ਸੁਨਾਮ, 10 ਜੁਲਾਈ : ਸ਼ਹੀਦ ਊਧਮ ਸਿੰਘ ਦੀ ਜਨਮ ਭੂਮੀ ਤੇ ਨਵੇਂ ਬਣੇ ਰੇਲਵੇ ਅੰਡਰਬ੍ਰਿਜ ਦੇ ਨੇੜੇ ਪਟਿਆਲਾ ਮੁੱਖ ਮਾਰਗ ਦੇ ਡਿਵਾਈਡਰ 'ਤੇ ਰੱਖੇ ਗਏ ਵੱਡੇ-ਵੱਡੇ ਗਮਲੇ ਇੰਨੀਂ ਦਿਨੀਂ ਰਾਹਗੀਰਾਂ ਲਈ ਖੂਬਸੂਰਤੀ ਦੀ ਬਜਾਏ ਵੱਡੀ ਮੁਸੀਬਤ ਬਣ ਚੁੱਕੇ ਹਨ। ਸੜਕ ਦੇ ਵਿਚਕਾਰ ਰੱਖੇ ਗਏ ਇਹ ਉੱਚੇ ਗਮਲੇ ਹੁਣ 'ਬਲਾਈਂਡ ਸਪਾਟ' ਦਾ ਰੂਪ ਲੈ ਚੁੱਕੇ ਹਨ। ਇਸ ਸੜਕ ਤੇ' ਬਹੁਤ ਜ਼ਿਆਦਾ ਆਵਾਜਾਈ ਹੋਣ ਕਾਰਨ ਇਨ੍ਹਾਂ ਗਮਲਿਆਂ ਕਰਕੇ ਕਦੇ ਵੀ ਕੋਈ ਵੱਡਾ ਅਤੇ ਦਰਦਨਾਕ ਸੜਕ ਹਾਦਸਾ ਵਾਪਰ ਸਕਦਾ ਹੈ। ਸੜਕ ਤੋਂ ਲੰਘਣ ਵਾਲੇ ਰਾਹਗੀਰਾਂ ਕਾਰ ਅਤੇ ਦੋ ਪਹੀਆ ਵਾਹਨ ਚਾਲਕਾਂ ਨੇ ਦੱਸਿਆ ਕਿ ਜਦੋਂ ਵੀ ਕੋਈ ਵਿਅਕਤੀ ਕੱਟ ਤੋਂ ਸੜਕ ਪਾਰ ਕਰਨ ਜਾਂ ਮੁੜਨ ਦੀ ਕੋਸ਼ਿਸ਼ ਕਰਦਾ ਹੈ, ਤਾਂ ਡਿਵਾਈਡਰ 'ਤੇ ਕਤਾਰ ਵਿੱਚ ਰੱਖੇ ਉੱਚੇ ਅਤੇ ਸੰਘਣੇ ਗਮਲੇ ਸਾਹਮਣੇ ਦੀ ਦਿੱਖ ਨੂੰ ਪੂਰੀ ਤਰ੍ਹਾਂ ਬਲਾਕ ਕਰ ਦਿੰਦੇ ਹਨ। ਸਥਾਨਕ ਦੁਕਾਨਦਾਰਾਂ ਨੇ ਕਿਹਾ ਕਿ ਦਿਨ ਵੇਲੇ ਤਾਂ ਜਿਵੇਂ-ਤਿਵੇਂ ਬਚਾਅ ਹੋ ਜਾਂਦਾ ਹੈ, ਪਰ ਰਾਤ ਦੇ ਸਮੇਂ ਇਨ੍ਹਾਂ ਗਮਲਿਆਂ ਕਾਰਨ ਕੱਟ ਸਾਫ਼ ਦਿਖਾਈ ਨਹੀਂ ਦਿੰਦੇ, ਜਿਸ ਨਾਲ ਹਾਦਸਿਆਂ ਦਾ ਖ਼ਤਰਾ ਦੁੱਗਣਾ ਹੋ ਜਾਂਦਾ ਹੈ। ਪਟਿਆਲਾ ਰੋਡ ਤੋਂ ਲੰਘਣ ਵਾਲੇ ਰਾਹਗੀਰਾਂ ਦਾ ਕਹਿਣਾ ਹੈ ਕਿ ਪ੍ਰਸ਼ਾਸਨ ਨੇ ਸੜਕ ਨੂੰ ਸੁੰਦਰ ਲੁੱਕ ਦੇਣ ਲਈ ਇਹ ਗਮਲੇ ਲਗਾਏ ਸਨ, ਪਰ ਹੁਣ ਇਹ ਲੋਕਾਂ ਦੀ ਜਾਨ ਦੇ ਦੁਸ਼ਮਣ ਬਣ ਗਏ ਹਨ। ਕਿਸੇ ਵੱਡੇ ਹਾਦਸੇ ਦਾ ਇੰਤਜ਼ਾਰ ਕਰਨ ਦੀ ਬਜਾਏ ਪ੍ਰਸ਼ਾਸਨ ਨੂੰ ਇਨ੍ਹਾਂ ਨੂੰ ਤੁਰੰਤ ਇੱਥੋਂ ਹਟਾਉਣਾ ਚਾਹੀਦਾ ਹੈ। ਲੋਕਾਂ ਨੇ ਜ਼ੋਰਦਾਰ ਮੰਗ ਕੀਤੀ ਹੈ ਕਿ ਜਨਤਾ ਦੀ ਸੁਰੱਖਿਆ ਨੂੰ ਮੁੱਖ ਰੱਖਦਿਆਂ ਇਨ੍ਹਾਂ ਗਮਲਿਆਂ ਨੂੰ ਤੁਰੰਤ ਇੱਥੋਂ ਕਿਸੇ ਦੂਜੀ ਜਗ੍ਹਾ ਸ਼ਿਫਟ ਕੀਤਾ ਜਾਵੇ।