ਮੋਰਿੰਡਾ : ਸਮਾਜ ਸੇਵੀ ਲੱਖੀ ਸ਼ਾਹ ਨੇ ਨਗਰ ਕੌਂਸਲ ਚੋਣਾਂ ਲੜ ਰਹੇ ਸਾਰੇ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਮਰਥਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਚੋਣਾਂ ਨੂੰ ਸਿਰਫ਼ ਰਾਜਨੀਤਿਕ ਮੁਕਾਬਲਾ ਹੀ ਬਣਾਈ ਰੱਖਣ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਵਿੱਚ ਸ਼ਾਂਤੀ ਅਤੇ ਭਾਈਚਾਰਕ ਸਾਂਝ ਬਰਕਰਾਰ ਰੱਖਣ ਲਈ ਹਰ ਸੰਭਵ ਉਪਰਾਲਾ ਕੀਤਾ ਜਾਵੇ ਤਾਂ ਜੋ ਇਹ ਸਿਆਸੀ ਲੜਾਈ ਨਿੱਜੀ ਜਾਂ ਪਰਿਵਾਰਕ ਦੁਸ਼ਮਣੀ ਵਿੱਚ ਨਾ ਬਦਲੇ ਅਤੇ ਸ਼ਹਿਰ ਵਿੱਚ ਨਫ਼ਰਤ ਦਾ ਮਾਹੌਲ ਪੈਦਾ ਨਾ ਹੋਵੇ। ਲੱਖੀ ਸ਼ਾਹ ਨੇ ਕਿਹਾ ਕਿ ਚੋਣ ਪ੍ਰਚਾਰ ਦੌਰਾਨ ਜੇਕਰ ਕਿਸੇ ਵੀ ਪਾਰਟੀ ਦੇ ਜਾਂ ਆਜ਼ਾਦ ਉਮੀਦਵਾਰ ਕਿਸੇ ਗਲੀ-ਮੁਹੱਲੇ ਵਿੱਚ ਆਹਮੋ-ਸਾਹਮਣੇ ਹੋ ਜਾਣ ਤਾਂ ਉਹ ਇੱਕ-ਦੂਜੇ ਨੂੰ ਗੁੱਸੇ ਨਾਲ ਦੇਖਣ ਦੀ ਬਜਾਏ ਪੂਰਨ ਸਤਿਕਾਰ ਨਾਲ ਪੇਸ਼ ਆਉਣ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਆਗੂਆਂ ਦੇ ਅਜਿਹੇ ਵਤੀਰੇ ਨਾਲ ਹੀ ਵਰਕਰ ਵੀ ਸੰਜਮ ਵਰਤਣਗੇ ਅਤੇ ਸਿਆਸੀ ਲੜਾਈ ਨਿੱਜੀ ਲੜਾਈ ਦਾ ਰੂਪ ਨਹੀਂ ਧਾਰੇਗੀ।
ਉਨ੍ਹਾਂ ਨੌਜਵਾਨਾਂ ਨੂੰ ਵੀ ਸੁਚੇਤ ਕੀਤਾ ਕਿ ਸੋਸ਼ਲ ਮੀਡੀਆ 'ਤੇ ਕੋਈ ਵੀ ਭੜਕਾਊ ਗੱਲ ਜਾਂ ਅਫ਼ਵਾਹ ਸ਼ੇਅਰ ਕਰਨ ਤੋਂ ਪਹਿਲਾਂ ਸੋਚ-ਵਿਚਾਰ ਕਰ ਲੈਣ, ਕਿਉਂਕਿ ਇੱਕ ਗਲਤ ਪੋਸਟ ਨਾਲ ਸਾਰੇ ਸ਼ਹਿਰ ਦਾ ਮਾਹੌਲ ਖ਼ਰਾਬ ਹੋ ਸਕਦਾ ਹੈ। ਲੱਖੀ ਸ਼ਾਹ ਨੇ ਉਮੀਦ ਜਤਾਈ ਕਿ ਸਾਰੇ ਉਮੀਦਵਾਰ ਤੇ ਸ਼ਹਿਰ ਵਾਸੀ ਸ਼ਾਂਤਮਈ ਚੋਣਾਂ ਲਈ ਸਹਿਯੋਗ ਦੇਣਗੇ ਅਤੇ ਸਮਾਣਾ ਦੀ ਭਾਈਚਾਰਕ ਸਾਂਝ ਦੀ ਮਿਸਾਲ ਕਾਇਮ ਰੱਖਣਗੇ।