ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਦੇ ਅਗਲੇ ਮਹੀਨੇ ਸ੍ਰੀਲੰਕਾ ਦੌਰੇ ’ਤੇ ਜਾਣਾ ਹੈ। 20 ਮੈਂਬਰੀ ਟੀਮ ਦੀ ਚੋਣ ਵੀਰਵਾਰ ਰਾਤ ਨੂੰ ਕੀਤੀ ਗਈ ਜਿਸ ਦੀ ਕਪਤਾਨੀ ਅਨੁਭਵੀ ਸਲਾਮੀ ਬੱਲੇਬਾਜ਼ ਸ਼ਿਖਰ ਧਵਨ ਕਰਨਗੇ। ਇਸ ਦੌਰੇ ’ਤੇ ਭਾਰਤੀ ਟੀਮ ਨੂੰ ਤਿੰਨ ਇਕ ਰੋਜ਼ਾ ਤੇ ਇੰਨੇ ਹੀ ਟੀ-20 ਮੁਕਾਬਲਿਆਂ ਦੀ ਲੜੀ ’ਚ ਖੇਡਣਾ ਹੈ। 14 ਜੂਨ ਤੋਂ ਦੌਰੇ ’ਤੇ ਜਾਣ ਵਾਲੀ ਟੀਮ ਦੇ ਖਿਡਾਰੀਆਂ ਦਾ ਕੁਆਰੰਟਾਈਨ ਸ਼ੁਰੂ ਹੋਵੇਗਾ।
ਧਵਨ ਦੀ ਕਪਤਾਨੀ ’ਚ ਪਹਿਲੀ ਵਾਰ ਖੇਡਣ ਵਾਲੀ ਟੀਮ ਸ੍ਰੀਲੰਕਾ ਦੌਰੇ ਲਈ ਤਿਆਰ ਹੈ। ਸਾਰੇ ਖਿਡਾਰੀ ਇਸ ਦੌਰੇ ਤੋਂ ਪਹਿਲਾਂ ਜਾਣਕਾਰੀ ਅਨੁਸਾਰ ਚੇਨਈ ’ਚ 14 ਦਿਨ ਦਾ ਕੁਆਰੰਟਾਈਨ ਲਈ ਜਮ੍ਹਾਂ ਹੋਣਗੇ। ਟੀਮ ਦੇ 20 ਖਿਡਾਰੀਆਂ ਸਣੇ ਗੇਂਦਬਾਜ਼ਾਂ ਨੂੰ ਪਹਿਲਾਂ 7 ਦਿਨ ਹਾਈ ਕੁਆਰੰਟਾਈਨ ’ਚ ਰਹਿਣਾ ਪਵੇਗਾ। ਇਸ ਤੋਂ ਬਾਅਦ ਅਗਲੇ 7 ਦਿਨ ਟੀਮ ਸਾਫ਼ਟ ਕੁਆਰੰਟਾਈਨ ’ਚ ਰਹੇਗੀ। ਟੀਮ ਇੰਡੀਆ ਨੂੰ ਸ੍ਰੀਲੰਕਾ ਲਈ 28 ਜੂਨ ਨੂੰ ਰਵਾਨਾ ਹੋਣਾ ਹੈ।
ਕੋਰੋਨਾ ਕਾਲ ਤੋਂ ਪਹਿਲਾਂ ਵਿਦੇਸ਼ੀ ਦੌਰੇ ’ਤੇ ਭਾਰਤੀ ਟੀਮ ਨੂੰ ਲੋਕਲ ਜਾਂ ਏ ਟੀਮ ਦੇ ਨਾਲ ਪ੍ਰੈਕਟਿਸ ਮੈਚ ਖੇਡਣ ਦਾ ਮੌਕਾ ਮਿਲਦਾ ਸੀ। ਇਸ ਨਾਲ ਲੜੀ ਤੋਂ ਪਹਿਲਾਂ ਮਾਹੌਲ ’ਚ ਢਲਣ ’ਚ ਟੀਮ ਨੂੰ ਮਦਦ ਮਿਲਦੀ ਸੀ। ਕੋਰੋਨਾ ਦੀ ਵਜ੍ਹਾ ਨਾਲ ਭਾਰਤੀ ਟੀਮ ਆਪਸ ’ਚ ਹੀ ਟੀਮ ਬਣਾ ਕੇ ਮੈਚ ਪ੍ਰੈਕਟਿਸ ਕਰੇਗੀ।