ਸੁਨਾਮ : ਸ਼ਹੀਦ ਊਧਮ ਸਿੰਘ ਦੀ ਜਨਮ ਭੂਮੀ ਤੇ ਸਥਿਤ ਫਲਾਈਓਵਰ ਦੇ ਨੇੜੇ ਗੁਰੂ ਅਰਜਨ ਦੇਵ ਕਲੋਨੀ ਦੀ ਦੁਰਦਸ਼ਾ ਤੋਂ ਭੜਕੇ ਵਸਨੀਕਾਂ ਨੇ ਸਰਕਾਰ ਅਤੇ ਪ੍ਰਸ਼ਾਸਨ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ । ਪ੍ਰਦਰਸ਼ਨਕਾਰੀਆਂ ਦਾ ਕਹਿਣਾ ਹੈ ਕਿ ਕਲੋਨੀ ਦੇ ਵਸਨੀਕ ਪ੍ਰਸ਼ਾਸਨ ਦੀ ਨਾਅਹਿਲੀਅਤ ਕਾਰਨ ਪਿਛਲੇ ਢਾਈ ਸਾਲ ਤੋਂ ਨਰਕ ਭਰੀ ਜ਼ਿੰਦਗੀ ਜਿਉਣ ਲਈ ਮਜ਼ਬੂਰ ਹਨ। ਇਸ ਸਮੇਂ ਅਸ਼ਵਨੀ ਕੁਮਾਰ,ਸੱਤ ਭੂਸ਼ਨ,ਸ਼ਿਕੰਦਰ ਸਿੰਘ ਆਦਿ ਨੇ ਕਿਹਾ ਕਿ ਕਰੀਬ ਦੋ ਢਾਈ ਸਾਲ ਤੋਂ ਸੀਵਰੇਜ ਪਾਇਪ ਪਾਉਣ ਨੂੰ ਲੈਕੇ ਠੇਕੇਦਾਰ ਵੱਲੋਂ ਸੜਕ ਪੁੱਟੀ ਗਈ ਸੀ ਪਰ ਸੀਵਰੇਜ ਦੇ ਪਾਇਪ ਛੋਟੇ ਹੋਣ ਕਾਰਨ ਕਲੋਨੀ ਦੇ ਗੰਦੇ ਪਾਣੀ ਦੀ ਨਿਕਾਸੀ ਵੀ ਸਹੀ ਢੰਗ ਨਾਲ ਨਹੀ ਹੋ ਸਕੀ ਅਤੇ ਨਾ ਹੀ ਸਾਰੇ ਕਲੋਨੀ ਵਾਸੀਆਂ ਨੂੰ ਸੀਵਰੇਜ ਦੇ ਕੁਨੈਕਸ਼ਨ ਮਿਲੇ ਜਦੋਂ ਕਿ ਸੀਵਰੇਜ ਦੇ ਪਾਇਪ ਪਾਉਣ ਲਈ ਕੁਝ ਘਰਾਂ ਅੱਗੇ ਬਣੇ ਰੈਪ ਵੀ ਤੋੜ ਦਿੱਤੇ ਗਏ।ਉਨ੍ਹਾਂ ਕਿਹਾ ਕਿ ਲੰਮਾ ਸਮਾਂ ਬੀਤ ਜਾਣ ਦੇ ਬਾਵਜੂਦ ਵੀ ਪੁੱਟੀ ਹੋਈ ਸੜਕ ਮੁੜ ਨਹੀ ਬਣੀ ਅਤੇ ਥੋੜ੍ਹਾ ਜਿਹਾ ਮੀਂਹ ਪੈਣ ਕਾਰਨ ਸੜਕ ਤੇ ਚਿੱਕੜ ਹੋ ਜਾਂਦਾ ਹੈ।ਜਿਸ ਕਾਰਨ ਕਲੋਨੀ ਵਾਸੀਆਂ ਦਾ ਜਿਉਣਾ ਦੁੱਭਰ ਹੋਇਆ ਪਿਆ ਹੈ। ਇਸ ਮੌਕੇ ਦਵਾਰਕਾ ਦਾਸ,ਅਮਨ ਕੁਮਾਰ,ਵਿਨੋਦ ਕੁਮਾਰ,ਵਿਕਰਮ ਖਾਨ,ਸੁਰਜੀਤ ਕੌਰ,ਸਲੋਚਨਾ ਦੇਵੀ,ਨਿੱਕੋ,ਸਰਬਜੀਤ ਕੌਰ,ਰਜਨੀ ਅਤੇ ਨੀਤੂ ਰਾਣੀ ਆਦਿ ਮੌਜੂਦ ਸਨ।