ਸਿਰਸਾ : ਸੰਯੁਕਤ ਕਿਸਾਨ ਮੋਰਚਾ ਹਰਿਆਣਾ ਦੇ ਸੱਦੇ ਤੇ ਅੱਜ 11 ਵਜੇ ਤੋਂ ਦੋ ਵਜੇ ਤੱਕ ਮਾਰਕੀਟ ਕਮੇਟੀ ਰਾਣੀਆਂ ਦੇ ਗੇਟ ਅੱਗੇ ਧਰਨਾ ਲਗਾਕੇ ਘਿਰਾਓ ਕੀਤਾ ਤਾਂ ਕਿ ਹਰਿਆਣਾ ਸਰਕਾਰ ਵੱਲੋਂ ਮੰਡੀਆਂ ਵਿਚ ਫਸਲ ਵੇਚਣ ਸਮੇਂ ਲਾਈਆਂ ਬੇਤੁਕੀਆਂ ਸ਼ਰਤਾਂ ਰੱਦ ਕਰਵਾਈਆਂ ਦਾ ਸਕਣ। ਇਸ ਧਰਨੇ ਵਿੱਚ ਕੁੱਲ ਹਿੰਦ ਕਿਸਾਨ ਸਭਾ (1936),ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾ,ਹਰਿਆਣਾ ਕਿਸਾਨ ਮੰਚ ਅਤੇ ਕੁਝ ਹੋਰ ਕਿਸਾਨ ਸੰਗਠਨਾਂ ਦੇ ਕਿਸਾਨ ਸ਼ਾਮਲ ਹੋਏ । ਧਰਨੇ ਨੂੰ ਸੰਬੋਧਨ ਕਰਦਿਆਂ ਹਰਿਆਣਾ ਕਿਸਾਨ ਸਭਾ ਦੇ ਸਰਪ੍ਰਸਤ ਕਾਮਰੇਡ ਸੁਵਰਨ ਸਿੰਘ ਵਿਰਕ ਨੇ ਕਿਹਾ ਕਿ ਤਿੰਨ ਖੇਤੀ ਕਾਨੂੰਨ ਰੱਦ ਕਰਨ ਤੋਂ ਬਾਅਦ ਵੀ ਮੋਦੀ ਸਰਕਾਰ ਵਿੰਗੇ ਟੇਢੇ ਢੰਗ ਨਾਲ ਉਹਨਾ ਕਾਲੇ ਕਾਨੂੰਨਾਂ ਨੂੰ ਮੁੜ ਲਾਗੂ ਕਰਨਾ ਚਾਹੁੰਦੀ ਹੈ। ਫਸਲਾਂ ਦਾ ਪੋਰਟਲ,ਢੋਹਾ ਢੁਆਈ ਦੇ ਵਾਹਨਾਂ ਦੀ ਫੋਟੋਗ੍ਰਾਫੀ ਅਤੇ ਬਾਇਓਮੀਟ੍ਰਿਕ ਪ੍ਰਣਾਲੀ ਦੁਆਰਾ ਸਰਕਾਰ ਮੰਡੀ ਪ੍ਰਣਾਲੀ ਨੂੰ ਠੱਪ ਕਰਕੇ ਅਤੇ ਫਸਲ ਖਰੀਦ ਕਾਰਪੋਰੇਟਾਂ ਦੇ ਹਵਾਲੇ ਕਰਕੇ ਦੇਸ਼ ਅਤੇ ਕਿਸਾਨਾ-ਮਜ਼ਦੂਰਾ ਨੂੰ ਅੰਨ ਥੁੜ ਦੇ ਹਵਾਲੇ ਕਰਕੇ ਭੁੱਖਿਆ ਮਾਰਣ ਤੇ ਤੁਲੀ ਹੋਈ ਹੈ। ਇਸ ਸਮੇਂ ਮਜ਼ਦੂਰਾਂ,ਕਿਸਾਨਾ ਸਮੇਤ ਸਾਰੇ ਸੰਘਰਸ਼ੀ ਤਬਕਿਆਂ ਦੇ ਸਾਂਝੇ ਘੋਲ ਹੀ ਉੱਜਵਲ ਭਵਿੱਖ ਦੇ ਜ਼ਾਮਨ ਹਨ। ਇਸ ਸਮੇ ਹਰਜਿੰਦਰ ਜਿੰਦਾ ਨਾਨੂਆਣਾ,ਹੈਪੀ ਰਾਣੀਆਂ,ਰਘਬੀਰ ਸਿੰਘ,ਬਗੀਚਾ ਸਿੰਘ,ਬਲਰਾਜ ਸਿੰਘ ਵਣੀ,ਪ੍ਰੀਤਪਾਲ ਸਿੱਧੂ,ਸਤਨਾਮ ਚੰਦ,ਹੰਸਰਾਜ ਮੱਤੂਵਾਲਾ,ਭਾਈ ਬਲਜਿੰਦਰ ਸਿੰਘ,ਕਾਮਰੇਡ ਕਸ਼ਮੀਰ ਸਿੰਘ ਅਤੇ ਗੁਰਮੇਲ ਸਿੰਘ ਆਦਿ ਨੇ ਵੀ ਇਨ੍ਹਾਂ ਲੋਕ ਵਿਰੋਧੀ ਸ਼ਰਤਾਂ ਨੂੰ ਤੁਰੰਤ ਵਾਪਸ ਲੈਣ ਦੀ ਮੰਗ ਕੀਤੀ। ਬੁਲਾਰਿਆਂ ਨੇ ਕਿਹਾ ਕਿ ਜੇਕਰ ਸਰਕਾਰ ਨੇ ਇਹ ਸ਼ਰਤਾ ਜਲਦੀ ਨਾ ਹਟਾਈਆਂ ਤਾਂ ਲੰਬਾ ਸੰਘਰਸ਼ ਵਿੱਢਿਆ ਜਾਵੇਗਾ। ਇਸ ਮੌਕੇ ਮੰਡੀਆਂ ਵਿੱਚੋਂ ਕਣਕ ਜਲਦੀ ਚੁੱਕਣ,ਕਿਸਾਨਾਂ ਨੂੰ ਜਲਦੀ ਅਦਾਇਗੀ ਕਰਨ ਅਤੇ ਸੰਘਰਸ਼ ਕਰ ਰਹੇ ਫਾਇਰ ਬ੍ਰਿਗੇਡ ਕਰਮਚਾਰੀਆਂ ਦੀਆਂ ਮੰਗਾਂ ਮੰਨੇ ਜਾਣ ਦੀ ਮੰਗ ਵੀ ਕੀਤੀ ਗਈ। ਇਸ ਮੌਕੇ ਲਛਮਣ ਸਿੰਘ ਸੇਖਾਵਤ,ਬਲਦੇਵ ਸਿੰਘ ਬਰਾੜ,ਹਰਦੇਵ ਜੋਸ਼,ਹਰਜਿੰਦਰ ਸਿੰਘ ਭੰਗੂ,ਗੁਰਨਾਮ ਸਿੰਘ ਝੱਬਰ,ਧੰਨਾਂ ਸਿੰਘ ਦਮਦਮਾ,ਬੂਟਾ ਸਿੰਘ ਥਿੰਦ ਸਮੇਤ ਵੱਡੀ ਗਿਣਤੀ ਵਿੱਚ ਕਿਸਾਨ ਹਾਜ਼ਰ ਸਨ।