ਫ਼ਤਹਿਗੜ੍ਹ ਸਾਹਿਬ : ਜ਼ਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਵੱਲੋਂ ਕੌਮੀ ਕਾਨੂੰਨੀ ਸੇਵਾਵਾਂ ਅਥਾਰਟੀ ਦੇ ਮੈਂਬਰ ਸਕੱਤਰ ਸ਼੍ਰੀ ਮਨਜਿੰਦਰ ਸਿੰਘ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਅਤੇ ਜ਼ਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਦੇ ਚੇਅਰਮੈਨ-ਕਮ-ਜ਼ਿਲ੍ਹਾ ਤੇ ਸੈਸ਼ਨਜ਼ ਜੱਜ ਸ਼੍ਰੀ ਅਰੁਣ ਗੁਪਤਾ ਦੀ ਅਗਵਾਈ ਹੇਠ ਨਵੀਂ ਜੇਲ੍ਹ ਨਾਭਾ ਵਿਖੇ ਜੇਲ ਵਿੱਚ ਬੰਦੀਆਂ ਲਈ ਬੇਕਰੀ ਸਿਖਲਾਈ ਕੋਰਸ ਸ਼ੁਰੂ ਕਰਵਾਇਆ ਗਿਆ ਜਿਸ ਤਹਿਤ ਬੰਦੀਆਂ ਨੂੰ ਓਵਨ, ਟੋਸਟਰ ਅਤੇ ਗਰਿੱਲ ਵੀ ਮੁਹੱਈਆ ਕਰਵਾਈ ਗਈ। ਬੇਕਰੀ ਦੀ ਦੀ ਸਿਖਲਾਈ ਦੇਣ ਲਈ ਇੱਕ ਮਾਹਰ ਟਰੇਨਰ ਦੀ ਡਿਊਟੀ ਵੀ ਲਗਾਈ ਗਈ ਹੈ। ਇਹ ਜਾਣਕਾਰੀ ਜ਼ਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਦੀ ਸਕੱਤਰ ਸ਼੍ਰੀਮਤੀ ਮਨਪ੍ਰੀਤ ਕੌਰ ਨੇ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਬੰਦੀਆਂ ਨੂੰ ਬੇਕਰੀ ਦਾ ਸਮਾਨ ਜਿਵੇਂ ਕਿ ਕੇਕ, ਬਿਸਕੁੱਟ ਆਦਿ ਬਣਾਉਣਾ ਸਿਖਾਇਆ ਜਾਵੇਗਾ ਜੋ ਕਿ ਬੰਦੀਆਂ ਦੀ ਜੇਲ ਵਿੱਚ ਅਤੇ ਜੇਲ ਤੋਂ ਰਿਹਾਈ ਤੋਂ ਬਾਅਦ ਤੇ ਸਮੇਂ ਦੋਰਾਨ ਉਹਨਾਂ ਅਤੇ ਉਹਨਾਂ ਦੇ ਪਰਿਵਾਰ ਦੀ ਰੋਜ਼ੀ ਰੋਟੀ ਅਤੇ ਰੋਜ਼ਾਨਾ ਦੀ ਉਪਜੀਵਕਾ ਲਈ ਸਹਾਈ ਹੋਵੇਗੀ ਅਤੇ ਉਹ ਆਪਣਾ ਗੁਜ਼ਾਰਾ ਵਧੀਆ ਤਰੀਕੇ ਨਾਲ ਚਲਾ ਸਕਣਗੇ। ਉਨ੍ਹਾਂ ਇਸ ਮੌਕੇ ਜੇਲ੍ਹ ਵਿੱਚ ਪਹਿਲਾਂ ਤੋਂ ਹੀ ਚਲਾਈ ਜਾ ਰਹੀ " ਸਹਜ ਫੁਲਕਾਰੀ" ਸਕੀਮ ਦਾ ਨਰੀਖਣ ਵੀ ਕੀਤਾ ਤਾਂ ਜੋ ਬੰਦੀ ਔਰਤਾਂ ਕਢਾਈ ਦੇ ਨਾਲ-ਨਾਲ ਸਿਲਾਈ ਦੀ ਸਿਖਲਾਈ ਵੀ ਹਾਸਲ ਕਰ ਸਕਣ। ਵਰਨਣਯੋਗ ਹੈ ਕਿ ਜਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਵਲੋਂ ਸਿਲਾਈ ਕਢਾਈ ਲਈ ਬੰਦੀ ਔਰਤਾਂ ਲਈ 14 ਮਸ਼ੀਨਾਂ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ।
ਸ਼੍ਰੀਮਤੀ ਮਨਪ੍ਰੀਤ ਕੌਰ ਨੇ ਦੱਸਿਆ ਕਿ ਜਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਵਲੋਂ ਇਹਨਾਂ ਕੋਰਸਾਂ ਦੇ ਨਾਲ ਨਾਲ ਇਸ ਗੱਲ ਦਾ ਵੀ ਉਚੇਚਾ ਪ੍ਰਬੰਧ ਕੀਤਾ ਗਿਆ ਹੈ ਕਿ ਬੰਦੀਆਂ ਵੱਲੋਂ ਆਪਣੇ ਹੱਥੀਂ ਤਿਆਰ ਕੀਤਾ ਬੇਕਰੀ ਅਤੇ ਸਲਾਈ, ਕਢਾਈ ਅਤੇ ਫੁਲਕਾਰੀ ਦਾ ਸਮਾਨ ਬਾਜਾਰ ਵਿੱਚ ਵਿਕਰੀ ਲਈ ਆ ਸਕੇ। ਉਨ੍ਹਾਂ ਦੱਸਿਆ ਕਿ ਇਸ ਉਪਰਾਲੇ ਦਾ ਮਕਸਦ ਇਹ ਸੁਨਿਸ਼ਚਿਤ ਕਰਨਾ ਹੈ ਬੰਦੀ ਇਸ ਦੋਰ ਨੂੰ ਸਜਾ ਦੇ ਤੌਰ ਤੇ ਨਾ ਲੈਕੇ ਇਸ ਨੂੰ ਸੁਧਾਰ ਦੇ ਤੌਰ ਤੇ ਲੈਣ ਤਾਂ ਕਿ ਉਹਨਾਂ ਦੀ ਜਿੰਦਗੀ ਵਿੱਚ ਨਵਾਂ ਦੌਰ ਸੁਰੂ ਹੋ ਸਕੇ। ਇਸ ਮੌਕੇ ਸ੍ਰੀ ਰਮਨਦੀਪ ਸਿੰਘ ਭੰਗੂ, ਸੁਪਰਡੈਂਟ, ਨਵੀਂ ਜਿਲ੍ਹਾ ਜੇਲ, ਨਾਭਾ, ਸ੍ਰੀ ਹਰਪ੍ਰੀਤ ਸਿੰਘ ਕਾਰਜਕਾਰੀ ਉੱਪ ਸੁਪਰਡੈਂਟ, ਮੈਡਮ ਕੋਮਲ ਬੇਕਰੀ ਟਰੇਨਰ, ਮੈਡਮ ਪਰਵੀਨ ਕੌਰ ਅਸਿਸਟੈਂਟ ਲੀਗਲ ਏਡ ਡਿਫੈਂਸ ਕੌਂਸਲ ਫਤਹਿਗੜ੍ਹ ਸਾਹਿਬ ਵੀ ਮੌਜੂਦ ਸਨ।