ਖਰੜ : ਝੁੰਗੀਆਂ ਰੋਡ ਖਰੜ ਦੇ ਦੁਕਾਨਦਾਰਾਂ ਨੇ ਨਗਰ ਕੌਂਸਲ ਵਲੋਂ ਸੜਕ ਦੀ ਉਸਾਰੀ ਨਾ ਕਰਵਾਏ ਜਾਣ ਵਿਰੁੱਧ ਦੋ ਘੰਟੇ ਲਈ ਮਾਰਕੀਟ ਬੰਦ ਕਰਕੇ ਚੰਡੀਗੜ੍ਹ ਰੋਡ ਉੱਤੇ ਸੰਕੇਤਕ ਰੋਸ ਮੁਜ਼ਾਹਰਾ ਕੀਤਾ ਗਿਆ। ਜਿਸ ਦੀ ਅਗਵਾਈ ਜੰਤਾ ਨਗਰ, ਦਸਮੇਸ਼ ਨਗਰ, ਦੀਦਾਰ ਨਗਰ, ਸਵਰਾਜ ਨਗਰ, ਗਰੀਨ ਐਵੇਨਿਊ ਦੇ ਦੁਕਾਨਦਾਰਾਂ ਅਤੇ ਆਮ ਲੋਕਾਂ ਨੇ ਕੀਤੀ। ਉਨ੍ਹਾਂ ਦਾ ਰੋਸ ਹੈ ਕਿ ਪਿਛਲੇ ਲਗ ਭਗ ਇੱਕ ਸਾਲ ਤੋਂ ਝੁੰਗੀਆਂ ਰੋਡ ਖਰੜ ਦੀ ਹਾਲਤ ਬਹੁਤ ਖਸਤਾ ਹੈ । ਕਿਉਂਕਿ ਇਸ ਸੜਕ ਉਤੋਂ ਭਾਰੀ ਵਾਹਨਾਂ ਦੇ ਲੰਘਣ ਕਰਕੇ ਝੁੰਗੀਆਂ ਰੋਡ ਸੜਕ ਥਾਂ ਥਾਂ ਤੋਂ ਟੁੱਟ ਚੁੱਕੀ ਹੈ। ਨਗਰ ਕੌਂਸਲ ਨੇ ਨਹਿਰੀ ਪਾਣੀ ਦੀ ਸਪਲਾਈ ਲਈ ਜੋ ਵਾਟਰ ਪਾਈਪ ਲਾਈਨ ਪਾਈ ਨੂੰ ਵੀ ਲਗਭਗ ਛੇ ਮਹੀਨੇ ਤੋਂ ਵੱਧ ਸਮਾਂ ਹੋ ਚੁੱਕਾ ਹੈ ਪਰ ਪੁੱਟੀ ਗਈ ਸੜਕ ਦੀ ਹਾਲੇ ਤੱਕ ਉਸ ਦੀ ਉਸਾਰੀ ਨਹੀਂ ਕਰਵਾਈ ਗਈ,ਬਲਕਿ ਮਟੀਰੀਅਲ ਸੁੱਟ ਕੇ ਉਸਾਰੀ ਦਾ ਕੰਮ ਅਧੂਰਾ ਛੱਡ ਦਿੱਤਾ ਗਿਆ ਹੈ। ਜਿਸ ਕਰਕੇ ਸੜਕ ਉੱਤੇ ਆਮ ਕਰਕੇ ਹਾਦਸੇ ਵੀ ਹੁੰਦੇ ਹਨ ਤੇ ਜਾਮ ਲੱਗਿਆ ਰਹਿੰਦਾ ਹੈ। ਇਸ ਵਜੵਾ ਕਰਕੇ ਮਾਰਕੀਟ ਦੇ ਦੁਕਾਨਦਾਰਾਂ ਦਾ ਕਾਰੋਬਾਰ ਵੀ ਪ੍ਰਭਾਵਿਤ ਹੋ ਚੁੱਕਾ ਹੈ। ਲੋਕਾਂ ਦਾ ਰੋਸ ਸੀ ਕਿ ਇਸ ਸੜਕ ਦੀ ਉਸਾਰੀ ਲਈ ਨਗਰ ਕੌਂਸਲ ਅਤੇ ਪ੍ਰਸ਼ਾਸ਼ਨ ਨੂੰ ਬਹੁਤ ਸਾਰੀਆਂ ਦਰਖਾਸਤਤਾਂ ਦਿੱਤੀਆਂ ਜਾ ਚੁੱਕੀਆਂ ਹਨ। ਜੋ ਕਿ ਨਗਰ ਕੌਂਸਲ ਵੱਲੋਂ ਠੰਡੇ ਬਸਤੇ ਵਿੱਚ ਸੁੱਟ ਦਿੱਤੀਆਂ ਜਾਂਦੀਆਂ ਹਨ। ਬਲਕਿ ਲੋਕਾਂ ਦੇ ਇਸ ਮਸਲੇ ਨੂੰ ਆਮ ਲੋਕ ਅਤੇ ਵੱਖ ਵੱਖ ਵੈਲਫੇਅਰ ਐਸੋਸੀਏਸ਼ਨਾਂ ਪ੍ਰਸ਼ਾਸਨ ਨੂੰ ਕਈ ਵਾਰ ਦਰਖਾਸਤਾਂ ਵੀ ਦੇ ਚੁੱਕੀਆਂ ਹਨ। ਬਰਸਾਤ ਵੀ ਸਿਰ ਉੱਤੇ ਹੈ ਪਰ ਨਗਰ ਕੌਂਸਲ ਕੁੰਭ ਕਰਨ ਦੀ ਨੀਂਦ ਸੁੱਤੀ ਪਈ ਹੈ। ਮੁਜ਼ਾਹਰਾਕਾਰੀ ਮੰਗ ਕਰ ਰਹੇ ਸਨ ਕਿ ਸੜਕ ਦੀ ਉਸਾਰੀ ਸੜਕ ਦਾ ਲੇਬਲ ਨੀਵਾਂ ਕਰਕੇ ਕਰਵਾਈ ਜਾਵੇ ਅਤੇ ਮਜਬੂਤੀ ਲਈ ਠੀਕ ਮਟੀਰੀਅਲ ਦੀ ਵਰਤੋਂ ਕੀਤੀ ਜਾਵੇ। ਬਰਸਾਤੀ ਪਾਣੀ ਦੇ ਨਿਕਾਸ ਲਈ ਸੜਕ ਦੇ ਦੋਵੇਂ ਪਾਸੇ ਡਰੇਨੇਜ ਪਾਇਪਾਂ ਪੁਆ ਕੇ ਪਾਣੀ ਦੀ ਨਿਕਾਸੀ ਦਰੁਸਤ ਕੀਤੀ ਜਾਵੇ। ਮੁਜ਼ਾਹਰਾਕਾਰੀਆਂ ਨੇ ਹੱਥਾਂ ਵਿੱਚ ਮਾਟੋ ਫੜੇ ਹੋਏ ਸਨ। ਇਸ ਰੋਸ ਮੁਜਾਹਰੇ ਵਿੱਚ ਅਮ੍ਰਿਤਪਾਲ ਸਿੰਘ ਖਾਲਸਾ,ਹਰਜੋਤ ਸਿੰਘ,ਰਮਨ ਮੈਡੀਕੋਜ਼,ਪਰਦੀਪ ਸੱਚਦੇਵਾ,ਖੰਨਾ ਦਪੱਟਾ ਤੇ ਪਗੜੀ ਸਟੋਰ,ਮਲਕੀਅਤ ਸਿੰਘ ਪੰਜਾਬ ਸੈਨੇਟਰੀ,ਪ੍ਰੇਮ ਪਰਕਾਸ਼,ਸਰਬਜੀਤ ਸਿੰਘ, ਪਟਵਾਰੀ ਸੈਨੇਟਰੀ ਨਿਰੰਜਣ ਸਿੰਘ ਗਿੱਲ, ਸ਼ੇਰ ਸਿੰਘ, ਇੰਦਰਜੀਤ ਸਿੰਘ,ਜਸਵੀਰ ਸਿੰਘ ਨੇ ਭਾਗ ਲਿਆ। ਇਸ ਸਮੇਂ ਲੋਕ ਆਵਾਜ਼ ਐਸੋਸੀਏਸ਼ਨ ਦੇ ਸੀਨੀਅਰ ਮੀਤ ਪ੍ਰਧਾਨ ਅਮਰਜੀਤ ਸਿੰਘ, ਜਗਤਾਰ ਸਿੰਘ, ਅਵਤਾਰ ਸਿੰਘ ਚੱਕਲਾਂ, ਤਰਲੋਚਨ ਸਿੰਘ ਵੀ ਹਾਜ਼ਰ ਸਨ।