ਆਪਣੇ ਪਹਿਲੇ ਕੌਮਾਂਤਰੀ ਦੌਰੇ ’ਤੇ ਗਈ ਭਾਰਤੀ ਸਬ ਜੂਨੀਅਰ ਪੁਰਸ਼ ਹਾਕੀ ਟੀਮ ਨੇ ਇੱਥੇ ਨੀਦਰਲੈਂਡ ਅੰਡਰ-16 ਟੀਮ ਨੂੰ 4-2 ਨਾਲ ਹਰਾ ਦਿੱਤਾ ਹਾਲਾਂਕਿ ਮਹਿਲਾਵਾਂ ਨੂੰ ਨੀਦਰਲੈਂਡ ਅੰਡਰ-16 ਮਹਿਲਾ ਹਾਕੀ ਟੀਮ ਹੱਥੋਂ 2-6 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਪੁਰਸ਼ ਵਰਗ ਵਿਚ ਉਪ ਕਪਤਾਨ ਆਸ਼ੂ ਮੌਰਿਆ ਨੇ ਪਹਿਲੇ ਕੁਆਰਟਰ ਦੀ ਸ਼ੁਰੂਆਤ ਵਿਚ ਹੀ ਭਾਰਤ ਨੂੰ ਬੜ੍ਹਤ ਦਿਵਾ ਦਿੱਤੀ ਸੀ।
ਨੀਦਰਲੈਂਡ ਨੇ ਹਾਫ ਟਾਈਮ ਤੋਂ ਪਹਿਲਾਂ ਸਕੋਰ ਬਰਾਬਰ ਕਰਨ ਲਈ ਵਾਪਸੀ ਕੀਤੀ ਤੇ ਸਖਤ ਮਿਹਨਤ ਦੀ ਬਦੌਲਤ ਬੜ੍ਹਤ ਵੀ ਲੈ ਲਈ। ਹਾਲਾਂਕਿ ਦੀਪਕ ਪ੍ਰਧਾਨ ਨੇ ਭਾਰਤ ਲਈ ਸਕੋਰ ਬਰਾਬਰ ਕਰ ਦਿੱਤਾ ਤੇ ਮੁਕਾਬਲੇ ਦੇ ਆਖਰੀ ਮਿੰਟਾਂ ਵਿਚ ਆਸ਼ੂ ਮੌਰਿਆ ਤੇ ਰਾਹੁਲ ਰਾਜਭਰ ਨੇ ਇਕ ਤੋਂ ਬਾਅਦ ਇਕ ਗੋਲ ਕਰਕੇ ਭਾਰਤ ਨੂੰ ਜਿੱਤ ਦਿਵਾ ਦਿੱਤੀ। ਭਾਰਤੀ ਸਬ ਜੂਨੀਅਰ ਪੁਰਸ਼ ਟੀਮ ਦੇ ਕੋਚ ਸਰਦਾਰ ਸਿੰਘ ਨੇ ਕਿਹਾ,‘‘ਇਹ ਟੀਮ ਲਈ ਇਕ ਵੱਡੀ ਜਿੱਤ ਹੈ। ਸਾਨੂੰ ਇਸ ਜਿੱਤ ’ਤੇ ਬਹੁਤ ਮਾਣ ਹੈ।’’