ਮੋਰਿੰਡਾ : ਬੀਤੀ ਰਾਤ ਬਲਦੇਵ ਨਗਰ ਮੋਰਿੰਡਾ ਦੀ ਇੱਕ ਕਬਾੜ ਦੀ ਦੁਕਾਨ ਸ਼ਿਵ ਸ਼ਕਤੀ ਟਰੇਡਰਜ਼ ਦੀ ਦੁਕਾਨ ਵਿੱਚ ਕਿਸੇ ਵਜਾ ਕਾਰਨ ਅੱਗ ਲੱਗ ਗਈ ਜਿਸ ਕਾਰਨ ਇੱਕ ਬਲੈਰੋ, ਦੋ ਕਾਰਾਂ, ਅਲਾਏ ਵੀਲਸ, ਟਾਇਰ ਅਤੇ ਸਪੇਅਰ ਪਾਰਟ ਸੜ ਕੇ ਸਵਾਹ ਹੋ ਗਏ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਦੁਕਾਨ ਦੇ ਮਾਲਿਕ ਫਤਿਹ ਚੰਦ ਧਰਮਸੋਤ ਨੇ ਦੱਸਿਆ ਕਿ ਉਹਨਾਂ ਨੂੰ ਪਿੰਡ ਦੇ ਹੀ ਕਿਸੇ ਵਿਅਕਤੀ ਨੇ ਰਾਤ ਦੇ ਡੇਢ ਵਜੇ ਫੋਨ ਕੀਤਾ ਕਿ ਤੁਹਾਡੀ ਦੁਕਾਨ ਵਿੱਚ ਅੱਗ ਲੱਗੀ ਹੋਈ ਹੈ, ਜਦੋਂ ਉਹ ਆਪਣੀ ਦੁਕਾਨ ਤੇ ਪੁੱਜੇ ਤਾਂ ਅੱਗ ਪੂਰੀ ਤਰਾਂ ਫੈਲ ਚੁੱਕੀ ਸੀ। ਉਨਾਂ ਦਾ ਕਹਿਣਾ ਹੈ ਕਿ ਪਹਿਲਾਂ ਫਾਇਰ ਬ੍ਰਿਗੇਡ ਵਾਲਿਆਂ ਨੂੰ ਫੋਨ ਕੀਤਾ ਪ੍ਰੰਤੂ ਕਿਸੇ ਨੇ ਫੋਨ ਨਹੀਂ ਚੁੱਕਿਆ। ਫਿਰ ਸਾਡੇ ਪਿੰਡ ਵਾਲੇ ਫਾਇਰ ਬ੍ਰਿਗੇਡ ਦਫਤਰ ਮੋਰਿੰਡਾ ਵਿੱਚ ਪਹੁੰਚੇ ਅਤੇ ਕਰਮਚਾਰੀਆਂ ਨੂੰ ਜਗਾਇਆ। ਫਾਇਰ ਬ੍ਰਿਗੇਡ ਵਾਲੇ ਲਗਭਗ ਦੋ ਵਜੇ ਦੇ ਕਰੀਬ ਮੌਕੇ ਤੇ ਪਹੁੰਚੇ, ਉੱਦੋਂ ਤੱਕ ਉਹਨਾਂ ਦੀ ਦੁਕਾਨ ਦਾ ਸ਼ੈੱਡ, ਦਫਤਰ, ਇੱਕ ਬਲੈਰੋ ਗੱਡੀ, ਦੋ ਕਾਰਾਂ, ਅਲਾਏ ਵੀਲ ਤੇ ਬਾਕੀ ਸਪੇਅਰ ਪਾਰਟ ਬੁਰੀ ਤਰਾਂ ਜਲ ਚੁੱਕੇ ਸਨ। ਇਸ ਸਬੰਧੀ ਫਤਿਹਚੰਦ ਵਲੋਂ ਮੋਰਿੰਡਾ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਹੈ। ਅੱਗ ਲੱਗਣ ਦਾ ਕਾਰਨ ਬਿਜਲੀ ਦੀਆਂ ਤਾਰਾਂ ਦਾ ਸ਼ਾਰਟ ਸਰਕਿਟ ਹੋਣਾ ਦੱਸਿਆ ਜਾਂਦਾ ਹੈ। ਮੋਰਿੰਡਾ ਪੁਲਿਸ ਨੇ ਮੌਕੇ ’ਤੇ ਪਹੁੰਚ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।