ਮੋਰਿੰਡਾ : ਖਾਲਸਾ ਗਰਲਜ਼ ਕਾਲਜ ਰੋਡ, ਮੋਰਿੰਡਾ ਦੇ ਦੁਕਾਨਦਾਰਾਂ ਨੇ ਸੀਵਰੇਜ ਦੇ ਚੱਲ ਰਹੇ ਕੰਮ ਕਾਰਨ ਪੈਦਾ ਹੋਈਆਂ ਮੁਸ਼ਕਿਲਾਂ ਨੂੰ ਲੈ ਕੇ ਅੱਜ ਐਸ.ਡੀ.ਐਮ. ਮੋਰਿੰਡਾ ਨੂੰ ਮੰਗ ਪੱਤਰ ਸੌਂਪਿਆ। ਦੁਕਾਨਦਾਰਾਂ ਨੇ ਪ੍ਰਸ਼ਾਸਨ ਤੋਂ ਕੰਮ ਦੀ ਸਮਾਂ-ਸੀਮਾ ਸਪਸ਼ਟ ਕਰਨ ਅਤੇ ਰਾਹਤ ਦੇਣ ਦੀ ਮੰਗ ਕੀਤੀ ਹੈ। ਮੰਗ ਪੱਤਰ ਦੀਆਂ ਕਾਪੀਆਂ ਹਲਕਾ ਵਿਧਾਇਕ ਅਤੇ ਡਿਪਟੀ ਕਮਿਸ਼ਨਰ ਰੂਪਨਗਰ ਨੂੰ ਵੀ ਭੇਜੀਆਂ ਗਈਆਂ ਹਨ। ਮੰਗ ਪੱਤਰ 'ਚ ਦੁਕਾਨਦਾਰਾਂ ਨੇ ਪ੍ਰਸ਼ਾਸਨ ਅੱਗੇ ਕਈ ਮੁੱਦੇ ਉਠਾਏ ਹਨ। ਉਨ੍ਹਾਂ ਨੇ ਸੀਵਰੇਜ ਕੰਮ ਲਈ ਜਾਰੀ ਟੈਂਡਰ ਅਤੇ ਠੇਕੇਦਾਰ ਨਾਲ ਹੋਏ ਇਕਰਾਰਨਾਮੇ ਦੀ ਕਾਪੀ ਮੁਹੱਈਆ ਕਰਵਾਉਣ ਦੀ ਮੰਗ ਕੀਤੀ ਹੈ, ਤਾਂ ਜੋ ਕੰਮ ਮੁਕੰਮਲ ਹੋਣ ਦੀ ਤੈਅ ਮਿਤੀ ਦਾ ਪਤਾ ਲੱਗ ਸਕੇ। ਦੁਕਾਨਦਾਰਾਂ ਨੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਕਿ ਸੀਵਰੇਜ ਦਾ ਕੰਮ ਮਿੱਥੇ ਸਮੇਂ ਅੰਦਰ ਮੁਕੰਮਲ ਕਰਵਾਇਆ ਜਾਵੇ ਤਾਂ ਜੋ ਗਾਹਕਾਂ, ਆਮ ਲੋਕਾਂ ਅਤੇ ਦੁਕਾਨਦਾਰਾਂ ਨੂੰ ਹੋਰ ਖੱਜਲ-ਖ਼ੁਆਰੀ ਨਾ ਝੱਲਣੀ ਪਵੇ। ਮੰਗ ਪੱਤਰ 'ਤੇ ਵਰਮਾ ਮੋਬਾਈਲ ਰਿਪੇਅਰ, ਦੁਮਨਾ ਸਟੇਸ਼ਨਰਜ਼, ਜੈਨ ਟਰੇਡਰਜ਼, ਕਲਸੀ ਸਟੇਸ਼ਨਰਜ਼, ਸਰਹਿੰਦ ਕਮਿਊਨੀਕੇਸ਼ਨ, ਵੇਰਕਾ ਮਿਲਕ ਬੂਥ ਸਮੇਤ ਦਰਜਨਾਂ ਦੁਕਾਨਦਾਰਾਂ ਅਤੇ ਸਥਾਨਕ ਨਿਵਾਸੀਆਂ ਦੇ ਦਸਤਖਤ ਹਨ।