ਜੋ ਵਾਅਦੇ ਸਰਕਾਰਾਂ ਭੁੱਲ ਗਈਆਂ ਹਨ, ਉਹ ਅਸੀਂ ਪੂਰੇ ਕਰਵਾਂਵਾਗੇ: ਸਿਮਰਨਜੀਤ ਸਿੰਘ ਮਾਨ
ਮਾਲੇਰਕੋਟਲਾ : ਸ਼੍ਰੋਮਣੀ ਅਕਾਲੀ ਦਲ (ਅੰਮਿ੍ਤਸਰ) ਦੇ ਪ੍ਰਧਾਨ ਅਤੇ ਲੋਕ ਸਭਾ ਹਲਕਾ ਸੰਗਰੂਰ ਤੋਂ ਪਾਰਟੀ ਦੇ ਉਮੀਦਵਾਰ ਸ. ਸਿਮਰਨਜੀਤ ਸਿੰਘ ਮਾਨ ਦੇ ਹੱਕ ਵਿੱਚ ਅੱਜ ਤੀਜਾ ਵਿਸ਼ਾਲ ਰੋਡ ਸ਼ੋਅ ਕੱਢਿਆ ਗਿਆ, ਜਿਸਦੀ ਸ਼ੁਰੂਆਤ ਭਸੌੜ ਤੋਂ ਹੋਈ, ਜਿਸ ਤੋਂ ਬਾਅਦ ਠਾਠਾਂ ਮਾਰਦੇ ਲੋਕਾਂ ਦੇ ਇਕੱਠ ਦਾ ਇਹ ਕਾਫ਼ਲਾ ਈਸੜਾ, ਲੁਹਾਰ ਮਾਜਰਾ, ਢਢੋਗਲ, ਮੀਮਸਾ, ਧਾਂਦਰਾ, ਬਰੜਵਾਲ, ਧੂਰੀ ਸ਼ਹਿਰ, ਬੇਨੜੀ, ਕੱਕੜਵਾਲ, ਰਾਜੋਮਾਜਰਾ, ਜਹਾਂਗੀਰ, ਕਹੇਰੂ, ਬਮਾਲ, ਹਥਨ, ਘਨੌਰੀ ਕਲਾਂ, ਚਾਂਗਲੀ, ਕਾਤਰੋ, ਸ਼ੇਰਪੁਰ, ਬੜੀ, ਟਿੱਬਾ, ਗੰਡੇਵਾਲ, ਪੰਜਗਰਾਈਆਂ, ਬਾਪਲਾ, ਕਸਬਾ, ਸੰਦੌੜ, ਖੁਰਦ, ਸ਼ੇਰਗੜ੍ਹ ਚੀਮਾ, ਕੁਠਾਲਾ, ਭੂਦਨ, ਸਿਕੰਦਰਪੁਰਾ, ਕੇਲੋਂ, ਮਾਲੇਰਕੋਟਲਾ ਸਿਟੀ ਵਿੱਚੋਂ ਦੀ ਹੁੰਦਾ ਹੋਇਆ ਕਿੱਲਾ ਰਹਿਮਤਗੜ੍ਹ ਪਹੁੰਚ ਕੇ ਸੰਪੰਨ ਹੋਵੇਗਾ | ਇੱਥੇ ਵਰਨਣਯੋਗ ਹੈ ਕਿ ਲੋਕ ਆਪ ਮੁਹਾਰੇ ਆਪੋ ਆਪਣੇ ਸਾਧਨ ਲੈ ਕੇ ਰੋਡ ਸ਼ੋਅ ਵਿੱਚ ਸ਼ਾਮਲ ਹੋ ਰਹੇ ਸਨ ਅਤੇ ਵੱਖ-ਵੱਖ ਪਿੰਡਾਂ ਵਿੱਚ ਰੋਡ ਸ਼ੋਅ ਦਾ ਜੋਰਦਾਰ ਸਵਾਗਤ ਕੀਤਾ ਗਿਆ ਜਾ ਰਿਹਾ ਸੀ | ਆਲਮ ਇਹ ਸੀ ਕਿ ਜਿੱਥੋਂ-ਜਿੱਥੋਂ ਦੀ ਰੋਡ ਸ਼ੋਅ ਲੰਘਿਆ ਹਲਕੇ ਨੂੰ ਸ਼੍ਰੋਮਣੀ ਅਕਾਲੀ ਦਲ (ਅੰਮਿ੍ਤਸਰ) ਦੇ ਰੰਗ ਵਿੱਚ ਰੰਗ ਗਿਆ |
ਵੱਖ-ਵੱਖ ਥਾਵਾਂ 'ਤੇ ਰੋਡ ਸ਼ੋਅ ਨੂੰ ਸੰਬੋਧਨ ਕਰਦਿਆਂ ਸ. ਮਾਨ ਨੇ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ (ਅੰਮਿ੍ਤਸਰ) ਦੇ ਹੱਕ ਵਿੱਚ ਹਨ੍ਹੇਰੀ ਵਗ ਰਹੀ ਹੈ, ਜਿਸਨੇ ਸਾਰੀਆਂ ਪਾਰਟੀਆਂ ਨੂੰ ਚਿੰਤਾ ਵਿੱਚ ਪਾ ਰੱਖਿਆ ਹੈ | ਸਾਰੀਆਂ ਪਾਰਟੀਆਂ ਦਾ ਜੋਰ ਸੰਗਰੂਰ ਸੀਟ 'ਤੇ ਲੱਗਿਆ ਹੋਇਆ ਹੈ ਪਰ ਸੰਗਰੂਰ ਹਲਕੇ ਦੇ ਜਾਗਰੂਕ ਤੇ ਅਣਖੀ ਲੋਕ ਝੂਠੇ ਵਾਅਦੇ ਕਰਕੇ ਮੁਕਰਨ ਵਾਲੀਆਂ ਰਿਵਾਇਤੀ ਸਿਆਸੀ ਪਾਰਟੀਆਂ ਦੇ ਝਾਂਸੇ ਵਿੱਚ ਨਹੀਂ ਆਉਣਗੇ | ਉਨ੍ਹਾਂ ਕਿਹਾ ਕਿ ਜੋ ਵਾਅਦੇ ਲੋਕਾਂ ਨਾਲ ਕਰਕੇ ਸਰਕਾਰਾਂ ਭੁੱਲ ਚੁੱਕੀਆਂ ਹਨ, ਉਹ ਸਰਕਾਰਾਂ ਉੱਪਰ ਦਬਾਅ ਪਾ ਕੇ ਅਸੀਂ ਪੂਰੇ ਕਰਵਾਵਾਂਗੇ | ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਸਰਕਾਰਾਂ ਵੱਲੋਂ ਕੀਤੇ ਜੁਲਮਾਂ ਨੂੰ ਭੁੱਲਣਾ ਨਹੀਂ ਹੈ | ਇਨ੍ਹਾਂ ਦਾ ਹਿਸਾਬ 1 ਜੂਨ ਨੂੰ ਆਪਣੀ ਵੋਟ ਦੀ ਤਾਕਤ ਨਾਲ ਲੈਣਾ ਹੈ | ਸ. ਮਾਨ ਨੇ ਹਲਕੇ ਦੀ ਖੁਸ਼ਹਾਲੀ ਤੇ ਤਰੱਕੀ ਲਈ ਸ਼੍ਰੋਮਣੀ ਅਕਾਲੀ ਦਲ (ਅੰਮਿ੍ਤਸਰ) ਦੇ ਉਮੀਦਵਾਰਾਂ ਨੂੰ ਜਿਤਾਉਣ ਦੀ ਅਪੀਲ ਕੀਤੀ | ਰੋਡ ਸ਼ੋਅ ਵਿੱਚ ਪਾਰਟੀ ਦੀ ਸਮੁੱਚੀ ਲੀਡਰਸ਼ਿਪ, ਸਰਗਰਮ ਵਰਕਰ, ਸਮਰੱਥਕ ਅਤੇ ਵੱਡੀ ਗਿਣਤੀ ਵਿੱਚ ਹਲਕੇ ਦੇ ਆਮ ਲੋਕ ਸ਼ਾਮਲ ਹੋਏ |