ਸੁਨਾਮ ਪੁੱਜਾ ਨੌਜਵਾਨਾਂ ਦਾ ਸਦਭਾਵਨਾ ਕਾਫ਼ਲਾ  

 

 

ਸੁਨਾਮ : ਦੇਸ਼ ਭਰ ਤੋਂ 26 ਰਾਜਾਂ ਦੇ 366 ਨੌਜਵਾਨ ਲੜਕੇ-ਲੜਕੀਆਂ ਦਾ ਸਦਭਾਵਨਾ ਕਾਫ਼ਲਾ ਸ਼ਹੀਦ ਊਧਮ ਸਿੰਘ ਨੂੰ ਸ਼ਰਧਾਂਜਲੀ ਦੇਣ ਲਈ ਸੁਨਾਮ ਪਹੁੰਚਿਆ। ਸਦਭਾਵਨਾ ਕਾਫ਼ਲੇ ਦੌਰਾਨ ਨੌਜਵਾਨਾਂ ਨੇ 'ਜੋੜੋ-ਜੋੜੋ-ਭਾਰਤ ਜੋੜੋ, 'ਹਮ ਸਭ ਕੀ ਕਾਮਨਾ-ਸਦਭਾਵਨਾ ਸਦਭਾਵਨਾ, ਸੁਨਾਮ ਹੋ ਜਾਂ ਗੋਹਾਟੀ-ਅਪਣਾ ਦੇਸ਼ ਆਪਣੀ ਮਾਟੀ ਅਤੇ ਕਸ਼ਮੀਰ ਹੋ ਜਾਂ ਕੰਨਿਆ ਕੁਮਾਰੀ, ਭਾਰਤ ਮਾਤਾ-ਏਕ ਹਮਾਰੀ ' ਜਿਹੇ ਨਾਅਰੇ ਲਾਉਂਦਿਆਂ ਸਾਂਝੀਵਾਲਤਾ ਦਾ ਸੰਦੇਸ਼ ਦਿੱਤਾ। ਇਹ ਨੌਜਵਾਨ ਨੈਸ਼ਨਲ ਯੂਥ ਪ੍ਰੋਜੈਕਟ ਦੇ ਫਾਊਂਡਰ, ਉੱਘੇ ਗਾਂਧੀਵਾਦੀ ਸਮਾਜ ਸੁਧਾਰਕ, ਪਦਮਸ਼੍ਰੀ ਡਾ. ਐਸ ਐਨ ਸੂਬਾ ਰਾਓ ਦੇ 97ਵੇਂ ਜਨਮਦਿਨ ਮੌਕੇ ਦੇਸ਼ ਦੀ ਏਕਤਾ ਅਤੇ ਅਖੰਡਤਾ ਬਰਕਰਾਰ ਰੱਖਣ, ਸ਼ਾਂਤੀ ਦਾ ਪ੍ਰਚਾਰ, ਅਤੇ ਭਾਈਚਾਰਕ ਸਾਂਝ ਮਜ਼ਬੂਤ ਕਰਨ ਦੇ ਸੱਦੇ ਨਾਲ ਨੈਸ਼ਨਲ ਯੂਥ ਪ੍ਰੋਜੈਕਟ ਦਾ ਯੁਵਾ ਕੈਂਪ ਲਾਉਣ ਪੰਜਾਬ ਆਏ ਹੋਏ ਹਨ। ਇਹਨਾਂ ਨੌਜਵਾਨਾਂ ਨੇ ਨੈਸ਼ਨਲ ਯੂਥ ਪ੍ਰੋਜੈਕਟ, ਨਵੀਂ ਦਿੱਲੀ ਦੇ ਸਕੱਤਰ ਅਤੇ ਫਾਊਂਡਰ ਟਰੱਸਟੀ ਰਣ ਸਿੰਘ ਪਰਮਾਰ, ਮਧੂਸੂਧਨ ਦਾਸ, ਕਰਿਆਲ ਸੁਕਾਮਰਨ, ਧਰਮਿੰਦਰ ਭਾਈ, ਵਿਨੈ ਗੁਪਤਾ, ਸ਼ੀਤਲ ਜੈਨ, ਭਾਰਤ ਕੀ ਸੰਤਾਨ ਪ੍ਰੋਗਰਾਮ ਦੇ ਡਾਇਰੈਕਟਰ ਨਰਿੰਦਰ ਭਾਈ ਅਤੇ ਸੀਬਾ ਸਕੂਲ, ਲਹਿਰਾਗਾਗਾ ਦੇ ਪ੍ਰਬੰਧਕ ਕੰਵਲਜੀਤ ਸਿੰਘ ਢੀਂਡਸਾ ਦੀ ਅਗਵਾਈ ਹੇਠ ਸ਼ਹੀਦ ਊਧਮ ਸਿੰਘ ਦੇ ਸਮਾਰਕ 'ਤੇ ਪਹੁੰਚਕੇ ਸ਼ਰਧਾਂਜ਼ਲੀ ਦਿੱਤੀ।  ਸੁਨਾਮ ਤੋਂ ਭਾਰਤ ਭੂਸ਼ਣ, ਪ੍ਰਿੰਸੀਪਲ ਅਨਿਲ ਕੁਮਾਰ ਜੈਨ, ਕੰਵਰਜੀਤ ਸਿੰਘ ਲੱਕੀ ਧਾਲੀਵਾਲ ਅਤੇ ਗੁਰਿੰਦਰ ਸਿੰਘ ਕੁੱਕੂ ਗਰੇਵਾਲ ਨੇ ਕਾਫ਼ਲੇ ਦਾ ਸਵਾਗਤ ਕੀਤਾ। ਉਹਨਾਂ ਨੇ ਨੌਜਵਾਨਾਂ ਨੂੰ ਮਿਊਜ਼ੀਅਮ ਦਿਖਾਉਂਦੇ ਹੋਏ ਸ਼ਹੀਦ ਊਧਮ ਸਿੰਘ ਦੀ ਕੁਰਬਾਨੀ ਬਾਰੇ ਜਾਣੂ ਕਰਵਾਇਆ। ਪ੍ਰਬੰਧਕਾਂ ਨੇ ਦੱਸਿਆ ਕਿ ਨੈਸ਼ਨਲ ਯੂਥ ਕੈਂਪ ਦੇਸ਼ ਭਰ ਦੇ ਨੌਜਵਾਨਾਂ ਨੂੰ ਹੋਰਨਾਂ ਸੂਬਿਆਂ ਦੀਆਂ ਭਾਸ਼ਾਵਾਂ ਸਿੱਖਣ ਅਤੇ ਸੱਭਿਆਚਾਰ ਸਮਝਣ ਲਈ ਸਾਰਥਿਕ ਮੰਚ ਬਣਿਆ ਹੈ। ਉਹਨਾਂ ਕਿਹਾ ਕਿ ਨੌਜਵਾਨਾਂ ਅੰਦਰ ਮਨੁੱਖਤਾ, ਕੁਦਰਤ ਅਤੇ ਕਲਾ 'ਚ ਰੁਚੀ ਜਾਗੇਗੀ ਅਤੇ ਵਧੀਆ ਇਨਸਾਨ ਬਣਗੇ।