ਸਪੇਨ : ਸਪੇਨ ਵਿਚ ਆਦਮਖੋਰ ਬੇਟੇ ਨੇ ਅਪਣੀ ਮਾਂ ਦੀ ਹਤਿਆ ਕਰ ਕੇ ਉਸ ਦੀ ਲਾਸ਼ ਦੇ 1000 ਛੋਟੇ-ਛੋਟੇ ਟੁਕੜੇ ਕਰ ਦਿਤੇ। ਇਸ ਦੇ ਬਾਅਦ ਉਸ ਨੇ ਮਾਸ ਦੇ ਟੁਕੜਿਆਂ ਨੂੰ ਫ਼ਰਿੱਜ਼ ਦੇ ਅੰਦਰ ਰੱਖ ਦਿਤਾ ਅਤੇ ਕਰੀਬ ਦੋ ਹਫ਼ਤੇ ਤਕ ਅਪਣੀ ਮਾਂ ਦੀ ਲਾਸ਼ ਨੂੰ ਖਾਂਦਾ ਰਿਹਾ। ਇਸ ਦੌਰਾਨ ਉਸ ਨੇ ਅਪਣੇ ਕੁੱਤੇ ਨੂੰ ਵੀ ਮਾਂ ਦਾ ਮਾਸ ਖਵਾਇਆ। ਸਪੇਨ ਦੀ ਅਦਾਲਤ ਨੇ ਹਤਿਆਰੇ ਸਾਂਚੇਜ ਗੋਮੇਜ਼ ਨੂੰ ਮਾਂ ਮਾਰੀਆ ਸੋਲੇਦਾਦ ਗੋਮੇਜ਼ ਦੀ ਹਤਿਆ ਲਈ ਦੋਸ਼ੀ ਠਹਿਰਾਇਆ ਹੈ। ਇਹ ਘਟਨਾ ਫ਼ਰਵਰੀ 2019 ਵਿਚ ਵਾਪਰੀ ਸੀ ਅਤੇ ਛੇ ਮਈ ਨੂੰ ਖ਼ਤਮ ਹੋਈ ਸੁਣਵਾਈ ਦੌਰਾਨ ਅਦਾਲਤ ਨੇ ਕਲਯੁਗੀ ਬੇਟੇ ਨੂੰ ਹਤਿਆ ਦਾ ਦੋਸ਼ੀ ਠਹਿਰਾਇਆ। ਨੌ ਜੱਜਾਂ ਦੇ ਬੈਂਚ ਨੇ ਗੋਮੇਜ਼ ਦੇ ਉਸ ਦਾਅਵੇ ਨੂੰ ਰੱਦ ਕਰ ਦਿਤਾ ਕਿ ਉਹ ਅਪਣੀ ਮਾਂ ’ਤੇ ਹਮਲਾ ਕਰਨ ਦੌਰਾਨ ਮਨੋਰੋਗ ਨਾਲ ਜੂਝ ਰਿਹਾ ਸੀ। ਗੋਮੇਜ਼ ਅਪਣੀ ਮਾਂ ਦੇ ਪਿੱਛੇ ਲੁਕ ਕੇ ਗਿਆ ਅਤੇ ਉਸ ਦੀ ਗਲਾ ਘੁੱਟ ਕੇ ਹਤਿਆ ਕਰ ਦਿਤੀ।