ਸੰਦੌੜ : ਸਿਹਤ ਅਤੇ ਪਰਿਵਾਰ ਭਲਾਈ ਵਿਭਾਗ ਪੰਜਾਬ ਅਤੇ ਸਿਵਲ ਸਰਜਨ ਸੰਗਰੂਰ ਡਾ.ਸੰਜੈ ਗੋਇਲ ਦੇ ਦਿਸ਼ਾ ਨਿਰਦੇਸ਼ਾਂ ਤਹਿਤ ਅਤੇ ਸੀਨੀਅਰ ਮੈਡੀਕਲ ਅਫ਼ਸਰ ਡਾ. ਜੀ ਐੱਸ ਭਿੰਡਰ ਦੀ ਅਗਵਾਈ ਵਿੱਚ ਬਲਾਕ ਫਤਿਹਗੜ੍ਹ ਪੰਜਗਰਾਈਆਂ ਵਿਖੇ ਮਾਹਵਾਰੀ ਸਫ਼ਾਈ ਦਿਵਸ ਮਨਾਇਆ ਗਿਆ। ਇਸ ਦਿਵਸ ਦੇ ਮਨਾਉਣ ਦਾ ਮੁੱਖ ਉਦੇਸ਼ "ਪੀਰੀਅਡ ਫ੍ਰੈਂਡਲੀ ਵਰਲਡ" ਬਣਾਉਣ ਵੱਲ ਇੱਕ ਵਿਸ਼ਵਵਿਆਪੀ ਲਹਿਰ ਵਜੋਂ ਕੰਮ ਕਰਨਾ ਹੈ। ਇਸ ਮੌਕੇ ਬਲਾਕ ਐਜੂਕੇਟਰ ਹਰਪ੍ਰੀਤ ਕੌਰ ਨੇ ਆਸ਼ਾ ਫੇਸਿਲਟੇਟਰਸ ਨੂੰ ਬਲਾਕ ਦੇ ਸਾਰੇ ਪਿੰਡਾਂ ਦੀਆਂ ਕਿਸ਼ੋਰੀਆਂ ਨੂੰ ਚੰਗੇ ਮਾਹਵਾਰੀ ਸਫਾਈ ਪ੍ਰਬੰਧਨ ਦੀ ਮਹੱਤਤਾ ਬਾਰੇ ਜਾਗਰੂਕਤਾ ਪੈਦਾ ਕਰਨ ਲਈ ਨਿਰਦੇਸ਼ ਦਿੱਤੇ। ਓਹਨਾਂ ਕਿਹਾ ਕਿ ਆਸ਼ਾ ਦੁਆਰਾ ਪਿੰਡਾਂ ਵਿਚ ਬੱਚੀਆਂ ਨਾਲ ਮਾਹਵਾਰੀ ਵਿਸ਼ੇ ਤੇ ਖੁੱਲ੍ਹ ਕੇ ਚਰਚਾ ਕਰਨੀ ਚਾਹੀਦੀ ਹੈ ਤਾਂ ਜੋ ਕਿਸ਼ੋਰ ਅਵਸਥਾ ਵਿੱਚ ਆਉਂਦੇ ਬਦਲਾਵਾਂ ਬਾਰੇ ਬੱਚੀਆਂ ਨੂੰ ਜਾਣਕਾਰੀ ਹੋਵੇ। ਚੰਗੀ ਖੁਰਾਕ, ਸਹੀ ਸਾਂਭ ਸੰਭਾਲ ਅਤੇ ਸਾਫ਼ ਸਫ਼ਾਈ ਨਾਲ ਬੱਚੀਆਂ ਦੇ ਔਖੇ ਦਿਨਾਂ ਨੂੰ ਵੀ ਸੁਖਾਲ਼ਾ ਬਣਾਇਆ ਜਾ ਸਕਦਾ ਹੈ। ਇਸ ਮੌਕੇ ਮਲਟੀ ਪਰਪਜ਼ ਹੈਲਥ ਸੁਪਰਵਾਈਜਰ ਚਰਨਜੀਤ ਕੌਰ, ਆਸ਼ਾ ਫੇਸਿਲਟੇਟਰਸ ਗੌਰੀ ਬੀਬੀ, ਬੇਅੰਤ ਕੌਰ, ਗਿਆਨ ਕੌਰ, ਬਲਜੀਤ ਕੌਰ, ਕੁਲਦੀਪ ਕੌਰ, ਡਿੰਪਲ ਅਤੇ ਹੋਰ ਸਟਾਫ ਮੈਂਬਰ ਹਾਜ਼ਰ ਰਹੇ।