ਖਰੜ : ਤਰਕਸ਼ੀਲ ਸੁਸਾਇਟੀ ਦੇ ਫਾਊਡਰ ਮੈਂਬਰ ਸੁਜਾਨ ਸਿੰਘ ਅਤੇ ਉਸਦੀ ਪਤਨੀ ਅਮਰਜੀਤ ਕੌਰ ਨੇ ਜ਼ਿੰਦਗ਼ੀ ਨੂੰ ਲੋਕ ਹਿੱਤਾਂ ਅਤੇ ਸਮਾਜ ਵਿੱਚ ਵਿਗਿਆਨਕ ਨਜ਼ਰੀਆ ਵਿਕਸਿਤ ਕਰਨ ਦੇ ਕਾਰਜਾਂ ਲਈ ਲਾਈ ਹੋਇਆ ਹੈ, ਅਸੀਂ ਚਾਹੁੰਦੇ ਹਾਂ ਕਿ ਮੌਤ ਉਪਰੰਤ ਵੀ ਇਸੇ ਤਰ੍ਹਾਂ ਸਾਡੇ ਸਰੀਰਾਂ ਦਾ ਮੈਡੀਕਲ ਖੋਜ ਲਈ ਸਦਉਪਯੋਗ ਕੀਤਾ ਜਾਵੇ ਤਾਂ ਕਿ ਅਸੀਂ ਮਰਨ ਉਪਰੰਤ ਵੀ ਵਿਗਿਆਨ ਅਤੇ ਸਮਾਜ ਦੇ ਕੰਮ ਆ ਸਕੀਏ ”, ਇਹ ਪ੍ਰਗਟਾਵਾ ਸੁਜਾਨ ਸਿੰਘ ਨੇ ਸੁਸਾਇਟੀ ਦੀ ਮੀਟਿੱਗ ਵਿਚ ਕੀਤਾ। ਤਰਕਸ਼ੀਲ ਸੁਸਾਇਟੀ ਦੀ ਇਕਾਈ ਖਰੜ ਦੇ ਫ਼ਾਉਂਡਰ ਮੈਂਬਰ ਅਤੇ ਇਕਾਈ ਦੇ ਸਭ ਤੋਂ ਪਹਿਲੇ ਪ੍ਰਧਾਨ ਮੀਡੀਆ ਇਨਚਾਰਜ ਕਰਮਜੀਤ ਸਕਰੁੱਲਾਂਪੁਰੀ ਨੇ ਦੱਸਿਆ ਕਿ ਇਕਾਈ ਖਰੜ ਦੇ ਕਾਰਜਕਾਰੀ ਮੁਖੀ ਭੁਪਿੰਦਰ ਮਦਨਹੇੜੀ ਦੀ ਪ੍ਰਧਾਨਗੀ ਵਿੱਚ ਹੋਈ ਇਸ ਭਰਵੀਂ ਮੀਟਿੰਗ ਦੌਰਾਨ ਸੁਜਾਨ ਸਿੰਘ ਬਡਾਲਾ ਅਤੇ ਉਹਨਾਂ ਦੀ ਪਤਨੀ ਅਮਰਜੀਤ ਕੌਰ ਨੇ ਮਰਨ ਉਪਰੰਤ ਸਰੀਰਾਂ ਨੂੰ ਮੈਡੀਕਲ ਖੋਜ ਕਾਰਜਾਂ ਲਈ ਪੀ ਜੀ ਆਈ ਵੱਲੋਾ ਨਿਰਧਾਰਿਤ ਫ਼ਾਰਮ ਭਰ ਕੇ ਤਰਕਸ਼ੀਲ ਸੁਸਾਇਟੀ ਦੀ ਇਸ ਲੜੀ ਨੂੰ ਹੋਰ ਅੱਗੇ ਤੋਰਨ ਵਿੱਚ ਆਪਣੀ ਸੋਚ ਦਾ ਵਡਮੁੱਲਾ ਯੋਗਦਾਨ ਪਾਇਆ ਹੈ । ਇਸ ਮੌਕੇ ਬੋਲਦਿਆਂ ਜੋਨਲ ਆਗੂ ਪ੍ਰਿੰ. ਗੁਰਮੀਤ ਖਰੜ ਨੇ ਕਿਹਾ ਕਿ ਇਸ ਤੋਂ ਪਹਿਲਾਂ ਵੀ ਇਕਾਈ ਖਰੜ ਦੇ ਸੀਨੀਅਰ ਆਗੂ ਗੁਰਮੀਤ ਸਹੌੜਾਂ ਨੇ ਵੀ ਆਪਣੀ ਪਤਨੀ ਸਮੇਤ ਸਰੀਰ ਦਾਨ ਕਰਨ ਦੇ ਫ਼ਾਰਮ ਭਰੇ ਹੋਏ ਹਨ। ਇਸ ਤਰਾਂ ਦੇ ਪੂਰਨੇ ਪਾਉਣ ਨਾਲ਼ ਸਮੁੱਚੇ ਪੰਜਾਬ ਵਿੱਚ ਜਿੱਥੇ ਸਰੀਰ ਦਾਨ ਦੀ ਇਸ ਲਹਿਰ ਨੂੰ ਬਲ ਮਿਲਦਾ ਹੈ ਉਥੇ ਹੀ ਵੱਖ - ਵੱਖ ਗੈਰ ਵਿਗਿਆਨਕ ਰਸਮਾਂ ਅਤੇ ਬੇਲੋੜੇ ਖਰਚਿਆਂ ਨੂੰ ਵੀ ਠੱਲ ਪੈਂਦੀ ਹੈ। ਸ੍ਰੀ ਬਡਾਲਾ ਦੀ ਇਸ ਸੋਚ ਦੀ ਉਚੇਚੀ ਸਰਾਹਨਾ ਕਰਦਿਆਂ ਸੀਨੀਅਰ ਤਰਕਸ਼ੀਲ ਆਗੂ ਜਰਨੈਲ ਸਹੌੜਾਂ, ਪੀ ਪੀ ਸਿੰਘ, ਰਾਮ ਕ੍ਰਿਸਨ ਧੁਨਕੀਆ, ਜਸਪਾਲ ਬਡਾਲਾ, ਸਿਕੰਦਰ ਸਿੰਘ ਕੋਰਾ, ਬਿਕਰਮਜੀਤ ਸੋਨੀ ,ਜਗਵਿੰਦਰ ਸਿੰਬਲਮਾਜਰਾ ਅਤੇ ਹਰਜਿੰਦਰ ਸਿੰਘ ਨੇ ਕਿਹਾ ਕਿ ਇਸਤਰ੍ਹਾਂ ਦੇ ਸਾਦ - ਮੁਰਾਦੇ ਸੋਗ ਸਮਾਗਮਾਂ ਦੀ ਪਿਰਤ ਪਾਉਣੀ ਆਪਣੇ ਆਪ ਵਿੱਚ ਹੀ ਸੋਨੇ ’ਤੇ ਸੁਹਾਗੇ ਵਾਲ਼ੀ ਗੱਲ ਹੈ।