ਕਿਹਾ, ਅਕਾਲੀ ਦਲ ਦੀ ਚੜ੍ਹਤ ਤੋਂ ਡਰੇ ਕਾਂਗਰਸੀ
ਮਾਲੇਰਕੋਟਲਾ : ਸਥਾਨਕ ਨਗਰ ਕੌਂਸਲ ਚੋਣਾਂ ਲੜ ਰਹੇ ਸ਼੍ਰੋਮਣੀ ਅਕਾਲੀ ਦਲ ਦੇ ਉਮੀਦਵਾਰਾਂ ਦੇ ਇਕ ਵਫ਼ਦ ਨੇ ਸ਼੍ਰੋਮਣੀ ਅਕਾਲੀ ਦਲ ਦੇ ਜਨਰਲ ਸਕੱਤਰ ਅਤੇ ਹਲਕਾ ਇੰਚਾਰਜ ਬੀਬਾ ਜ਼ਾਹਿਦਾ ਸੁਲੇਮਾਨ ਨਾਲ ਇਕ ਹੰਗਾਮੀ ਮੀਟਿੰਗ ਕੀਤੀ ਜਿਸ ਵਿਚ ਵੱਖ-ਵੱਖ ਵਾਰਡਾਂ ਵਿਚ ਚੱਲ ਰਹੀ ਪ੍ਰਚਾਰ ਮੁਹਿੰਮ ਦੀ ਸਮੀਖਿਆ ਕੀਤੀ ਗਈ। ਨੌਜੁਆਨ ਆਗੂਆਂ ਨੇ ਆਖਿਆ ਕਿ ਸਮੁੱਚਾ ਹਲਕਾ ਨਗਰ ਕੌਂਸਲ ਚੋਣਾਂ ਵਿਚ ਸ਼੍ਰੋਮਣੀ ਅਕਾਲੀ ਦਲ ਨੂੰ ਜਿਤਾਉਣ ਲਈ ਤਿਆਰ ਬੈਠਾ ਹੈ। ਹਰ ਕੋਈ ਚਾਹੁੰਦਾ ਹੈ ਕਿ ਨੌਜੁਆਨ ਨਗਰ ਕੌਂਸਲ ਚੋਣਾਂ ਜਿੱਤਣ ਅਤੇ ਜਿੱਤਣ ਤੋਂ ਬਾਅਦ ਨਗਰ ਕੌਂਸਲ ਦਾ ਪੈਸਾ ਖਾ ਰਹੇ ਲੀਡਰਾਂ ਤੋਂ ਪਾਈ-ਪਾਈ ਦਾ ਹਿਸਾਬ ਲੈਣ। ਆਗੂਆਂ ਨੇ ਕਿਹਾ ਕਿ ਕਾਂਗਰਸ ਨੇ ਅਪਣੇ ਰਾਜ ਦੌਰਾਨ ਕੋਈ ਲੋਕ-ਪੱਖੀ ਕੰਮ ਨਹੀਂ ਕੀਤਾ ਸਗੋਂ ਅਪਣੇ ਹੀ ਪਰਿਵਾਰ ਦੀ ਸਿਆਸੀ ਲੜਾਈ ਲੜੀ ਹੈ। ਕਦੇ ਡੀ.ਜੀ.ਪੀ. ਬਣਨ ਦੀ ਲੜਾਈ ਲੜੀ ਗਈ, ਕਦੇ ਮੰਤਰੀ ਬਣਨ ਦੀ ਲੜਾਈ ਲੜੀ ਗਈ ਅਤੇ ਕਦੇ ਆਪਣੀ ਨੂੰਹ ਨੂੰ ਪੰਜਾਬ ਵਕਫ਼ ਬੋਰਡ ਦਾ ਚੇਅਰਪਰਸਨ ਬਣਾਉਣ ਦੀ ਲੜਾਈ ਲੜੀ ਗਈ। ਜੇ ਇਹ ਨਿੱਜੀ ਲੜਾਈਆਂ ਨਾ ਲੜੀਆਂ ਜਾਂਦੀਆਂ ਤਾਂ ਹਲਕਾ ਬਹੁਤ ਤਰੱਕੀ ਕਰ ਸਕਦਾ ਸੀ। ਹਲਕਾ ਨਿੱਜੀ ਸਿਆਸੀ ਲੜਾਈ ਦੀ ਭੇਂਟ ਚੜ੍ਹ ਗਿਆ। ਪਿਛਲੇ ਚਾਰ ਸਾਲ ਵਿਚ ਆਮ ਆਦਮੀ ਪਾਰਟੀ ਨੇ ਵੀ ਕੁੱਝ ਨਹੀਂ ਕੀਤਾ। ਇਸ ਲਈ ਲੋਕ ਸਖ਼ਤ ਨਾਰਾਜ਼ ਹਨ ਅਤੇ ਅਪਣੀ ਖੇਤਰੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਨੂੰ ਜਿਤਾਉਣਾ ਚਾਹੁੰਦੇ ਹਨ। ਨੌਜਵਾਨ ਆਗੂਆਂ ਨੇ ਕੁੱਝ ਕਾਂਗਰਸੀਆਂ ਵਲੋਂ ਬੀਬਾ ਜ਼ਾਹਿਦਾ ਸੁਲੇਮਾਨ ਵਿਰੁਧ ਭੰਡੀ-ਪ੍ਰਚਾਰ ਕਰਨ ਦਾ ਗੰਭੀਰ ਦਾ ਨੋਟਿਸ ਲਿਆ ਅਤੇ ਮਾਲੇਰਕੋਟਲਾ ਵਿਚ ਗੰਦੀ ਸਿਆਸਤ ਖੇਡਣ ਅਤੇ ਔਰਤਾਂ ਬਾਰੇ ਅਪਸ਼ਬਦ ਵਰਤਣ ਵਾਲਿਆਂ ਵਿਰੁਧ ਨਿੰਦਾ ਮਤਾ ਪਾਸ ਕੀਤਾ। ਨੌਜੁਆਨ ਆਗੂਆਂ ਨੇ ਚੇਤਾਵਨੀ ਦਿੰਦਿਆਂ ਆਖਿਆ ਕਿ ਹੁਣ ਉਹ ਸਮਾਂ ਲੰਘ ਚੁੱਕਾ ਹੈ ਕਿ ਮਹਿਲਾਂ ਵਿਚ ਬੈਠ ਕੇ ਲੋਕਾਂ ਨੂੰ ਡਰਾ-ਧਮਕਾ ਕੇ ਜਾਂ ਝੂਠ ਫੈਲਾਅ ਕੇ ਵੋਟਾਂ ਲੈ ਲਈਆਂ ਜਾਂਦੀਆਂ ਸਨ। ਉਹ ਹੁਣ ਮਾਲੇਰਕੋਟਲਾ ਵਿਚ ਗੁਮਰਾਹਕੁਨ ਸਿਆਸਤ ਖੇਡਣ ਵਾਲਿਆਂ ਨੂੰ ਮੂੰਹ-ਤੋੜ ਜਵਾਬ ਦੇਣਗੇ। ਆਗੂਆਂ ਨੇ ਕਿਹਾ ਕਿ ਅਸਲ ਵਿਚ ਕਾਂਗਰਸੀ ਅਤੇ ਝਾੜੂ ਪਾਰਟੀ ਬਲਾਕ ਸੰਮਤੀ ਚੋਣਾਂ ਵਿਚ ਅਕਾਲੀ ਦਲ ਦੀ ਜਿੱਤ ਤੋਂ ਡਰ ਚੁੱਕੀ ਹੈ। ਵਿਰੋਧੀ ਪਾਰਟੀਆਂ ਨੂੰ ਅਹਿਸਾਸ ਹੋ ਚੁੱਕਾ ਹੈ ਕਿ ਨਗਰ ਕੌਂਸਲ ਚੋਣਾਂ ਵਿਚ ਅਕਾਲੀ ਦਲ ਸਾਰੀਆਂ ਸੀਟਾਂ ਜਿੱਤਣ ਜਾ ਰਿਹਾ ਹੈ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਡਾ. ਮੁਹੰਮਦ ਮੁਸ਼ਤਾਕ, ਅਬਦੁਲ ਹਮੀਦ ਲਾਲਾ, ਸ. ਹਰਵਿੰਦਰ ਸਿੰਘ ਟਿਵਾਣਾ, ਪੰਕਜ ਗਿੱਲ, ਬੀਬੀ ਰੁਖ਼ਸ਼ੰਦਾ ਸੋਨੀ, ਮੁਹੰਮਦ ਸ਼ਹਿਬਾਜ਼, ਮੁਹੰਮਦ ਜਮੀਲ ਅਤੇ ਹੋਰ ਕਈ ਨੇਤਾ ਹਾਜ਼ਰ ਸਨ।