ਕੋਟਕਪੂਰਾ : ਹਰਲੀਨ ਸ਼ਰਮਾ ਨੇ ਸਿੱਖਿਆ ਦੇ ਸ਼ੋਹਬੇ ’ਚ ਵਿਲੱਖਣ ਪੈੜਾਂ ਸਿਰਜ ਦਿੱਤੀਆਂ ਹਨ। ਹੋਣਹਾਰ ਧੀਆਂ-ਧਿਆਣੀਆਂ ਦੇ ਮਾਣ ’ਚ ਵੀ ਵਾਧਾ ਕੀਤਾ ਹੈ। ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਅੱਜ ਐਲਾਨੇ ਦਸਵੀਂ ਜਮਾਤ ਦੇ ਨਤੀਜਿਆਂ ’ਚ 99.38 ਫੀਸਦੀ ਅੰਕਾਂ ਨਾਲ ਹਰਲੀਨ ਦਾ ਨਾਂਅ ਸੂਚੀ ’ਚ ਸਭ ਤੋਂ ਸਿਖ਼ਰ ’ਤੇ ਸ਼ੁਮਾਰ ਹੋਇਆ ਹੈ। ਉਸ ਨੇ 650 ਅੰਕਾਂ ’ਚੋਂ 646 ਅੰਕ ਹਾਸਿਲ ਕੀਤੇ।ਸਰਸਵਤੀ ਸੀਨੀਅਰ ਸੈਕੰਡਰੀ ਸਕੂਲ ਜੈਤੋ ’ਚ ਤਾਲੀਮ ਹਾਸਿਲ ਕਰ ਰਹੀ ਹਰਲੀਨ ਸ਼ਰਮਾ ਪਿੰਡ ਚੈਨਾ ’ਚ ਰਹਿੰਦੀ ਹੈ। ਇਹ ਪਿੰਡ ਜੈਤੋ ਤੋਂ ਕਰੀਬ ਛੇ ਕਿਲੋਮੀਟਰ ਦੂਰੀ ’ਤੇ ਹੈ। ਮਿਹਨਤਕਸ਼ ਪਰਿਵਾਰ ’ਚ ਜਨਮੀ ਹਰਲੀਨ ਦਾ ਪਿਤਾ ਜਸਵਿੰਦਰ ਕੁਮਾਰ ਸ਼ਰਮਾ ਕਿਸਾਨ ਹੈ ਅਤੇ ਉਸ ਦੇ ਮਾਤਾ ਰੇਣੂੰ ਬਾਲਾ ਘਰੇਲੂ ਇਸਤਰੀ ਹਨ। ਪਰਿਵਾਰ ’ਚ ਹਰਲੀਨ ਦਾ ਛੋਟਾ ਭਰਾ ਰਹਿਮਤ ਸ਼ਰਮਾ ਵੀ ਹੈ, ਜੋ ਛੇਵੀਂ ਜਮਾਤ ’ਚ ਹੈ। ਦੋਵੇਂ ਭੈਣ-ਭਰਾ ਇੱਕੋ ਸਕੂਲ ’ਚ ਪੜ੍ਹਦੇ ਹਨ। ਹਰਲੀਨ ਦੇ ਪਿਤਾ ਜਸਵਿੰਦਰ ਸ਼ਰਮਾ ਨੇ ‘ਪੰਜਾਬੀ ਟ੍ਰਿਬਿਊਨ’ ਨੂੰ ਦੱਸਿਆ ਕਿ ਉਹ ਖੁਦ ਮੈਟਰਿਕ ਤੱਕ ਅਤੇ ਉਨ੍ਹਾਂ ਦੀ ਪਤਨੀ ਸਿਰਫ ਅੱਠਵੀਂ ਜਮਾਤ ਤੱਕ ਪੜ੍ਹੇ ਹਨ। ਉਨ੍ਹਾਂ ਕਿਹਾ ਕਿ ਸਿੱਖਿਆ ਦੇ ਅਜਿਹੇ ਹਾਲਾਤਾਂ ਦੇ ਬਾਵਜੂਦ ਉਨ੍ਹਾਂ ਦੀ ਬੇਟੀ ਤੜਕੇ ਚਾਰ ਵਜੇ ਉੱਠ ਕੇ ਸਕੂਲ ਜਾਣ ਤੱਕ ਪੜ੍ਹਦੀ ਸੀ ਅਤੇ ਰਾਤ ਨੂੰ ਵੀ ਪੜ੍ਹਦਿਆਂ-ਪੜ੍ਹਦਿਆਂ ਉਸ ਨੂੰ ਗਿਆਰਾਂ ਵੱਜ ਜਾਂਦੇ ਸਨ। ਉਨ੍ਹਾਂ ਦੱਸਿਆ ਕਿ ਪੜ੍ਹਾਈ ’ਚ ਹਰਲੀਨ ਬਹੁਤ ਹੁਸ਼ਿਆਰ ਹੈ ਅਤੇ ਉਸ ਨੇ ਪ੍ਰੀਖ਼ਿਆ ਤੋਂ ਤਕਰੀਬਨ ਚਾਰ ਕੁ ਮਹੀਨੇ ਹੀ ਟਿਊਸ਼ਨ ਰੱਖੀ ਸੀ। ਹਰਲੀਨ ਦਾ ਕਹਿਣਾ ਸੀ ਕਿ ਪੜ੍ਹਾਈ ਕਰਨ ਲਈ ਮਾਪਿਆਂ ਵੱਲੋਂ ਉਸ ਨੂੰ ਹਮੇਸ਼ਾ ਪ੍ਰੇਰਣਾ ਅਤੇ ਉਤਸ਼ਾਹ ਮਿਲਦਾ ਰਿਹਾ ਹੈੈ। ਭਵਿੱਖ ਬਾਰੇ ਪੁੱਛੇ ਜਾਣ ’ਤੇ ਉਸ ਨੇ ਕਿਹਾ “ਮਾਪਿਆਂ ਦਾ ਸੁਪਨਾ ਮੇਰੇ ਜੱਜ ਬਣਨ ਦਾ ਹੈ ਅਤੇ ਉਸ ਸੁਪਨੇ ਨੂੰ ਸਾਕਾਰ ਕਰਨ ਲਈ ਮੈਂ ਪੂਰੀ ਵਾਹ ਲਾ ਦੇਵਾਂਗੀ।”
ਇਸ ਦੌਰਾਨ ਹਰਲੀਨ ਦੇ ਸਕੂਲ ਦੀ ਪ੍ਰਿੰਸੀਪਲ ਕੁਸਮ ਕਾਲੜਾ ਅਤੇ ਸਕੂਲ ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਪਵਨ ਗੋਇਲ, ਮਦਨ ਗੋਇਲ, ਰਾਕੇਸ਼ ਰੋਮਾਣਾ ਆਦਿ ਨੇ ਇਸ ਫ਼ਖ਼ਰੀਆ ਪ੍ਰਾਪਤੀ ਦਾ ਸਿਹਰਾ ਹਰਲੀਨ, ਸਕੂਲ ਦੇ ਮਿਹਨਤੀ ਸਟਾਫ਼ ਅਤੇ ਮਾਪਿਆਂ ਨੂੰ ਦਿੰਦਿਆਂ ਸਭਨਾਂ ਨੂੰ ਮੁਬਾਰਕਬਾਦ ਪੇਸ਼ ਕੀਤੀ। ਉਧਰ ਜੈਤੋ ਦੇ ਵਿਧਾਇਕ ਅਮੋਲਕ ਸਿੰਘ ਨੇ ਵੀ ਇਸ ਮਾਣਮੱਤੇ ਹਾਸਿਲ ਦੇ ਲਈ ਹਰਲੀਨ ਅਤੇ ਉਸ ਦੇ ਮਾਤਾ-ਪਿਤਾ ਨੂੰ ਵਧਾਈ ਦਿੱਤੀ।
ਗੌਰਤਲਬ ਹੈ ਕਿ ਕੁੱਝ ਦਿਨ ਪਹਿਲਾਂ ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਅੱਠਵੀਂ ਜਮਾਤ ਦੇ ਐਲਾਨੇ ਗਏ ਨਤੀਜਿਆਂ ’ਚ ਇਸੇ ਸਰਸਵਤੀ ਸੀਨੀਅਰ ਸੈਕੰਡਰੀ ਸਕੂਲ ਜੈਤੋ ਦੀ ਵਿਦਿਆਰਥਣ ਤਮੰਨਾ ਪਰਜਾਪਤੀ ਨੇ 100 ਫੀਸਦੀ ਅੰਕ ਲੈ ਕੇ ਪੰਜਾਬ ਭਰ ’ਚੋਂ ਪਹਿਲਾਂ ਸਥਾਨ ਹਾਸਿਲ ਕੀਤਾ ਸੀ।