ਖਰੜ : ਕਾਂਗਰਸ ਪਾਰਟੀ ਦੇ ਸੀਨੀਅਰ ਆਗੂ ਤੇ ਸਾਬਕਾ ਮੰਤਰੀ ਜਗਮੋਹਨ ਸਿੰਘ ਕੰਗ ਨੇ ਖਰੜ ਹਲਕੇ ਦੇ ਪਿੰਡ ਤੋਲੇਮਾਜਰਾ ਵਿਖੇ ਗਗਨ ਸਿੰਘ ਦੀ ਅਗਵਾਈ ਹੇਠ ਮੀਟਿੰਗ ਕੀਤੀ ਜਿਸ ਵਿਚ ਪਿੰਡ ਰਸਨਹੇੜੀ, ਗੱਬੇਮਾਜਰਾ, ਨੱਗਲਫੈਜ਼ਗੜ੍ਹ ਅਤੇ ਤੋਲੇਮਾਜਰਾ ਦੇ ਪਤਵੰਤਿਆਂ, ਕਾਂਗਰਸੀ ਵਰਕਰਾਂ, ਆਗੂਆਂ ਨੇ ਸਮੂਲੀਅਤ ਕੀਤੀ। ਮੀਟਿੰਗ ਵਿਚ ਪਿੰਡ ਦੇ ਵਸਨੀਕਾਂ ਨੇ ਧਿਆਨ ਵਿਚ ਲਿਆਂਦਾ ਕਿ ਪਿਛਲੀ ਕਾਂਗਰਸ ਸਰਕਾਰ ਸਮੇਂ ਕੁੱਝ ਸਮਾਂ ਪਹਿਲਾਂ ਨਗਰ ਕੌਸਲ ਖਰੜ ਵਿੱਚ ਨਵੇਂ ਪਿੰਡ ਸ਼ਾਮਲ ਕਰਵਾਏ ਸਨ, ਜਿਨ੍ਹਾਂ ਵਿੱਚ ਤੋਲੇਮਾਜਰਾ, ਤਿਪੜੀ, ਭੁੱਖੜੀ, ਰਡਿਆਲਾ, ਦਾਊਮਾਜਰਾ, ਪੀਰ ਸੁਹਾਣਾ ਸਨ, ਇਨ੍ਹਾਂ ਪਿੰਡਾਂ ਦਾ ਕਮੇਟੀ ਵਿੱਚ ਸ਼ਾਮਲ ਹੋਣ ਦਾ ਨੋਟੀਫਿਕੇਸ਼ਨ ਹੋਣ ਤੋਂ ਬਾਅਦ ਵੀ ਕਮੇਟੀ ਨੇ ਕੋਈ ਬਣਦੀ ਢੁੱਕਵੀਂ ਲੋੜੀਂਦੀ ਕਾਰਵਾਈ ,ਜਦਕਿ ਜਦੋਂ ਕੀ ਇਨਾਂ ਪਿੰਡਾਂ ਦੀਆਂ ਕਰੋੜਾਂ ਰੁਪਏ ਦੀਆਂ ਸੈਂਕੜੇ ਏਕੜ ਸ਼ਾਮਲਾਤ ਜ਼ਮੀਨ ਵੀ ਕਮੇਟੀ ਨੂੰ ਮਿਲੀਆਂ ਸਨ। ਇਸੇ ਕਰਕੇ ਮਾਨਯੋਗ ਹਾਈਕੋਰਟ ਨੇ ਐੱਮ.ਸੀ. ਖਰੜ ਦੀਆਂ ਮਿਊਂਸੀਪਲ ਚੋਣਾਂ ਵੀ ਮੁਲਤਵੀ ਕਰ ਦਿੱਤੀਆਂ ਸਨ, ਜੋ ਕਿ ਸਿਰਫ਼ ਸਰਾਸਰ ਐੱਮ.ਸੀ. ਖਰੜ ਦੀ ਅਣਗਹਿਲੀ ਕਰਕੇ ਹੀ ਹੋਈਆਂ ਹਨ, ਨਹੀਂ ਤਾਂ ਖਰੜ ਐੱਮ.ਸੀ. ਦੀਆਂ ਚੋਣਾਂ ਵੀ ਨਾਲ ਹੀ ਹੋ ਜਾਣੀਆਂ ਸਨ। ਉਨ੍ਹਾਂ ਕਿਹਾ ਕਿ ਸਾਰੇ ਪਿੰਡਾਂ ਦੀਆਂ ਨਵੀਂਆਂ ਚੁਣੀਆਂ ਹੋਈਆਂ ਪੰਚਾਇਤਾਂ ਨੂੰ ਕੋਈ ਵੀ ਗ੍ਰਾਂਟ ਨਹੀਂ ਮਿਲੀ ਅਤੇ ਸਰਕਾਰ ਵੱਲੋਂ ਸਬੰਧਤ ਸਾਰੀਆਂ ਲਾਭਪਾਤਰੀ ਸਕੀਮਾਂ ਜਿਵੇਂ ਕਿ ਮੁੱਖ ਮੰਤਰੀ ਸਿਹਤ ਬੀਮਾ ਯੋਜਨਾ ਅਤੇ ਮਾਵਾਂ ਧੀਆਂ ਸਤਿਕਾਰਯੋਗ ਯੋਜਨਾ ਵਿੱਚ ’ਆਪ’ ਪਾਰਟੀ ਵੱਲੋਂ ਵਿਤਕਰਾ ਕੀਤਾ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਰਸਨਹੇੜੀ—ਤੋਲੇਮਾਜਰਾ, ਖੁਨੀਮਾਜਰਾ -ਲਾਂਡਰਾਂ ਰੋਡ ਤੱਕ ਜਾਂਦੀ ਸੜਕ ਦੀ ਵੀ ਪਤਲੀ ਹਾਲਤ ਹੈ, ਜੋ ਕਿ ਇਲਾਕੇ ਦਾ ਮੁੱਖ ਲਾਂਘਾ ਹੈ।