ਖਰੜ : ਖਰੜ-ਕੁਰਾਲੀ ਹਾਈਵੇਅ ਤੇ ਸਥਿਤ ਪਿੰਡ ਦਾਊਮਾਜਰਾ ਤੋਂ ਲੈ ਕੇ ਪਿੰਡ ਰਡਿਆਲਾ ਤੱਕ ਬਣਾਈ ਜਾ ਰਹੀ ਸੜਕ ਦਾ ਪਿੰਡ ਨਿਵਾਸੀਆਂ ਅਤੇ ਇਲਾਕਾ ਨਿਵਾਸੀਆਂ ਵਲੋਂ ਵਿਰੋਧ ਕਰਦੇ ਹੋਏ ਸਰਕਾਰ ਤੋਂ ਮੰਗ ਕੀਤੀ ਕਿ ਇਸ ਸੜਕ ਨੂੰ ਪ੍ਰੀਮਿਕਸ ਲੁੱਕ ਵਾਲੀ ਬਣਾਈ ਜਾਵੇ ਕਿਉਕਿ ਇਸ ਸੜਕ ਦਾ ਪਿੰਡ ਅਤੇ ਇਲਾਕਾ ਨਿਵਾਸੀਆਂ ਨੂੰ ਕੋਈ ਫਾਇਦਾ ਨਹੀ ਹੋਵੇਗਾ ਬਲਕਿ ਇਹ ਸੜਕ ਸੜਕੀ ਹਾਦਸਿਆਂ ਨੂੰ ਸੱਦਾ ਦੇ ਰਹੀ ਹੈ। ਪਿੰਡ ਰਡਿਆਲਾ ਦੇ ਵਸਨੀਕ ਬਿਲਾਸ ਸਿੰਘ, ਦਿਲਬਾਰ ਸਿੰਘ, ਬਲਜੀਤ ਸਿੰਘ, ਮੱਘਰ ਸਿੰਘ, ਸੰਤੋਖ ਸਿੰਘ, ਸੁਰਿੰਦਰ ਸਿੰਘ ਸਮੇਤ ਹੋਰਨਾਂ ਦਸਿਆ ਕਿ ਪਿੰਡ ਦਾਊਮਾਜਰਾ ਤੋਂ ਪਿੰਡ ਰਡਿਆਲਾ ਤੱਕ ਇਸ ਸੜਕ ਦੀ 33 ਫੁੱਟ ਚੋੜਾਈ ਅਤੇ ਪਿੰਡ ਤੋਂ ਅੱਗੇ ਇਸ ਸੜਕ ਦੀ ਚੋੜਾਈ 22 ਫੁੱਟ ਹੈ ਤੇ ਇਹ ਸੜਕ ਅੱਗੇ ਨਿਊ ਚੰਡੀਗੜ੍ਹ, ਮੁੱਲਾਂਪੁਰ ਗਰੀਬ ਦਾਸ ਸਮੇਤ ਹੋਰ ਪਿੰਡਾਂ ਨੂੰ ਜਾਂਦੀ ਹੈ ਅਤੇ ਇਸ ਸੜਕ ਤੇ ਦੋ ਦਰਜ਼ਨ ਤੋਂ ਵਧੇਰੇ ਪਿੰਡ ਪੈਂਦੇ ਹਨ। ਇਨ੍ਹਾਂ ਪਿੰਡਾਂ ਦੇ ਸਕੂਲਾਂ, ਕਾਲਜ਼ਾਂ, ਯੂਨੀਵਰਸਿਟੀਆਂ ਦੇ ਵਿਦਿਆਰਥੀ ਅਤੇ ਰੋਜ਼ਾਨਾ ਕੰਮਕਾਰਾਂ ਵਾਲੇ ਖਰੜ, ਕੁਰਾਲੀ ਸ਼ਹਿਰਾਂ ਸਮੇਤ ਖਰੜ ਸਥਿਤ ਸਰਕਾਰੀ ਦਫਤਰਾਂ ਵਿਚ ਕੰਮਕਾਰਾਂ ਲਈ ਲੋਕਾਂ ਦਾ ਆਉਣ ਜਾਣ ਹੈ। ਪਿੰਡ ਨਿਵਾਸੀਆਂ ਨੇ ਕਿਹਾ ਕਿ ਸ਼ੁਰੂ ਤੋਂ ਹੀ ਇਹ ਸੜਕ ਪ੍ਰੀਮਿਕਸ ਵਾਲੀ ਬਣੀ ਹੋਈ ਸੀ ਅਤੇ ਹੁਣ ਜੋ ਇਹ ਸੜਕ ਸਰਕਾਰ ਦੇ ਸਬੰਧਿਤ ਵਿਭਾਗ ਵਲੋ ਪੇਵਰ ਬਲਾਕ ਲਗਾ ਕੇ ਬਣਾਈ ਜਾ ਰਹੀ ਹੈ ਇਸ ਸੜਕ ਦੇ ਦੋ ਕਾਰਾਂ ਵੀ ਆਪਸ ਵਿਚ ਕਰਾਸ ਨਹੀਂ ਕਰ ਸਕਦੀਆਂ ਜਿਸ ਕਾਰਨ ਸੜਕੀ ਹਾਦਸੇ ਵਾਪਰਨ ਦਾ ਵੱਡਾ ਖਤਰਾ ਪੈਦਾ ਹੋ ਗਿਆ ਹੈ। ਇਸ ਸੜਕ ਤੇ ਆਈ.ਟੀ.ਆਈ., ਸਰਕਾਰੀ ਸਕੂਲ ਅਤੇ ਕਲੋਨੀਆਂ ਦਾ ਵੱਡੇ ਪੱਧਰ ਤੇ ਵਿਸਥਾਰ ਹੋ ਚੁੱਕਾ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਇਸ ਸੜਕ ਪ੍ਰੀਮਿਕਸ ਵਾਲੀ ਨਾ ਬਣਾਈ ਗਈ ਤਾਂ ਸਰਕਾਰ ਅਤੇ ਵਿਭਾਗ ਦੇ ਖਿਲਾਫ ਰੋਸ ਧਰਨਾ ਦੇ ਕੇ ਕੰਮ ਬੰਦ ਕਰਵਾਇਆ ਜਾਵੇਗਾ। ਉਨ੍ਹਾਂ ਮੰਗ ਕੀਤੀ ਕਿ ਇਸ ਸੜਕ ਨੂੰ ਪਹਿਲਾਂ ਦੀ ਤਰ੍ਹਾਂ ਪ੍ਰੀਮਿਕਸ ਵਾਲੀ ਬਣਾਈ ਜਾਵੇ।