ਰਾਮਪੁਰਾ ਫੂਲ : ਸ਼ਹਿਰ ਦੇ ਵਿਕਾਸ ਲਈ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰਾਂ ਦਾ ਚੋਣ ਜਿੱਤ ਕੇ ਨਗਰ ਕੌਂਸਲ ਪਹੁੰਚਣਾ ਬੇਹੱਦ ਜ਼ਰੂਰੀ ਹੈ। ਸੱਤਾਧਿਰ ਨਾਲ ਸੰਬੰਧਤ ਕੌਂਸਲਰ ਸਰਕਾਰ ਨਾਲ ਤਾਲਮੇਲ ਕਾਇਮ ਕਰਕੇ ਸ਼ਹਿਰ ਦੇ ਵਿਕਾਸ ਲਈ ਵਧੀਆ ਯੋਜਨਾਵਾਂ ਬਣਾਕੇ ਉਹਨਾਂ ਅਨੁਸਾਰ ਕੰਮ ਕਰ ਸਕਦੇ ਹਨ। ਸੱਤਾਧਿਰ ਨਾਲ ਸੰਬੰਧਤ ਕੌਂਸਲਰਾਂ ਨੂੰ ਆਪਣੇ ਵਾਰਡਾਂ ਦੇ ਵਿਕਾਸ ਲਈ ਸਰਕਾਰ ਤੋਂ ਫੰਡ ਲੈਣਾ ਵੀ ਸੌਖਾ ਹੁੰਦਾ ਹੈ। ਉਕਤ ਸ਼ਬਦ ਹਲਕਾ ਵਿਧਾਇਕ ਬਲਕਾਰ ਸਿੰਘ ਸਿੱਧੂ ਨੇ ਸਥਾਨਕ ਸਥਾਨਕ ਸ਼ਹੀਦ ਭਗਤ ਸਿੰਘ ਕਲੋਨੀ ਵਿਖੇ ਆਯੋਜਿਤ ਚੋਣ ਜਲਸਿਆਂ ਦੌਰਾਨ ਵੱਡੀ ਗਿਣਤੀ ਵਿੱਚ ਸ਼ਾਮਲ ਮੁਹੱਲਾ ਵਾਸੀਆਂ ਨੂੰ ਸੰਬੋਧਨ ਕਰਦੇ ਹੋਏ ਕਹੇ। ਸਮੂਹ ਸ਼ਹਿਰ ਵਿੱਚ ਆਯੋਜਿਤ ਚੋਣ ਜਲਸੇ ਵਿੱਚ ਵਿਧਾਇਕ ਸਿੱਧੂ ਨੇ ਵਾਰਡ ਨੰਬਰ 5 ਤੋਂ ਆਪ ਉਮੀਦਵਾਰ ਪਰਮਜੀਤ ਕੌਰ ਮਾਤਾ ਜੱਗਾ ਢੂਲੇਵਾਲਾ ਅਤੇ ਸ਼ਹੀਦ ਭਗਤ ਸਿੰਘ ਕਲੌਨੀ ਵਿਖੇ ਵਾਰਡ ਨੰਬਰ 13 ਤੋਂ ਆਪ ਉਮੀਦਵਾਰ ਰੁਪਿੰਦਰ ਕੌਰ ਉਰਫ ਰੂਬੀ ਢਿੱਲੋਂ, ਤੇ ਵਾਰਡ ਨੰਬਰ 11 ਤੋਂ ਦਰਸ਼ਨਾਂ ਦੇਵੀ, ਪਤਨੀ ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਆਗੂ ਨਿਰਮਲ ਜੇਈ ਅਤੇ ਵਾਰਡ ਨੰਬਰ 12 ਤੋਂ ਇੰਦਰਜੀਤ ਬਾਵਾ ਗੋਰਾ ਤੇ ਵਾਰਡ ਨੰਬਰ 15 ਤੋਂ ਕਿਰਨਦੀਪ ਕੌਰ ਪਤਨੀ ਰੋਬੀ ਬਰਾੜ , ਵਾਰਡ ਨੰਬਰ 10 ਤੋਂ ਤਰਸੇਮ ਸ਼ਰਮਾ ਦੇ ਹੱਕ ਵਿੱਚ ਵੋਟ ਪਾਉਣ ਲਈ ਅਪੀਲ ਕਰਨ ਪਹੁੰਚੇ ਸਨ। ਵਿਧਾਇਕ ਸਿੱਧੂ ਨੇ ਕਿਹਾ ਕਿ ਪਿਛਲੇ ਦੋ ਦਹਾਕਿਆਂ ਦੌਰਾਨ ਸ਼ਹਿਰ ਨੂੰ ਦੋ ਮੰਤਰੀ ਮਿਲਣ ਦੇ ਬਾਵਜੂਦ ਸ਼ਹਿਰ ਵਿਕਾਸ ਨੂੰ ਤਰਸਦਾ ਰਿਹਾ ਹੈ। ਉਕਤ ਦੋਵਾਂ ਮੰਤਰੀਆਂ ਨੇ ਸ਼ਹਿਰ ਦੇ ਵਿਕਾਸ ਦੀ ਬਜਾਏ ਆਪਣੇ ਘਰ ਦੇ ਵਿਕਾਸ ਨੂੰ ਤਰਜੀਹ ਦਿੱਤੀ। ਜਦਕਿ ਆਮ ਆਦਮੀ ਪਾਰਟੀ ਦੇ ਸੱਤਾ ਵਿੱਚ ਆਉਣ ਅਤੇ ਉਹਨਾਂ (ਬਲਕਾਰ ਸਿੰਘ ਸਿੱਧੂ) ਦੇ ਵਿਧਾਇਕ ਚੁਣੇ ਜਾਣ ਤੋਂ ਬਾਦ ਸ਼ਹਿਰ ਵਿੱਚ ਤੇਜੀ ਨਾਲ ਵਿਕਾਸ ਹੋ ਰਿਹਾ ਹੈ। ਉਹਨਾਂ ਕਿਹਾ ਕਿ ਉਹਨਾਂ ਵੱਲੋਂ ਸਥਾਨਕ ਫੈਕਟਰੀ ਰੋਡ ਉੱਪਰ ਸਥਿਤ ਗੀਤਾ ਭਵਨ ਦੇ ਨਾਲ ਖਾਲੀ ਪਈ ਜਗਾ ਅਤੇ ਸਥਾਨਕ ਪਟਿਆਲਾ ਮੰਡੀ ਵਿਖੇ ਖੰਡਰ ਨੁਮਾ ਹਾਲਤ ਵਿੱਚ ਪਈ ਮਾਰਕੀਟ ਕਮੇਟੀ ਵਾਲੀ ਜਗਾ ਉੱਪਰ ਦੋ ਪਾਰਕ ਬਣਾ ਕੇ ਸ਼ਹਿਰਵਾਸੀਆਂ ਨੂੰ ਸੁੰਦਰ ਸੈਰਗਾਹ ਦਿੱਤੀਆਂ ਗਈਆਂ। ਇਸ ਤੋਂ ਇਲਾਵਾ ਲੰਮੇ ਸਮੇ ਤੋਂ ਖਸਤਾਹਾਲ ਸਥਾਨਕ ਬਾਈਪਾਸ ਰੋਡ ਅਤੇ ਫੂਲ ਰੋਡ ਨੂੰ ਨਵੇਂ ਸਿਰੇ ਤੋਂ ਬਣਾਇਆ ਗਿਆ। ਸਿੱਧੂ ਨੇ ਕਿਹਾ ਕਿ ਸਥਾਨਕ ਸ਼ਹਿਰ ਅੰਦਰੋਂ ਲੰਘਣ ਵਾਲੇ ਫੂਲ ਰਜਬਾਹੇ ਦੇ ਨਵੀਨੀਕਰਨ ਦਾ ਕੰਮ ਚੱਲ ਰਿਹਾ ਹੈ ਅਤੇ ਇਸ ਦੇ ਪੂਰਾ ਹੋਣ ਤੋਂ ਬਾਦ ਰਜਬਾਹੇ ਦੇ ਕਿਨਾਰੇ ਸੁੰਦਰ ਸੈਰਗਾਹ ਬਣਾਉਣ ਦਾ ਕੰਮ ਸ਼ੁਰੂ ਕੀਤਾ ਜਾਵੇਗਾ। ਸਿੱਧੂ ਨੇ ਕਿਹਾ ਕਿ ਲੰਬੇ ਸਮੇ ਤੋਂ ਸ਼ਹਿਰ ਅੰਦਰ ਨਗਰ ਕੌਂਸਲ ਦੀ ਚੋਣ ਨਾ ਹੋਣ ਕਾਰਨ ਸ਼ਹਿਰ ਦੇ ਵਿਕਾਸ ਕੰਮਾਂ ਲਈ ਖਰਚ ਕੀਤੇ ਜਾਣ ਵਾਲੀ ਅੱਠ ਕਰੋੜ ਦੀ ਗ੍ਰਾਂਟ ਰੁਕੀ ਹੋਈ ਹੈ। ਆਮ ਆਦਮੀ ਪਾਰਟੀ ਦੇ ਉਮੀਦਵਾਰਾਂ ਨੂੰ ਜਿਤਾਉਣ ਦੀ ਅਪੀਲ ਕਰਦਿਆਂ ਵਿਧਾਇਕ ਸਿੱਧੂ ਨੇ ਕਿਹਾ ਕਿ ਆਪ ਦਾ ਹਾਊਸ ਬਣਨ ਤੇ ਪਹਿਲਾਂ ਵਾਲੇ ਅੱਠ ਕਰੋੜ ਰੁਪਏ ਮਿਲਾ ਕੇ ਸੋਲਾਂ ਕਰੋੜ ਰੁਪਏ ਦੀ ਗ੍ਰਾਂਟ ਲਿਆਂਦੀ ਜਾਵੇਗੀ।