ਲੁਧਿਆਣਾ : ਅੱਜ ਦੇ ਦੌਰ ਵਿੱਚ ਜਿੱਥੇ ਪੰਜਾਬ ਦੀ ਜਵਾਨੀ ਨਸ਼ਿਆਂ ਦੀ ਦਲਦਲ ਵਿੱਚ ਫਸ ਕੇ ਆਪਣੇ-ਆਪ ਨੂੰ ਤਬਾਹ ਕਰਨ ਵਿੱਚ ਲੱਗੀ ਹੋਈ ਹੈ, ਓਥੇ ਹੀ ਧਾਂਦਰਾ ਰੋੜ ਆਲਮਗੀਰ ਵਿੱਚ ਚੱਲ ਰਿਹਾ ਉਸਤਾਦ ਸ੍ਰੀ ਬਾਲੀ ਪਹਿਲਵਾਨ ਦਾ ਅਖਾੜਾ ਨੌਜਵਾਨਾਂ ਨੂੰ ਨਸ਼ੇ ਦੀ ਦਲਦਲ ਤੋਂ ਬਚਾਉਣ ਦੇ ਨਾਲ-ਨਾਲ ਉਹਨਾਂ ਨੂੰ ਮੁਫਤ ਟਰੇਨਿੰਗ ਦੇ ਕੇ ਰਾਸ਼ਟਰ ਪੱਧਰ ਦੇ ਪਹਿਲਵਾਨ ਬਣਾ ਰਿਹਾ ਹੈ। ਸਾਬਕਾ ਸਰਪੰਚ ਮੇਸ਼ੀ ਪਹਿਲਵਾਨ, ਉਹਨਾਂ ਦੇ ਬੇਟੇ ਰਵੀ ਪਹਿਲਵਾਨ ਅਤੇ ਭਤੀਜੇ ਅਮਨ ਪਹਿਲਵਾਨ ਅਤੇ ਹੋਰਨਾਂ ਦੇ ਸਹਿਯੋਗ ਨਾਲ ਚੱਲ ਰਹੇ ਇਸ ਅਖਾੜੇ ਵਿੱਚੋਂ ਟਰੇਨਿੰਗ ਪ੍ਰਾਪਤ ਕਰਕੇ ਕਈ ਪਹਿਲਵਾਨ ਜਿਲਾ ਪੱਧਰ, ਪੰਜਾਬ ਪੱਧਰ ਅਤੇ ਰਾਸ਼ਟਰ ਪੱਧਰ ਤੇ ਆਪਣੀ ਕੁਸ਼ਤੀ ਦਾ ਜੌਹਰ ਦਿਖਾ ਚੁੱਕੇ ਹਨ। ਅਖਾੜੇ ਦਾ ਸੰਚਾਲਨ ਕਰ ਰਹੇ ਕੁਲਦੀਪ ਕਾਲਾ ਪਹਿਲਵਾਨ ਨੇ ਦੱਸਿਆ ਉਹਨਾਂ ਦੇ ਪਿਤਾ ਉਸਤਾਦ ਸ੍ਰੀ ਬਾਲ ਕਿਸ਼ਨ ਬਾਲੀ ਪਹਿਲਵਾਨ ਜੀ ਸ਼ੁਰੂ ਤੋਂ ਹੀ ਅਖਾੜੇ ਦੇ ਵਿੱਚ ਮਿਹਨਤ ਕਰਦੇ ਰਹੇ ਹਨ। ਉਹਨਾਂ ਦਾ ਅਖਾੜਾ ਪਹਿਲਾਂ ਬਾਜਵਾ ਨਗਰ ਲੁਧਿਆਣਾ ਦੇ ਧੋਬੀਘਾਟ ਦੇ ਕੋਲ ਹੁੰਦਾ ਸੀ। 2012 ਵਿੱਚ ਉਹਨਾਂ ਨੇ ਇੱਥੇ ਆਲਗਮੀਰ ਵਿੱਚ ਅਖਾੜਾ ਬਣਾਇਆ ਅਤੇ ਆਲੇ-ਦੁਆਲੇ ਦੇ ਪਿੰਡਾਂ ਵਿੱਚ ਰਹਿਣ ਵਾਲੇ ਨੌਜਵਾਨਾਂ ਨੂੰ ਮੁਫਤ ਟਰੇਨਿੰਗ ਦੇਣ ਦਾ ਕੰਮ ਸ਼ੁਰੂ ਕੀਤਾ। 2017 ਵਿੱਚ ਉਹਨਾਂ ਦੀ ਮੌਤ ਤੋਂ ਬਾਅਦ ਉਹਨਾਂ ਦੇ ਦੱਸੇ ਪੂਰਨਿਆਂ ਦੇ ਚੱਲਦੇ ਹੋਏ ਉਹ ਇਸ ਅਖਾੜੇ ਨੂੰ ਚਲਾ ਰਹੇ ਹਨ। ਇਸ ਵੇਲੇ ਇਸ ਅਖਾੜੇ ਦੇ 20-25 ਬੱਚੇ ਜਿਲੇ ਅਤੇ ਰਾਜ ਪੱਧਰ ਤੇ ਕੁਸ਼ਤੀ ਲੜ ਚੁੱਕੇ ਹਨ। ਇਸ ਅਖਾੜੇ ਵਿੱਚ ਉਸਤਾਦ ਸ੍ਰੀ ਬਾਲੀ ਪਹਿਲਵਾਨ ਦੇ ਜਨਮ ਦਿਨ ਮੌਕੇ 28 ਜੁਲਾਈ ਇਸ ਮੌਕੇ ਦੰਗਲ ਕਰਵਾਇਆ ਜਾਦਾ ਹੈ।