ਅੰਮ੍ਰਿਤਸਰ : ਖ਼ਾਲਸਾ ਕਾਲਜ ਦੇ ਸੰਗੀਤ ਵਿਭਾਗ ਵੱਲੋਂ ‘ਕੈਂਸਰ ਰੇਡੀਏਸ਼ਨ ’ਤੇ ਭਾਰਤੀ ਰਾਗ ਅਤੇ ਕਲਾਸੀਕਲ ਸਾਜ਼ਾਂ ਦਾ ਵਿਗਿਆਨਕ ਪ੍ਰਭਾਵ’ ਵਿਸ਼ੇ ’ਤੇ ਇਕ ਐਕਸਟੈਂਸ਼ਨ ਲੈਕਚਰ ਅਤੇ ਡੈਕਲਾਮੇਸ਼ਨ ਮੁਕਾਬਲਾ ਕਰਵਾਇਆ ਗਿਆ। ਕਾਲਜ ਪ੍ਰਿੰਸੀਪਲ ਡਾ. ਆਤਮ ਸਿੰਘ ਰੰਧਾਵਾ ਦੇ ਸਹਿਯੋਗ ਨਾਲ ਕਰਵਾਏ ਗਏ ਉਕਤ ਪ੍ਰੋਗਰਾਮ ਮੌਕੇ ਐੱਸ. ਜੀ. ਆਰ. ਡੀ. ਵੱਲ੍ਹਾ ਤੋਂ ਪ੍ਰੋਫੈਸਰ ਅਤੇ ਪ੍ਰਸਿੱਧ ਓਨਕੋਲੋਜਿਸਟ ਡਾ. ਨੀਰਜ ਜੈਨ ਇੰਡੀਅਨ ਨੇ ਸ਼ਿਰਕਤ ਕਰਦਿਆਂ ਭਾਰਤੀ ਰਾਗਾਂ ਅਤੇ ਕਲਾਸੀਕਲ ਸੰਗੀਤ ਯੰਤਰਾਂ ਦੇ ਵਿਗਿਆਨਕ ਪਹਿਲੂਆਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਸਾਂਝੀ ਕੀਤੀ। ਇਸ ਮੌਕੇ ਉਨ੍ਹਾਂ ਨੇ ਕੈਂਸਰ ਦੇਖਭਾਲ ਅਤੇ ਰੇਡੀਏਸ਼ਨ ਓਨਕੋਲੋਜੀ ’ਚ ਉਨ੍ਹਾਂ ਦੀ ਸੰਭਾਵੀ ਸਾਰਥਿਕਤਾ ਸਬੰਧੀ ਚਰਚਾ ਕੀਤੀ। ਉਨ੍ਹਾਂ ਕਿਹਾ ਕਿ ਡਾ. ਜੈਨ ਜੋ ਕਿ ਕਾਲਜ ਆਫ਼ ਰੇਡੀਏਸ਼ਨ ਓਨਕੋਲੋਜੀ (ਆਈ. ਸੀ. ਆਰ. ਓ.) ਦੇ ਵਾਈਸ ਚੇਅਰਮੈਨ ਅਤੇ ਇਸ ਖੇਤਰ ਦੇ ਰਾਸ਼ਟਰੀ ਪੱਧਰ ’ਤੇ ਮਾਹਿਰ ਵੱਲੋਂ ਵਿਦਿਆਰਥੀਆਂ ਨੂੰ ਪ੍ਰਦਾਨ ਕੀਤੀ ਗਈ ਜਾਣਕਾਰੀ ਭਵਿੱਖ ’ਚ ਉਨ੍ਹਾਂ ਲਈ ਸਹਾਈ ਸਿੱਧ ਹੋਵੇਗੀ। ਪ੍ਰੋਗਰਾਮ ਦੌਰਾਨ ਮੁਕਾਬਲੇ ਦਾ ਨਿਰਣਾ ਪ੍ਰੋ. ਹਰਸ਼ ਸਲਾਰੀਆ ਅਤੇ ਡਾ. ਅਕਾਂਕਸ਼ਾ ਨੌਟਿਆਲ ਵੱਲੋਂ ਕੀਤਾ ਗਿਆ। ਜਿਸ ’ਚ ਸਿਮਰਨ ਕੌਰ (ਐੱਮ. ਏ. ਸੈਮ-ਤੀਜਾ ਸੰਗੀਤ ਵੋਕਲ), ਮਿਸ਼ਠੀ (ਬੀ. ਏ. ਸੈਮ-ਪਹਿਲਾ), ਰੰਜੀਤਾ (ਐੱਮ. ਏ. ਸੈਮ-ਪਹਿਲਾ ਸੰਗੀਤ ਵੋਕਲ) ਨੇ ਭਾਸ਼ਣ ਮੁਕਾਬਲੇ ’ਚ ਪਹਿਲਾ, ਦੂਜਾ ਅਤੇ ਤੀਜਾ ਸਥਾਨ ਪ੍ਰਾਪਤ ਕੀਤਾ। ਉਨ੍ਹਾਂ ਕਿਹਾ ਕਿ ਸਮਾਗਮ ਨੇ ਵਿਦਿਆਰਥੀਆਂ ਨੂੰ ਭਾਰਤੀ ਸ਼ਾਸਤਰੀ ਸੰਗੀਤ ਨੂੰ ਸਮਕਾਲੀ ਵਿਗਿਆਨਕ ਅਤੇ ਅੰਤਰ-ਅਨੁਸ਼ਾਸਨੀ ਦ੍ਰਿਸ਼ਟੀਕੋਣ ਰਾਹੀਂ ਦੇਖਣ ਲਈ, ਖਾਸ ਕਰਕੇ ਸੰਗੀਤ ਥੈਰੇਪੀ, ਸਿਹਤ ਸੰਭਾਲ ਅਤੇ ਤੰਦਰੁਸਤੀ ਦੇ ਉੱਭਰ ਰਹੇ ਖੇਤਰਾਂ ’ਚ ਉਤਸ਼ਾਹਿਤ ਕੀਤਾ। ਇਸ ਪ੍ਰੋਗਰਾਮ ਦਾ ਸੰਚਾਲਨ ਪ੍ਰੋ. ਨੇਹਾ ਦੁਆਰਾ ਕੀਤਾ ਗਿਆ।