ਲੁਧਿਆਣਾ : ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾਉਣ ਵਾਲੇ ਮਨਸਿਮਰਨ ਸੰਧੂ ਇੱਕ ਵਾਰ ਫਿਰ ਆਪਣੇ ਨਵੇਂ ਗੀਤ ‘ਦੀਵਾਨੀ ਮਸਤਾਨੀ’ ਨਾਲ ਦਰਸ਼ਕਾਂ ਦੇ ਦਿਲ ਜਿੱਤਣ ਲਈ ਵਾਪਸ ਆਏ ਹਨ। ਅਮਰੀਕਾ ਵਿੱਚ ਰਹਿੰਦੇ ਇਸ ਗਾਇਕ-ਗੀਤਕਾਰ ਨੇ ਆਪਣੇ ਲੇਟੈਸਟ ਟਰੈਕ ਵਿੱਚ ਪਿਆਰ ਦੇ ਗਹਿਰੇ ਅਹਿਸਾਸ ਅਤੇ ਸਮਰਪਣ ਨੂੰ ਸੁਰੀਲੇ ਢੰਗ ਨਾਲ ਪੇਸ਼ ਕੀਤਾ ਹੈ। ਇਹ ਗੀਤ ਉਸ ਮੌਕੇ ਨੂੰ ਦਰਸਾਉਂਦਾ ਹੈ ਜਦੋਂ ਪਿਆਰ ਸਿਰਫ਼ ਇਕ ਭਾਵਨਾ ਨਹੀਂ ਰਹਿੰਦਾ, ਸਗੋਂ ਜੀਵਨ ਦਾ ਕੇਂਦਰ ਬਣ ਜਾਂਦਾ ਹੈ। ਮਨਸਿਮਰਨ ਨੇ ਖੁਦ ਇਸਨੂੰ ਲਿਖਿਆ ਤੇ ਕੰਪੋਜ਼ ਕੀਤਾ ਹੈ, ਜਦਕਿ ਇਸਦਾ ਮਿਊਜ਼ਿਕ ਹਿਟੇਨ ਵੱਲੋਂ ਤਿਆਰ ਕੀਤਾ ਗਿਆ ਹੈ। ਸੁਰੀਲੀਆਂ ਧੁਨਾਂ ਅਤੇ ਕੱਵਾਲੀ ਤੋਂ ਪ੍ਰੇਰਿਤ ਅੰਦਾਜ਼ ਨਾਲ ਇਹ ਗੀਤ ਹੌਲੀ-ਹੌਲੀ ਇਕ ਰੂਹਾਨੀ ਤਜਰਬੇ ਵਿੱਚ ਬਦਲ ਜਾਂਦਾ ਹੈ।
ਗੀਤ ਬਾਰੇ ਮਨਸਿਮਰਨ ਸੰਧੂ ਨੇ ਦੱਸਿਆ ਕਿ, “ਦੀਵਾਨੀ ਮਸਤਾਨੀ ਇਕ ਅਸਲੀ ਅਹਿਸਾਸ ਤੋਂ ਜਨਮਿਆ ਹੈ। ਇਹ ਉਸ ਪਿਆਰ ਦੀ ਗੱਲ ਕਰਦਾ ਹੈ ਜਿਸ ‘ਤੇ ਕੋਈ ਕੰਟਰੋਲ ਨਹੀਂ ਹੁੰਦਾ ਅਤੇ ਜੋ ਪੂਰੀ ਤਰ੍ਹਾਂ ਆਪਣੇ ਅੰਦਰ ਸਮਾ ਲੈਂਦਾ ਹੈ।” ਗੌਰਤਲਬ ਹੈ ਕਿ ਮਨਸਿਮਰਨ ਪਹਿਲੀ ਵਾਰ ਰਿਆਲਿਟੀ ਸ਼ੋਅ ‘ਰਾਈਜ਼ਿੰਗ ਸਟਾਰ’ ਵਿੱਚ ਦਿਲਜੀਤ ਦੋਸਾਂਝ ਦੇ ਸਾਹਮਣੇ ਪ੍ਰਦਰਸ਼ਨ ਕਰਕੇ ਚਰਚਾ ਵਿੱਚ ਆਏ ਸਨ। ‘ਦੀਵਾਨੀ ਮਸਤਾਨੀ’ ਹੁਣ ਸਾਰੇ ਮੁੱਖ ਮਿਊਜ਼ਿਕ ਪਲੇਟਫਾਰਮਾਂ ‘ਤੇ ਉਪਲਬਧ ਹੈ।