ਕਿ ਚੰਗਾ ਹੁੰਦਾ ਜੇਕਰ ਆਮ ਆਦਮੀ ਪਾਰਟੀ ਦੇ ਸੂਬਾ ਪ੍ਰਧਾਨ ਅਤੇ ਕੈਬਨਿਟ ਮੰਤਰੀ ਅਮਨ ਅਰੋੜਾ ਪਾਰਕ ਦਾ ਨਾਮ ਬਦਲਣ ਦੀ ਬਜਾਏ ਨਵੇਂ ਪ੍ਰੋਜੈਕਟ ਸਥਾਪਿਤ ਕਰ ਕੇ ਉਸ ਦਾ ਨਾਂਅ ਬਾਬੂ ਜੀ ਦੇ ਨਾਮ ਤੇ ਰੱਖ ਲੈਂਦੇ। ਸੁਨਾਮ ਵਿੱਚ ਨਵੀਂ ਯੂਨੀਵਰਸਿਟੀ, ਹਸਪਤਾਲ ਜਾਂ ਕੋਈ ਇੰਡਸਟਰੀ ਲਿਆਕੇ ਨਾਮ ਰੱਖਿਆ ਜਾਂਦਾ ਤਾਂ ਬਿਹਤਰ ਸੀ। ਨੌਜਵਾਨ ਅਕਾਲੀ ਆਗੂ ਵਿਨਰਜੀਤ ਸਿੰਘ ਗੋਲਡੀ ਖਡਿਆਲ ਨੇ ਆਖਿਆ ਕਿ ਪੰਜਾਬ ਵਿਚਲੀਆਂ ਮਗਰਲੀਆਂ ਸਰਕਾਰਾਂ ਦੇ ਕੰਮਾਂ ’ਤੇ ਰੰਗ ਮਾਰ ਕੇ ਆਪਣੇ ਨਾਮ ਚਮਕਾਉਣਾ ’ਆਪ’ ਦੀ ਫ਼?ਤਰਤ ਬਣੀ ਹੋਈ ਹੈ। ਇਤਿਹਾਸਕ ਅਸਥਾਨਾ ਦੇ ਨਾਮ ਬਦਲਣਾ ਸਰਕਾਰ ਦੀ ਮਾੜੀ ਮਾਨਸਿਕਤਾ ਦਾ ਪ੍ਰਗਟਾਵਾ ਹੈ।
ਉਨ੍ਹਾਂ ਕਿਹਾ ਕਿ ਸੁਨਾਮ ਸ਼ਹੀਦਾਂ, ਪੀਰਾਂ ਪੈਗੰਬਰਾਂ ਦੀ ਧਰਤੀ, ਜਿੱਥੇ ਗੁਰਦੁਆਰਾ ਪਹਿਲੀ ਪਾਤਸ਼ਾਹੀ, ਸੀਤਾਸਰ ਧਾਮ , ਗੀਤਾ ਭਵਨ, ਪੀਰਾਂ ਬੰਨਾ ਬਨੋਈ, ਮਾਤਾ ਮੋਦੀ ਦਰਬਾਰ ਬੁਹਤ ਸਾਰੇ ਪੁਰਾਤਨ ਧਾਰਮਿਕ ਅਸਥਾਨ ਹਨ। ਉਨ੍ਹਾਂ ਕੈਬਨਿਟ ਮੰਤਰੀ ਅਮਨ ਅਰੋੜਾ ਨੂੰ ਘੇਰਦਿਆਂ ਆਖਿਆ ਕਿ ਪੁਰਾਤਨ ਇਤਿਹਾਸਕ ਮਾਤਾ ਮੋਦੀ ਪਾਰਕ ਦਾ ਨਾਮ ਨਾ ਬਦਲਕੇ ਬਾਬੂ ਭਗਵਾਨ ਦਾਸ ਅਰੋੜਾ ਦੀ ਯਾਦ ਨੂੰ ਸਦੀਵੀ ਰੱਖਣ ਲਈ ਨਵੇਂ ਪ੍ਰਾਜੈਕਟਾਂ ਤੇ ਜ਼ੋਰ ਦਿੱਤਾ ਜਾਣਾ ਚਾਹੀਦਾ ਸੀ, ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਉਸ ਤੇ ਕਿਸੇ ਨੂੰ ਕੋਈ ਇਤਰਾਜ਼ ਨਹੀਂ ਹੋਣਾ ਸੀ।