ਅਮਨਦੀਪ ਮੈਡੀਸਿਟੀ ਨੇ ਦਿਲ ਤੇ ਧਮਣੀ ਦਾ ਕੀਤਾ ਸਫ਼ਲ ਆਪਰੇਸ਼ਨ

ਅੰਮ੍ਰਿਤਸਰ  : ਅਮਨਦੀਪ ਮੈਡੀਸਿਟੀ ਨੇ ਉਜਾਲਾ ਸਿਗਨਸ ਦੀ ਭਾਈਵਾਲ਼ੀ 'ਚ ਦਿਲ ਤੇ ਧਮਣੀ ਦੀ ਗੰਭੀਰ ਹਾਲਤ ਵਿੱਚ ਅਜਿਹਾ ਸਫ਼ਲ ਆਪਰੇਸ਼ਨ ਕੀਤਾ ਹੈ, ਜਿਸ ਵਿੱਚ ਨਾਮਾਤਰ ਚੀਰ–ਫਾੜ ਦੀ ਜ਼ਰੂਰਤ ਹੁੰਦੀ ਹੈ। ਤਕਨੀਕੀ ਭਾਸ਼ਾ ਵਿੱਚ ਇਸ ਨੂੰ 'ਟਾਈਪ ਬੀ ਏਓਰਟਿਕ ਡਾਇਸੈਕਸ਼ਨ – ਟੀਬੀਏਡੀ' ਕਿਹਾ ਜਾਂਦਾ ਹੈ। ਇਹ ਆਪਣੇ–ਆਪ ਵਿੱਚ ਇੱਕ ਬਹੁਤ ਵੱਡਾ ਮੀਲ–ਪੱਥਰ ਹੈ। ਇਹ ਸਫ਼ਲ ਆਪਰੇਸ਼ਨ 54 ਸਾਲਾਂ ਦੇ ਉਸ ਮਰਦ ਮਰੀਜ਼ ਦਾ ਕੀਤਾ ਗਿਆ ਹੈ, ਜੋ ਸਰੀਰ ਦੀ ਮੁੱਖ ਨਸ ਜਾਂ ਧਮਣੀ (ਆਰਟਰੀ) 'ਅਓਰਟਾ' ਦੀ ਗੰਭੀਰ ਕਿਸਮ ਦੀ ਹਾਲਤ ਤੋਂ ਪੀੜਤ ਸੀ। ਇਸ ਮਰੀਜ਼ ਦਾ ਬਲੱਡ–ਪ੍ਰੈਸ਼ਰ ਬਹੁਤ ਜ਼ਿਆਦਾ ਹੋ ਗਿਆ ਸੀ ਤੇ ਉਹ ਕਿਸੇ ਵੀ ਤਰ੍ਹਾਂ ਕਾਬੂ ਹੇਠ ਨਹੀਂ ਸੀ ਆ ਰਿਹਾ। ਜਾਂਚ ਦੌਰਾਨ ਪਤਾ ਲੱਗਾ ਕਿ ਉਸ ਦੀ ਮੁੱਖ ਧਮਣੀ 'ਅਓਰਟਾ' ਦੇ ਹੇਠਲਾ ਹਿੱਸਾ ਬੁਰੀ ਤਰ੍ਹਾਂ ਫਟਣ ਲੱਗ ਪਿਆ ਸੀ। ਅਜਿਹੀ ਹਾਲਤ ਵਿੱਚ ਉਸ ਦੀ ਜਾਨ ਨੂੰ ਵੱਡਾ ਖ਼ਤਰਾ ਸੀ। ਇਸੇ ਲਈ ਉਸ ਦਾ ਤੁਰਤ–ਫੁਰਤ ਇਲਾਜ ਜ਼ਰੂਰੀ ਸੀ। ਅਜਿਹੇ ਮਾਮਲਿਆਂ ਵਿੱਚ ਕੁਝ ਮਰੀਜ਼ਾਂ ਦੀ ਮੈਡੀਕਲ ਸਮੱਸਿਆ ਨੂੰ ਦਵਾਈਆਂ ਨਾਲ਼ ਕਾਬੂ ਹੇਠ ਲਿਆਂਦਾ ਜਾ ਸਕਦਾ ਹੈ ਪਰ ਜਦੋਂ ਗੁੰਝਲਾਂ ਬਹੁਤ ਜ਼ਿਆਦਾ ਵਧ ਜਾਣ, ਤਾਂ ਧਮਣੀ ਦੇ ਹੋਰ ਨੁਕਸਾਨ ਤੋਂ ਬਚਾਅ ਲਈ ਤੁਰੰਤ ਇਲਾਜ ਜ਼ਰੂਰੀ ਹੁੰਦਾ ਹੈ। ਤਦ ਇਸ ਮਰੀਜ਼ ਦੇ ਇਲਾਜ ਲਈ ਅਮਨਦੀਪ ਮੈਡੀਸਿਟੀ ਦੇ ਦਿਲ ਤੇ ਵੈਸਕਿਊਲਰ ਨਾਲ਼ ਸਬੰਧਤ ਕੇਸਾਂ ਦੇ ਮਾਹਿਰ ਸਰਜਨਾਂ ਨੇ ਆਧੁਨਿਕ TEVAR ਵਿਧੀ ਨਾਲ਼ ਆਪਰੇਸ਼ਨ ਕੀਤਾ, ਜਿਸ ਵਿੱਚ ਨਾਮਾਤਰ ਚੀਰ–ਫਾੜ ਦੀ ਜ਼ਰੂਰਤ ਹੁੰਦੀ ਹੈ। ਡਾਕਟਰਾਂ ਨੇ ਮਰੀਜ਼ ਦੇ 'ਗ੍ਰੋਇਨ' (ਢਿੱਡ ਤੇ ਪੱਟ ਦੇ ਉਪਰ ਦਾ ਵਿਚਕਾਰਲਾ ਹਿੱਸਾ) 'ਚ ਇੱਕ ਨਿੱਕਾ ਜਿਹਾ ਛੇਕ ਕਰ ਕੇ ਇੱਕ 'ਸਟੈਂਟ ਗ੍ਰਾਫ਼ਟ' ਨਾਂਅ ਦੀ ਇੱਕ ਖ਼ਾਸ ਕਵਰਡ ਟਿਊਬ ਦਾਖ਼ਲ ਕੀਤੀ ਅਤੇ ਉਸ ਨੂੰ ਮੁੱਖ ਨਸ ਦੇ ਫਟੇ ਹੋਏ ਸਥਾਨ ਨੂੰ ਬੰਦ ਕਰਨ ਲਈ ਵਰਤਿਆ। ਇੰਝ ਮੁੱਖ ਨਸ ਦੇ ਕਮਜ਼ੋਰ ਸਥਾਨ ਉਤੇ ਦਬਾਅ ਘਟ ਗਿਆ ਤੇ ਉਸ ਦੇ ਹੋਰ ਅਗਲੇ ਹਿੱਸੇ ਦੇ ਫਟਣ ਦਾ ਖ਼ਤਰਾ ਬਹੁਤ ਜ਼ਿਆਦਾ ਘਟ ਗਿਆ। ਇਹ ਆਪਰੇਸ਼ਨ ਪੁਰਾਣੇ ਤੇ ਰਵਾਇਤੀ ਆਪਰੇਸ਼ਨ ਵਾਂਗ ਬਿਲਕੁਲ ਵੀ ਨਹੀਂ ਸੀ, ਜਿਸ ਵਿੱਚ ਛਾਤੀ ਨੂੰ ਚੀਰ ਕੇ ਵੱਡਾ ਹਿੱਸਾ ਖੋਲ੍ਹਿਆ ਜਾਦਾ ਹੈ। ਇਹ ਆਪਰੇਸ਼ਨ ਬਹੁਤ ਨਿੱਕੇ–ਨਿੱਕੇ ਛੇਕਾਂ ਰਾਹੀਂ ਕੀਤਾ ਗਿਆ। ਅਮਨਦੀਪ ਮੈਡੀਸਿਟੀ, ਉਜਾਲਾ ਸਿਗਨਸ ਦੀ ਭਾਈਵਾਲ਼ੀ ਨਾਲ਼ ਅਗਾਂਹਵਧੂ, ਹਰੇਕ ਮਰੀਜ਼ ਦੀ ਪਹੁੰਚ ਹੇਠ ਇਲਾਜ ਉਪਲਬਧ ਕਰਵਾਉਣ ਲਈ ਪ੍ਰਤੀਬੱਧ ਹੈ ਅਤੇ ਮਾਹਿਰ ਡਾਕਟਰਾਂ ਦੀ ਟੀਮ ਪੂਰੀ ਤਰ੍ਹਾਂ ਆਧੁਨਿਕ ਸਹੂਲਤਾਂ ਅੰਮ੍ਰਿਤਸਰ ਅਤੇ ਆਲ਼ੇ–ਦੁਆਲ਼ੇ ਦੇ ਇਲਾਕਾ–ਨਿਵਾਸੀਆਂ ਦੇ ਮਰੀਜ਼ਾਂ ਲਈ ਮੌਜੂਦ ਹੈ।