ਸੁਨਾਮ : ਭਾਜਪਾ ਦੀ ਸੂਬਾ ਸਕੱਤਰ ਦਾਮਨ ਬਾਜਵਾ ਨੇ ਸੁਨਾਮ ਵਿਧਾਨ ਸਭਾ ਹਲਕੇ ਵਿੱਚੋਂ ਲੰਘਦੀਆਂ ਡਰੇਨਾਂ ਦੀ ਸਫ਼ਾਈ ਦਾ ਮੁੱਦਾ ਚੁੱਕਿਆ। ਉਨ੍ਹਾਂ ਆਖਿਆ ਕਿ ਸਰਹਿੰਦ ਚੋਅ ਅਤੇ ਲੌਂਗੋਵਾਲ ਨੇੜਿਓਂ ਲੰਘਦੀ ਡਰੇਨ ਦੇ ਵਿੱਚ ਖੜ੍ਹੀ ਬੂਟੀ ਬਰਸਾਤਾਂ ਦੇ ਦਿਨਾਂ ਵਿੱਚ ਲੋਕਾਂ ਲਈ ਸਿਰਦਰਦੀ ਬਣੇਗੀ। ਭਾਜਪਾ ਦੀ ਸੂਬਾ ਸਕੱਤਰ ਦਾਮਨ ਬਾਜਵਾ ਨੇ ਆਖਿਆ ਕਿ ਸੂਬੇ ਦੀ ਸਰਕਾਰ ਅਤੇ ਪ੍ਰਸ਼ਾਸਨ ਨੇ ਸਰਹਿੰਦ ਚੋਅ ਵਿੱਚ ਬਰਸਾਤਾਂ ਦੇ ਦਿਨਾਂ ਦੌਰਾਨ ਪਿਛਲੇ ਸਾਲ ਆਏ ਪਾਣੀ ਨਾਲ ਲੋਕਾਂ ਦੇ ਹੋਏ ਨੁਕਸਾਨ ਤੋਂ ਸਬਕ ਨਹੀਂ ਸਿੱਖਿਆ।
ਸੁਨਾਮ-ਸੰਗਰੂਰ ਰੋਡ ਤੇ ਪੈਂਦੇ ਸਰਹਿੰਦ ਚੋਅ ਤੇ ਪੁੱਜਕੇ ਦਾਮਨ ਬਾਜਵਾ ਨੇ ਕਿਹਾ ਕਿ ਜੂਨ ਜੁਲਾਈ ਬਰਸਾਤਾਂ ਦੇ ਦਿਨ ਬਿਲਕੁਲ ਨੇੜੇ ਲੱਗ ਗਏ ਹਨ ਹਜੇ ਤੱਕ ਮੋਜੂਦਾ ਪੰਜਾਬ ਸਰਕਾਰ ਅਤੇ ਪ੍ਰਸ਼ਾਸ਼ਨ ਵੱਲੋਂ ਸਰਹਿੰਦ ਚੋਅ ਅਤੇ ਲੌਂਗੋਵਾਲ ਵਾਲੀ ਡਰੇਨ ਦੀ ਸਫਾਈ ਬਾਰੇ ਕੁੱਝ ਵੀ ਨਹੀਂ ਕੀਤਾ ਗਿਆ। ਦਾਮਨ ਬਾਜਵਾ ਨੇ ਕਿਹਾ ਕਿ ਜੂਨ ਮਹੀਨੇ ਬਰਸਾਤ ਦੇ ਮੌਸਮ ਵਿੱਚ ਜਦੋਂ ਪੂਰੇ ਪੰਜਾਬ ਵਿੱਚ ਬਰਸਾਤ ਹੁੰਦੀ ਹੈ ਤਾਂ ਪਿੱਛੋ ਸਾਰਾ ਪਾਣੀ ਇਕੱਠਾ ਹੋਕੇ ਇਸ ਸਰਹਿੰਦੀ ਚੋਅ ਰਾਹੀਂ ਅੱਗੇ ਜਾਂਦਾ ਹੈ ਇਸ ਚੋਅ ਦੀ ਸਫ਼ਾਈ ਨਾ ਹੋਣ ਕਰਕੇ ਇਸ ਵਿੱਚ ਖੜੀ ਘਾਹ ਬੂਟੀ ਪਾਣੀ ਲੰਘਣ ਵਿੱਚ ਰੁਕਾਵਟ ਪੈਦਾ ਕਰਦੀ ਹੈ ਅਤੇ ਪਾਣੀ ਓਵਰ ਫਲੋ ਹੋਕੇ ਹੜਾਂ ਵਰਗੀ ਸਥਿਤੀ ਪੈਂਦਾ ਕਰ ਦਿੰਦਾ ਹੈ। ਜੇਕਰ ਇਸ ਚੋਅ ਅਤੇ ਡਰੇਨ ਦੀ ਸਫਾਈ ਸਮੇਂ ਸਿਰ ਹੋਈ ਹੋਵੇ ਤਾਂ ਪਾਣੀ ਬਿਨਾਂ ਰੁਕਾਵਟ ਅੱਗੇ ਲੰਘਦਾ ਜਾਵੇਗਾ। ਭਾਜਪਾ ਦੀ ਸੂਬਾ ਸਕੱਤਰ ਦਾਮਨ ਬਾਜਵਾ ਨੇ ਕਿਹਾ ਕਿ ਹੁਣ ਤੱਕ ਡਰੇਨਾਂ ਦੀ ਸਫਾਈ ਦਾ ਕੰਮ ਮੁਕੰਮਲ ਹੋ ਜਾਣਾ ਚਾਹੀਦਾ ਸੀ ਕਿਉਂਕਿ ਜਦੋਂ ਮੀੰਹ ਪੈਂਦਾ ਹੈ ਤੇ ਚੋਅ ਵਿੱਚ ਪਾਣੀ ਖੜ ਜਾਂਦਾ ਹੈ ਫਿਰ ਉੱਥੇ ਸਫਾਈ ਨਹੀਂ ਕੀਤੀ ਜਾ ਸਕਦੀ।
ਦਾਮਨ ਬਾਜਵਾ ਨੇ ਸਰਕਾਰ ਦੇ ਨੁਮਾਇੰਦਿਆਂ ਅਤੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਲੋਕਾਂ ਦੀ ਮੁਸ਼ਕਿਲ ਨੂੰ ਧਿਆਨ ਵਿੱਚ ਰੱਖਦਿਆਂ ਡਰੇਨਾਂ ਦੀ ਸਫ਼ਾਈ ਤੁਰੰਤ ਕਾਰਵਾਈ ਜਾਵੇ।
ਇਸ ਮੌਕੇ ਮੱਖਣ ਸ਼ੇਖ ਸਰਪੰਚ ਅਕਾਲਗੜ੍ਹ, ਲਾਲੀ ਸਰਪੰਚ ਚੱਠੇ ਨਕਟੇ, ਹਰਜੀਤ ਸਿੰਘ ਸਾਬਕਾ ਸਰਪੰਚ, ਤਿਰਲੋਕ ਸਿੰਘ ਸਾਬਕਾ ਸਰਪੰਚ, ਗੁਰਸੇਵਕ ਸਿੰਘ ਅਕਾਲਗੜ੍ਹ, ਰਾਣਾ ਕੌਰ ਪੰਚ, ਕਰਨੈਲ ਪੰਚ ਆਦਿ ਹਾਜ਼ਰ ਸਨ।