ਭਿੱਖੀਵਿੰਡ : ਕਸਬਾ ਭਿੱਖੀਵਿੰਡ ਵਿਖੇ ਪੱਟੀ ਰੋਡ ਘੋਗਿਆਂ ਵਾਲੇ ਸ਼ੈੱਲਰ ਦੇ ਰਾਹ ਤੇ ਸਥਿਤ ਕਾਰਜ ਸਿੰਘ ਪੁੱਤਰ ਕਸ਼ਮੀਰ ਸਿੰਘ ਦੇ ਘਰੋਂ ਬੁੱਧਵਾਰ ਰਾਤ ਨੂੰ ਚੋਰਾਂ ਨੇ ਘਰ ਚ ਪਏ ਤਿੱਨ ਲੱਖ ਚਾਲੀ ਹਜ਼ਾਰ ਰੁਪਏ ਦੋ ਛਾਪਾਂ ਦੋ ਵਾਲੀਆਂ ਤੇ ਹੋਰ ਸਾਮਾਨ ਲੈ ਕੇ ਚੋਰੀ ਹੋ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਇਸ ਮੌਕੇ ਜਾਣਕਾਰੀ ਦਿੰਦਿਆਂ ਕਾਰਜ ਸਿੰਘ ਪੁੱਤਰ ਕਸ਼ਮੀਰ ਸਿੰਘ ਨੇ ਦੱਸਿਆ ਕਿ ਉਸ ਨੇ ਮਿਤੀ ਇਕੱਤੀ ਮਈ ਨੂੰ ਪੰਜਾਬ ਐਂਡ ਸਿੰਧ ਬੈਂਕ ਵਿੱਚੋਂ ਆਪਣੀ ਲਿਮਟ ਤਿੱਨ ਲੱਖ ਰੁਪਏ ਕੱਢਵਾ ਕੇ ਘਰ ਲਿਆਂਦੇ ਸਨ। ਬਾਕੀ ਉਸ ਦੀ ਪਤਨੀ ਲੜਕੀ ਤੇ ਲੜਕੇ ਵੱਲੋਂ ਘਰ ਦੇ ਕਾਰੋਬਾਰ ਤੋਂ ਕੋਈ ਚਾਲੀ ਹਜ਼ਾਰ ਰੁਪਏ ਇਕੱਠੇ ਕੀਤੇ ਘਰ ਵਿੱਚ ਪਹਿਲਾਂ ਪਏ ਸਨ। ਜਿਸ ਦੀ ਭਿਣਕ ਚੋਰਾਂ ਨੂੰ ਲੱਗ ਗਈ ਤੇ ਉਨ੍ਹਾਂ ਨੇ ਬੁੱਧਵਾਰ ਰਾਤ ਨੂੰ ਸਾਡੇ ਘਰ ਪਏ ਤਿੱਨ ਲੱਖ ਚਾਲੀ ਹਜ਼ਾਰ ਰੁਪਏ ਦੋ ਛਾਪਾਂ ਤੇ ਦੋ ਵਾਲੀਆਂ ਚੋਰੀ ਕਰਕੇ ਲੈ ਗਏ। ਇਸ ਮੌਕੇ ਉੱਥੇ ਮੌਜੂਦ ਵਿਰਸਾ ਸਿੰਘ, ਜਸਵਿੰਦਰ ਸਿੰਘ, ਜਸਬੀਰ ਸਿੰਘ, ਸ਼ਮਸ਼ੇਰ ਸਿੰਘ, ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਭਿੱਖੀਵਿੰਡ ਵਿੱਚ ਚੋਰਾਂ ਦੇ ਹੌਂਸਲੇ ਕਾਫੀ ਵਧ ਗਏ ਹਨ ਤੇ ਆਏ ਦਿਨ ਕੋਈ ਨਾ ਕੋਈ ਘਟਨਾ ਵਾਪਰਦੀ ਹੀ ਰਹਿੰਦੀ ਹੈ। ਇਸ ਮੌਕੇ ਜਾਣਕਾਰੀ ਲੈਣ ਪਹੁੰਚੇ ਏ ਐਸ ਆਈ ਪਵਨ ਕੁਮਾਰ ਨੇ ਕਿਹਾ ਕਿ ਪੁਲਿਸ ਪੂਰੀ ਮੁਸਤੈਦੀ ਨਾਲ ਜਾਂਚ ਪਡ਼ਤਾਲ ਕਰ ਰਹੀ ਹੈ ਤੇ ਜਲਦ ਹੀ ਚੋਰ ਸਲਾਖਾਂ ਪਿੱਛੇ ਹੋਣਗੇ।