ਦਿੜ੍ਹਬਾ ਮੰਡੀ : ਵਾਤਾਵਰਨ, ਜੰਗਲਾਤ ਤੇ ਜਲਵਾਯੂ ਬਦਲਾਅ ਮੰਤਰਾਲਾ ਭਾਰਤ ਸਰਕਾਰ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਪੰਜਾਬ ਸਟੇਟ ਕੌਂਸਲ ਫਾਰ ਸਾਇੰਸ ਟੈਕਨੋਲਜੀ ਚੰਡੀਗੜ੍ਹ ਦੇ ਯਤਨਾਂ ਸਦਕਾ ਜਿਲ੍ਹਾ ਸਿੱਖਿਆ ਅਫਸਰ (ਸੈ.ਸਿੱ.) ਸੰਗਰੂਰ ਤਰਵਿੰਦਰ ਕੌਰ ਅਤੇ ਉਪ-ਜਿਲਾ ਸਿੱਖਿਆ ਅਫਸਰ ਸੰਗਰੂਰ ਮਨਜੀਤ ਕੌਰ ਦੀ ਰਹਿਨੁਮਾਈ ਹੇਠ ਸਰਕਾਰੀ ਹਾਈ ਸਕੂਲ ਕਮਾਲਪੁਰ, ਸਰਕਾਰੀ ਹਾਈ ਸਕੂਲ ਖੇੜੀ ਅਤੇ ਸਕੂਲ ਆਫ ਐਮੀਨਸ ਛਾਜਲੀ ਦੇ 50 ਵਿਦਿਆਰਥੀਆਂ ਦਾ ਜ਼ਿਲੇ ਦਾ ਪਹਿਲਾ ਤਿੰਨ ਦਿਨਾਂ ਨੇਚਰ ਕੈਂਪ ਹੁਸ਼ਿਆਰਪੁਰ ਵਿਖੇ ਲਗਾਇਆ ਗਿਆ। ਇਸ ਕੈਂਪ ਦੀ ਅਗਵਾਈ ਹੈੱਡ ਮਾਸਟਰ ਡਾ. ਪਰਮਿੰਦਰ ਸਿੰਘ ਦੇਹੜ੍ਹ (ਨੋਡਲ ਅਫ਼ਸਰ ਅਤੇ ਰਿਸੋਰਸ ਪਰਸਨ), ਹੈੱਡ ਮਾਸਟਰ ਸਪਰਨ ਕੁਮਾਰ ਸਿੰਗਲਾ (ਰਿਸੋਰਸ ਪਰਸਨ), ਸਾਇੰਸ ਮਾਸਟਰ ਜਸਵਿੰਦਰ ਸਿੰਘ ਛਾਜਲੀ (ਰਿਸੋਰਸ ਪਰਸਨ) ਅਤੇ ਚਮਕੌਰ ਸਿੰਘ ਸਾਇੰਸ ਮਾਸਟਰ ਸਹਸ ਕਮਾਲਪੁਰ ਨੇ ਕੀਤੀ।
"ਸਾਂਝੀ ਜਿੰਮੇਵਾਰੀ ਤਹਿਤ ਕੁਦਰਤ ਨੂੰ ਮਾਨਣ-ਸਾਂਭਣ ਦੀ ਹੁਨਰ ਸਿਖਲਾਈ" ਥੀਮ ਤਹਿਤ ਲਗਾਏ ਗਏ ਇਸ ਕੈਂਪ ਦੇ ਇੰਚਾਰਜ਼ ਡਾ. ਪਰਮਿੰਦਰ ਸਿੰਘ ਦੇਹੜ੍ਹ (ਸਟੇਟ ਅਵਾਰਡੀ) ਨੇ ਸਮੂਹ ਵਿਦਿਆਰਥੀਆਂ ਅਤੇ ਈਕੋ ਕਲੱਬ ਕੋਆਰਡੀਨੇਟਰਾਂ ਦਾ ਸਵਾਗਤ ਕਰਦਿਆਂ ਜੀਵਾਂ ਦੇ ਨਾਮਕਰਨ, ਖਾਣ ਪੀਣ ਅਤੇ ਅਨੁਕੂਲਣ ਬਾਰੇ ਜਾਣਕਾਰੀ ਦਿੱਤੀ। ਜਸਵਿੰਦਰ ਸਿੰਘ ਛਾਜਲੀ ਨੇ ਵਿਦਿਆਰਥੀਆਂ ਨੂੰ ਪੰਜ ਤੱਤਾਂ ਦੇ ਜੈਵਿਕ ਚੱਕਰਾਂ ਨੂੰ ਜੀਵਤ ਕੁਦਰਤ ‘ਚ ਵਿਚਰਦਿਆਂ–ਸਮਝਦਿਆਂ ਗੁਰੂ ਸਾਹਿਬਾਨ ਦੀ ਬਾਣੀ ਅਨੁਸਾਰ ਸਮੁੱਚੇ ਜੀਵਾਂ ਦਾ ਸਤਿਕਾਰ ਕਰਨ ਲਈ ਪ੍ਰੇਰਿਆ। ਜੰਗਲੀ ਜੀਵਨ ਮਾਹਰ ਡਾ. ਅਮਨਦੀਪ ਸਿੰਘ ਨੇ ਦੱਖਣੀ ਰਹਿਮਾਨਪੁਰ ਵਾਇਲਡ ਲਾਈਫ ਸੈਂਚੁਰੀ, ਮਹਿੰਗਣਵਾਲ ਜਲਗਾਹ ਅਤੇ ਢੋਲ ਵਾਹਾ ਡੈਮ ਦਾ ਦੌਰਾ ਕਰਵਾਇਆ। ਸਪਰਨ ਕੁਮਾਰ ਸਿੰਗਲਾ ਨੇ ਯੋਰਿਕਾ ਕਿਟ ਰਾਹੀਂ ਇਲਾਕੇ ਵਿੱਚ ਮੀਹ ਮਾਪਣ ਦੇ ਢੰਗਾਂ ਬਾਰੇ ਜਾਣਕਾਰੀ ਦਿੱਤੀ ਅਤੇ ਵਿਦਿਆਰਥੀਆਂ ਨੂੰ ਤਾਰਾ ਵਿਗਿਆਨ ਬਾਰੇ ਦੱਸਿਆ। ਵਿਦਿਆਰਥੀਆਂ ਵੱਲੋਂ ਜੰਗਲੀ ਜੀਵਨ ਬਾਰੇ ਹਾਸਿਲ ਕੀਤੇ ਗਏ ਗਿਆਨ ਦੀ ਪਰਖ ਲਈ ਸਾਇੰਸ ਅਧਿਆਪਕ ਚਮਕੌਰ ਸਿੰਘ ਨੇ ਵਿਦਿਆਰਥੀਆਂ ਦੇ ਪ੍ਰਸ਼ਨੋਤਰੀ ਮੁਕਾਬਲੇ ਕਰਵਾਏ। ਟੂਰ ਇੰਚਾਰਜ ਡਾ. ਪਰਮਿੰਦਰ ਸਿੰਘ ਨੇ ਪੰਜਾਬ ਸਟੇਟ ਕੌਂਸਲ ਫਾਰ ਸਾਇੰਸ ਸੈਂਟਰ ਟੈਕਨੋਲਜੀ ਚੰਡੀਗੜ੍ਹ ਦੇ ਜੁਆਇੰਟ ਡਾਇਰੈਕਟਰ ਡਾ. ਕੁਲਵੀਰ ਸਿੰਘ ਬਾਠ ਅਤੇ ਇਸ ਪ੍ਰੋਜੈਕਟ ਦੇ ਸਟੇਟ ਨੋਡਲ ਡਾ. ਮੰਦਾਕਨੀ ਠਾਕੁਰ ਦਾ ਸਹਿਯੋਗ ਦੇਣ ਲਈ ਵਿਸ਼ੇਸ਼ ਧੰਨਵਾਦ ਕੀਤਾ।
ਫੋਟੋ ਕੈਪਸ਼ਨ : ਹੁਸ਼ਿਆਰਪੁਰ ਵਿਖੇ ਲਗਾਏ ਗਏ ਤਿੰਨ ਰੋਜ਼ਾ ਨੇਚਰ ਕੈਂਪ ਦੌਰਾਨ ਹਾਜ਼ਰ ਅਧਿਆਪਕ ਅਤੇ ਵਿਦਿਆਰਥੀ।