ਸੰਦੌੜ : ਪੰਜਾਬ ਸਰਕਾਰ ਦੇ ਪੰਚਾਇਤ ਵਿਭਾਗ ਵੱਲੋਂ ਪੰਚਾਇਤ ਬਲਾਕ ਸਮਿਤੀ ਮਾਲੇਰਕੋਟਲਾ ਦੇ ਜਾਰੀ ਗਜ਼ਟ ਨੋਟੀਫਿਕੇਸ਼ਨ ਵਿੱਚ ਇਕ ਪਿੰਡ ਨੂੰ ਦੋ ਚੋਣ ਹਲਕਿਆਂ ਵਿੱਚ ਸ਼ਾਮਲ ਕਰਕੇ ਅਧਿਕਾਰੀਆਂ ਦੀ ਕਾਰਗੁਜ਼ਾਰੀ 'ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਗਏ ਹਨ। ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਪੰਜਾਬ ਵੱਲੋਂ ਪੰਚਾਇਤ ਸਮਿਤੀ ਮਾਲੇਰਕੋਟਲਾ ਦੇ 15 ਚੋਣ ਹਲਕਿਆਂ ਸਬੰਧੀ ਜਾਰੀ ਗਜ਼ਟ ਨੋਟੀਫਿਕੇਸ਼ਨ ਮੁਤਾਬਕ ਚੋਣ ਹਲਕਾ ਭੂਦਨ ਵਿੱਚ ਭੂਦਨ, ਤੱਖ਼ਰ ਕਲਾਂ ਅਤੇ ਸਿਕੰਦਰਪੁਰਾ ਪਿੰਡ ਸ਼ਾਮਲ ਕੀਤੇ ਗਏ ਹਨ ਜਦਕਿ ਇਸੇ ਨੋਟੀਫਿਕੇਸ਼ਨ ਵਿੱਚ ਚੋਣ ਹਲਕਾ ਮੁਬਾਰਕਪੁਰ ਚੂੰਘਾਂ ਵਿਚ ਮੁਬਾਰਕਪੁਰ ਚੂੰਘਾਂ, ਫਰੀਦਪੁਰ ਕਲਾਂ, ਆਹਨਖੇੜੀ, ਬਹਾਦਰਗੜ੍ਹ ਅਤੇ ਰੁੜਕਾ ਪਿੰਡਾਂ ਦੇ ਨਾਲ ਪਿੰਡ ਤੱਖਰ ਕਲਾਂ ਨੂੰ ਮੁੜ ਸ਼ਾਮਲ ਕਰ ਦਿੱਤਾ ਗਿਆ ਹੈ। ਜਾਣਕਾਰੀ ਮੁਤਾਬਿਕ ਨੋਟੀਫਿਕੇਸ਼ਨ ਤੋਂ ਪਹਿਲਾਂ ਸਥਾਨਕ ਪੰਚਾਇਤ ਅਧਿਕਾਰੀਆਂ ਵੱਲੋਂ ਪਿੰਡਾਂ ਦੀਆਂ ਵੋਟਾਂ ਦੀ ਗਿਣਤੀ ਦੇ ਆਧਾਰ 'ਤੇ ਚੋਣ ਹਲਕਿਆਂ ਦੀ ਹੱਦਬੰਦੀ ਦਾ ਖਾਕਾ ਤਿਆਰ ਕਰਨ ਉਪਰੰਤ ਉੱਚ ਅਧਿਕਾਰੀਆਂ ਨੂੰ ਭੇਜਿਆ ਜਾਂਦਾ ਹੈ। ਪੰਚਾਇਤ ਸਮਿਤੀ ਮਾਲੇਰਕੋਟਲਾ ਦੇ 15 ਚੋਣ ਹਲਕਿਆਂ ਸਬੰਧੀ ਜਾਰੀ ਗਜ਼ਟ ਨੋਟੀਫਿਕੇਸ਼ਨ ਮੁਤਾਬਕ ਮਹੌਲੀ ਕਲਾਂ ਜ਼ੋਨ ਵਿਚ ਪਿੰਡ ਮਹੋਲੀ ਕਲਾਂ, ਮਹੋਲੀ ਖੁਰਦ ਤੇ ਫਰਵਾਲੀ, ਜ਼ੋਨ ਝੁਨੇਰ ਵਿੱਚ ਪਿੰਡ ਝੁਨੇਰ, ਬਿਸ਼ਨਗੜ੍ਹ ਤੇ ਨੱਥੋਹੇੜੀ ਅਤੇ ਜ਼ੋਨ ਖੁਰਦ ਵਿੱਚ ਪਿੰਡ ਖੁਰਦ, ਅਬਦੁੱਲਾਪੁਰ, ਦੁੱਲਮਾਂ ਕਲਾਂ ਤੇ ਕਾਸਮਪੁਰ ਪਿੰਡ ਸ਼ਾਮਲ ਕੀਤੇ ਗਏ ਹਨ। ਪੰਚਾਇਤ ਸਮਿਤੀ ਜ਼ੋਨ ਦਸੌਂਧਾ ਸਿੰਘ ਵਾਲਾ ਵਿਚ ਪਿੰਡ ਦਸੌਂਧਾ ਸਿੰਘ ਵਾਲਾ, ਬਾਪਲਾ ਤੇ ਮਿੱਠੇਵਾਲ ਜਦਕਿ ਜ਼ੋਨ ਫਿਰੋਜ਼ਪੁਰ ਕੁਠਾਲਾ ਵਿੱਚ ਪਿੰਡ ਫਿਰੋਜ਼ਪੁਰ ਕੁਠਾਲਾ ਤੇ ਸ਼ੇਰਗੜ੍ਹ ਚੀਮਾ ਹੋਣਗੇ। ਜ਼ੋਨ ਕਸਬਾ ਭਰਾਲ ਵਿਚ ਪਿੰਡ ਕਸਬਾ ਭਰਾਲ, ਮਾਣਕੀ ਤੇ ਜਲਵਾਣਾ ਅਤੇ ਜ਼ੋਨ ਸੰਦੌੜ ਵਿਚ ਪਿੰਡ ਸੰਦੌੜ, ਕਲਿਆਣ ਤੇ ਫੌਜੇਵਾਲ ਨੂੰ ਰੱਖਿਆ ਗਿਆ ਹੈ। ਜ਼ੋਨ ਹਥਨ ਵਿਚ ਪਿੰਡ ਹਥਨ, ਕੁਰਮ ਤੇ ਬੁਰਜ ਸ਼ਾਮਲ ਕੀਤੇ ਗਏ ਹਨ ਜਦਕਿ ਜ਼ੋਨ ਅਹਿਮਦਪੁਰ ਨਾਲ ਪਿੰਡ ਅਹਿਮਦਪੁਰ, ਮਾਣਕਹੇੜੀ, ਦਰਿਆਪੁਰ ਤੇ ਜਾਤੀਵਾਲ ਨੂੰ ਜੋੜਿਆ ਗਿਆ ਹੈ। ਜ਼ੋਨ ਇਲਤਫਾਤਪੁਰਾ ਇਲਤਫਾਤਪੁਰਾ, ਵਿੱਚ ਹਕੀਮਪੁਰਾ, ਅਖਤਿਆਰਪੁਰਾ, ਸੇਖੂਪੁਰ ਖੁਰਦ, ਸੇਖੂਪਰ ਕਲਾਂ, ਸੁਲਤਾਨਾਪੁਰ ਅਤੇ ਬੁੱਕਣਵਾਲ ਪਿੰਡ ਸ਼ਾਮਲ ਕੀਤੇ ਗਏ ਹਨ ਜਦਕਿ ਜ਼ੋਨ ਸ਼ੇਰਵਾਨੀਕੋਟ ਨਾਲ ਪਿੰਡ ਸ਼ੇਰਵਾਨੀਕੋਟ, ਮਹਿਬੂਬਪੁਰਾ, ਜਾਫਰਾਬਾਦ, ਕੇਲੋਂ ਅਤੇ ਬੀੜ ਸ਼ੇਰਵਾਨੀਕੋਟ ਲਗਾਏ ਗਏ ਹਨ। ਜ਼ੋਨ ਧਨੋ ਵਿਚ ਪਿੰਡ ਧਨੋ, ਮਾਨ ਮਾਜਰਾ, ਅਮਾਮਗੜ੍ਹ, ਢੱਡੇਵਾੜੀ, ਬੀੜ ਅਮਾਮਗੜ੍ਹ ਅਤੇ ਹੁਸੈਨਪੁਰਾ ਸ਼ਾਮਿਲ ਕੀਤੇ ਗਏ ਹਨ ਜਦਕਿ ਜੋਨ ਨੌਧਰਾਣੀ ਨਾਲ ਪਿੰਡ ਨੌਧਰਾਣੀ, ਆਦਮਪਾਲ ਅਤੇ ਪਿੰਡ ਮਦੇਵੀ ਨੂੰ ਲਗਾਇਆ ਗਿਆ ਹੈ।