ਪਟਿਆਲਾ : ਰਾਜਿੰਦਰਾ ਹਸਪਤਾਲ ਪਟਿਆਲਾ ਨੇ ਕੋਵਿਡ ਦੌਰਾਨ ਸਾਂਭ-ਸੰਭਾਲ ਨਾ ਹੋਣ ਦੀਆਂ ਅਫ਼ਵਾਹਾਂ ਨੂੰ ਨਕਾਰਦਿਆਂ ਇੱਥੇ ਵਿਸ਼ੇਸ਼ ਤੌਰ 'ਤੇ ਸਥਾਪਤ ਕੀਤੇ ਕੋਵਿਡ ਲੇਬਰ ਰੂਮ ਵਿਖੇ 57 ਕੋਵਿਡ ਪੀੜਤ ਮਹਿਲਾਵਾਂ ਦਾ ਸੁਰੱਖਿਅਤ ਜਣੇਪਾ ਕਰਕੇ ਉਨ੍ਹਾਂ ਦੀ ਕੁਖ 'ਚ ਪਲ ਰਹੇ ਬਾਲਾਂ ਨੂੰ ਬਾਹਰ ਦੀ ਦੁਨੀਆ ਵੀ ਦਿਖਾਈ ਹੈ। ਹਸਪਤਾਲ ਦੇ ਅੰਕੜਿਆਂ ਮੁਤਾਬਕ ਇਨ੍ਹਾਂ 57 ਜਣੇਪਿਆਂ 'ਚੋਂ 29 ਨਾਰਮਲ ਡਿਲਿਵਰੀਆਂ ਅਤੇ 28 ਸੀਜੇਰੀਅਨ ਸੈਕਸ਼ਨ ਰਾਹੀਂ ਹੋਈਆਂ ਹਨ।
ਗਾਇਨੀ ਵਿਭਾਗ ਦੇ ਮੁਖੀ ਡਾ. ਪਰਨੀਤ ਕੌਰ ਦਾ ਕਹਿਣਾਂ ਹੈ ਕਿ ਕੋਵਿਡ ਪੀੜਤ ਮਹਿਲਾਵਾਂ ਦੀਆਂ ਕੁੱਖਾਂ 'ਚ ਪਲ ਰਹੇ ਬੱਚਿਆਂ ਅਤੇ ਉਨ੍ਹਾਂ ਦੀਆਂ ਮਾਵਾਂ ਨੂੰ ਬਚਾਉਣਾ ਬੜੀ ਮੁਸ਼ਕਿਲ ਭਰਿਆ ਕਾਰਜ ਸੀ ਪਰੰਤੂ ਗਾਇਨੀ ਵਿਭਾਗ ਦੇ ਡਾਕਟਰਾਂ ਅਤੇ ਪੈਰਾ ਮੈਡੀਕਲ ਅਮਲੇ ਨੇ ਬੜੇ ਹੀ ਤਰੱਦਦ ਅਤੇ ਸੇਵਾ ਭਾਵਨਾਂ ਨਾਲ ਸਮੁੱਚੀਆਂ 107 ਮਾਵਾਂ ਨੂੰ ਸਿਹਤਯਾਬ ਰੱਖਣ 'ਚ ਸਫ਼ਲਤਾ ਹਾਸਲ ਕੀਤੀ ਹੈ। ਸਿੱਟੇ ਵਜੋਂ ਇੱਥੇ ਦਾਖਲ ਹੋਈ ਇੱਕ ਵੀ ਕੋਵਿਡ-19 ਪਾਜਿਟਿਵ ਗਰਭਵਤੀ ਮਹਿਲਾ ਦੀ ਮੌਤ ਨਹੀਂ ਹੋਈ ਅਤੇ ਉਹ ਡਾਕਟਰਾਂ ਦੀ ਮਿਹਨਤ ਸਦਕਾ ਮਿਸ਼ਨ ਫ਼ਤਿਹ ਤਹਿਤ ਸੁਰੱਖਿਅਤ ਆਪਣੇ ਘਰਾਂ ਨੂੰ ਪਰਤੀਆਂ ਹਨ।
ਡਾ. ਪਰਨੀਤ ਕੌਰ ਨੇ ਕਿਹਾ ਕਿ ਇਹ ਕੋਵਿਡ ਪੀੜਤ ਮਹਿਲਾਵਾਂ ਕੇਵਲ ਪਟਿਆਲਾ ਨਾਲ ਹੀ ਸਬੰਧਤ ਨਹੀਂ ਸਨ ਬਲਕਿ ਲੁਧਿਆਣਾ, ਸੰਗਰੂਰ, ਮੋਹਾਲੀ, ਫ਼ਤਿਹਗੜ੍ਹ ਸਾਹਿਬ, ਬਰਨਾਲਾ ਤੋਂ ਇਲਾਵਾ ਪੰਜਾਬ ਤੋਂ ਬਾਹਰਲੇ ਰਾਜਾਂ ਹਰਿਆਣਾ ਤੇ ਹਿਮਾਚਲ ਪ੍ਰਦੇਸ਼ ਨਾਲ ਵੀ ਸਬੰਧਤ ਸਨ। ਉਨ੍ਹਾਂ ਇੱਕ ਦਿਲਚਸਪ ਘਟਨਾ ਸੁਣਾਉਂਦਿਆਂ ਦੱਸਿਆ ਕਿ ਗਾਇਨੀ ਵਿਭਾਗ ਦੀ ਇੱਕ ਡਾਕਟਰ ਰਸਪਿੰਦਰ ਖ਼ੁਦ ਕੋਵਿਡ ਪੀੜਤ ਹੋਣ ਦੇ ਬਾਵਜੂਦ ਕੋਵਿਡ ਵਾਰਡ 'ਚ ਹੰਗਾਮੀ ਲੋੜ ਪੈਣ 'ਤੇ ਆਪਣੀਆਂ ਸੇਵਾਵਾਂ ਦੇ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਇੱਕ ਡਾਕਟਰ ਲਈ ਆਪਣੇ ਪੇਸ਼ੇ ਪ੍ਰਤੀ ਸੁਹਿਰਦਤਾ ਤੋਂ ਉਪਰ ਕੁਝ ਨਹੀਂ ਹੋ ਸਕਦਾ ਅਤੇ ਡਾਕਟਰ ਰਸਪਿੰਦਰ ਇਸ ਗੱਲ ਦਾ ਜਿਊਂਦਾ ਜਾਗਦਾ ਸਬੂਤ ਹੈ। ਉਨ੍ਹਾਂ ਦੱਸਿਆ ਕਿ ਡਾ. ਰਸਪਿੰਦਰ ਰਾਜਿੰਦਰਾ ਹਸਪਤਾਲ ਦੇ ਕੋਵਿਡ ਵਾਰਡ 'ਚ ਹੀ ਤੀਸਰੀ ਮੰਜ਼ਿਲ 'ਤੇ ਇਲਾਜ ਅਧੀਨ ਹੈ।
ਇਸੇ ਦੌਰਾਨ ਕੋਵਿਡ ਇੰਚਾਰਜ ਸ੍ਰੀਮਤੀ ਸੁਰਭੀ ਮਲਿਕ ਨੇ ਕਿਹਾ ਕਿ ਰਾਜਿੰਦਰਾ ਹਸਪਤਾਲ ਵਿਖੇ ਸਥਾਪਤ ਵਿਸ਼ੇਸ਼ ਕੋਵਿਡ ਲੇਬਰ ਰੂਮ ਇਕ ਉਦਾਹਰਣ ਵਜੋਂ ਸਾਹਮਣੇ ਆਇਆ ਹੈ, ਜਿੱਥੋਂ ਇਕੱਲੇ ਪਟਿਆਲਾ ਜ਼ਿਲ੍ਹੇ ਦੀਆਂ ਗਰਭਵਤੀ ਮਹਿਲਾਵਾਂ ਹੀ ਨਹੀਂ ਬਲਕਿ ਹੋਰਨਾਂ ਜ਼ਿਲ੍ਹਿਆਂ ਸਮੇਤ ਹਰਿਆਣਾ ਤੇ ਹਿਮਾਚਲ ਪ੍ਰਦੇਸ਼ ਦੀਆਂ ਮਹਿਲਾਵਾਂ ਵੀ ਸਿਹਤਯਾਬ ਹੋ ਕੇ ਆਪਣੇ ਘਰ ਗਈਆਂ ਹਨ।
ਜਦੋਂਕਿ ਖ਼ੁਦ ਕੋਵਿਡ ਪਾਜਿਟਿਵ ਆਉਣ ਦੇ ਬਾਵਜੂਦ ਏਕਾਂਤਵਾਸ ਹੋਏ ਜ਼ਿਲ੍ਹਾ ਪਰਿਵਾਰ ਭਲਾਈ ਅਫ਼ਸਰ ਡਾ. ਜਤਿੰਦਰ ਕਾਂਸਲ ਲਗਾਤਾਰ ਸਿਵਲ ਸਰਜਨ ਡਾ. ਹਰੀਸ਼ ਮਲਹੋਤਰਾ ਦੀ ਦੇਖ-ਰੇਖ ਹੇਠ ਕੋਵਿਡ ਪਾਜਿਟਿਵ ਗਰਭਵਤੀ ਮਹਿਲਾਵਾਂ ਨੂੰ ਹਸਪਤਾਲ ਲਿਆਉਣ ਤੇ ਉਨ੍ਹਾਂ ਦੀ ਸੁਰੱਖਿਅਤ ਘਰ ਵਾਪਸੀ 'ਤੇ ਨਿਗਰਾਨੀ ਕਰ ਰਹੇ ਹਨ।
ਉਧਰ ਰਾਜਿੰਦਰਾ ਹਸਪਤਾਲ ਦੇ ਮੈਡੀਕਲ ਸੁਪਰਡੈਂਟ ਡਾ. ਪਾਰਸ ਪਾਂਡਵ ਦਾ ਕਹਿਣਾ ਸੀ ਕਿ ਮਨੁੱਖਤਾ ਲਈ ਸੰਕਟ ਦੀ ਘੜੀ ਸਮੇਂ ਸਮੁੱਚਾ ਮੈਡੀਕਲ ਅਮਲਾ ਲੋਕਾਂ ਨੂੰ ਇਲਾਜ ਦੇਣ ਦੀ ਆਪਣੀ ਜ਼ਿੰਮੇਵਾਰੀ ਤਨਦੇਹੀ ਨਾਲ ਨਿਭਾਅ ਰਿਹਾ ਹੈ, ਜਿਸ ਲਈ ਡਾਕਟਰਾਂ ਤੇ ਹੋਰ ਮੈਡੀਕਲ ਅਮਲੇ ਦੀ ਹੌਂਸਲਾ ਅਫ਼ਜਾਈ ਕੀਤੇ ਜਾਣ ਦੀ ਲੋੜ ਹੈ।