ਸੁਨਾਮ : ਡਾਕਟਰੀ ਦੀ ਪੜ੍ਹਾਈ ਕਰਨ ਲਈ ਦਾਖਲਾ ਲੈਣ ਵਾਸਤੇ ਦਿੱਤੀ ਨੀਟ ਪ੍ਰੀਖਿਆ ਵਿੱਚੋਂ 567 ਅੰਕ ਪ੍ਰਾਪਤ ਕਰਕੇ ਸੁਨਾਮ ਦੀ ਰਿਧੀਮਾ ਗੁਪਤਾ ਦੇਸ਼ ਦੇ ਪਹਿਲੇ 6100 ਰੈਂਕ ਵਿੱਚ ਜਗ੍ਹਾ ਬਣਾਉਣ ਵਿੱਚ ਸਫਲ ਰਹੀ ਹੈ। ਆਪਣੀ ਪਹਿਲੀ ਕੋਸ਼ਿਸ਼ ਵਿੱਚ ਸਫਲਤਾ ਪ੍ਰਾਪਤ ਕਰਨ ਵਾਲੀ ਰਿਧੀਮਾ ਗੁਪਤਾ ਨੇ ਸਵੈ-ਅਧਿਐਨ ਕੀਤਾ ਹੈ। ਰਿਧੀਮਾ ਗੁਪਤਾ ਦੇ ਮਾਤਾ-ਪਿਤਾ ਪੇਸ਼ੇ ਵਜੋਂ ਦੋਵੇਂ ਡਾਕਟਰ ਹਨ। ਉਸਦੇ ਪਿਤਾ ਡਾਕਟਰ ਜੌਨੀ ਗੁਪਤਾ ਐਮ ਡੀ ਮੈਡੀਸਨ ਅਤੇ ਮਾਤਾ ਡਾਕਟਰ ਮੋਨਿਕਾ ਗੋਇਲ ਨੇ ਦੱਸਿਆ ਕਿ ਰਿਧੀਮਾ ਨੇ ਦਿਨ-ਰਾਤ ਪੜ੍ਹਾਈ ਕਰਕੇ ਆਪਣਾ ਟੀਚਾ ਪ੍ਰਾਪਤ ਕੀਤਾ ਹੈ। ਰਿਧੀਮਾ ਨੇ ਪੜ੍ਹਾਈ ਪ੍ਰਤੀ ਸਮਰਪਣ ਦੇ ਆਧਾਰ 'ਤੇ ਵਧੀਆ ਪ੍ਰਦਰਸ਼ਨ ਕੀਤਾ ਹੈ। ਇਸ ਮੌਕੇ 'ਤੇ ਰਿਧੀਮਾ ਗੁਪਤਾ ਨੇ ਕਿਹਾ ਕਿ ਉਹ ਭਵਿੱਖ ਵਿੱਚ ਰੇਡੀਓਲੋਜਿਸਟ ਬਣ ਕੇ ਮਰੀਜ਼ਾਂ ਦੀ ਸੇਵਾ ਕਰਨਾ ਚਾਹੁੰਦੀ ਹੈ। ਉਸਨੇ ਆਖਿਆ ਕਿ ਇਨਸਾਨ ਨੂੰ ਆਪਣੇ ਵੱਲੋਂ ਸੰਜੋਏ ਸੁਪਨਿਆਂ ਨੂੰ ਸਾਕਾਰ ਕਰਨ ਲਈ ਸਖ਼ਤ ਮਿਹਨਤ ਕਰਨੀ ਚਾਹੀਦੀ ਹੈ।