ਲੁਧਿਆਣਾ : ਲੁਧਿਆਣਾ ਜ਼ਿਲ੍ਹੇ ਨਾਲ ਸਬੰਧਿਤ ਸੂਬਾ ਕਾਂਗਰਸ ਦੇ ਦੋ ਆਗੂਆਂ ਸਾਬਕਾ ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਅਤੇ ਕਵਲਜੀਤ ਸਿੰਘ ਕੜਵਲ਼ ਆਪੋ-ਆਪਣੇ ਸਮਰਥਕਾਂ ਸਮੇਤ ਇਤਿਹਾਸਕ ਗੁਰਦੁਆਰਾ ਮੰਜੀ ਸਾਹਿਬ ਆਲਮਗੀਰ ਵਿਖੇ ਗੁਰੂ ਸਾਹਿਬ ਜੀ ਸਨਮੁਖ ਨਤਮਸਤਕ ਹੋਏ ਅਤੇ ਮੱਤਭੇਦ ਦੂਰ ਕਰਵਾਉਣ ਵਾਲਿਆਂ ਸਨਮੁਖ ਸਿਰ ਨਿਵਾਉਂਦਿਆਂ ਬਚਦੇ ਸਾਹਾਂ ਤੱਕ ਇੱਕ-ਦੂਜੇ ਤੇ ਪ੍ਰਵਾਰਾਂ ਖਿਲਾਫ਼ ਦੂਸ਼ਣਬਾਜ਼ੀ ਨਾ ਕਰਨ ਦਾ ਪ੍ਰਣ ਕੀਤਾ। ਜਾਣਕਾਰੀ ਅਨੁਸਾਰ ਪਿੱਛਲੇ ਕੁਝ ਸਮੇੰ ਤੋੰ ਉਪਰੋਕਤ ਆਗੂਆਂ ਦਰਮਿਆਨ ਆਪਸੀ ਬੋਲ-ਚਾਲ ਬੰਦ ਸੀ, ਜਦਕਿ ਵਿਖਰੇਵਾਂ ਤੇ ਦੂਸ਼ਣਬਾਜ਼ੀ ਸਿਖਰ ਤੱਕ ਪੁੱਜ ਚੁੱਕੀ ਸੀ। ਦੂਜੇ ਪਾਸੇ ਕਵਲਜੀਤ ਸਿੰਘ ਕੜਵਲ ਨੇ ਸਾਜਿਸ਼ ਕਰਕੇ ਦੋਵਾਂ ਦਰਮਿਆਨ ਦੂਰੀਆਂ ਪਾਉਣ ਵਾਲਿਆਂ ਤੇ ਨਿਸ਼ਾਨਾ ਖਿੱਚਦਿਆਂ ਕਿਹਾ ਕਿ ਅਸੀਂ ਲੋਕ ਮਸਲਿਆਂ ਨੂੰ ਹੱਲ ਕਰਨ ਲਈ, ਮਾਨਵਤਾ ਦੀ ਸੇਵਾ ਦੇ ਸੰਕਲਪ ਲਈ, ਹੱਕ ਇਨਸਾਫ ਦੀਵਾਉਣ ਲਈ ਦੋਵੇਂ ਭਰਾ ਤੁਰੇ ਸਾਂ, ਜੋ ਸਾਜਿਸ਼ਕਾਰੀਆਂ ਨੂੰ ਹਜਮ ਨਾ ਆਈ, ਅੱਜ ਅਸੀਂ ਮੁੜ ਇਕੱਠੇ ਹੋ ਗਏ ਹਾਂ ਪਰ ਅੱਜ ਸਾਡੇ ਦਰਮਿਆਨ ਵਿਖਰੇਵੇਂ ਦੀ ਦਰਾਰ ਪਾਉਣ ਵਾਲਿਆਂ ਦੀ ਨੀਂਦ ਵੀ ਉੱਡ ਗਈ ਹੋਵੇਗੀ। ਦਿਲਚਸਪ ਬਾਕੀ ਇਹ ਵੇਖਣ ਨੂੰ ਆਇਆ ਕਿ ਦੋਵੇਂ ਆਗੂਆਂ ਨਾਲੋਂ ਦੋਵਾਂ ਦੇ ਸਮਰਥਕਾਂ ਵਿੱਚ ਆਪਸੀ ਸੁਲਹਾ ਸਫਾਈ ਦੀ ਖੁਸ਼ੀ ਵਾਲੀ ਲਹਿਰ ਵਧੇਰੇ ਵੇਖਣ ਨੂੰ ਨਜ਼ਰ ਆਈ। ਦੋਵਾਂ ਆਗੂਆਂ ਨੇ ਇਕੱਠਿਆਂ ਗੁਰੂ ਕੇ ਲੰਗਰ ਦੀ ਪੰਗਤ ਵਿੱਚ ਬੈਠ ਕੇ ਲੰਗਰ ਛਕਿਆ।