ਨਵੀਂ ਦਿੱਲੀ: ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਸਰਕਾਰ ਨੂੰ ਨਿਸ਼ਾਨਾ ਬਣਾਉਂਦਿਆਂ ਕੋਵਿਡ 19 ਟੀਕਾਕਰਨ ਦੀ ਗਤੀ ’ਤੇ ਸਵਾਲ ਕੀਤਾ ਅਤੇ ਕਿਹਾ ਕਿ ਜੇ ਦੇਸ਼ ਦੇ ‘ਮਨ ਕੀ ਬਾਤ’ ਸਮਝੀ ਹੁੰਦੀ ਤਾਂ ਟੀਕਾਕਰਨ ਦੇ ਅਜਿਹੇ ਹਾਲਾਤ ਨਾ ਹੁੰਦੇ। ਉਨ੍ਹਾਂ ਦੀ ਟਿਪਣੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ‘ਮਨ ਕੀ ਬਾਤ’ ਪ੍ਰੋਗਰਾਮ ਤੋਂ ਠੀਕ ਪਹਿਲਾਂ ਆਈ। ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਨੇ ਟਵਿਟਰ ’ਤੇ ਕਿਹਾ, ‘ਜੇ ਸਮਝਦੇ ਦੇਸ਼ ਕੇ ਮਨ ਕੀ ਬਾਤ, ਅਜਿਹੇ ਨਾ ਹੁੰਦੇ ਟੀਕਾਕਰਨ ਦੇ ਹਾਲਾਤ।’ ਉਨ੍ਹਾਂ ਟੀਕਾਕਰਨ ਦੀ ਗਤੀ ’ਤੇ ਸਰਕਾਰ ਨੂੰ ਸਵਾਲ ਪੁੱਛਣ ਲਈ ‘ਵੇਅਰ ਆਰ ਵੈਕਸੀਨ’ ਹੈਸ਼ਟੈਗ ਦੀ ਵਰਤੋਂ ਕੀਤੀ। ਗਾਂਧੀ ਨੇ ਕਥਿਤ ਮੱਠੀ ਟੀਕਾਕਰਨ ਦਰ ਅਤੇ ਮੀਡੀਆ ਖ਼ਬਰਾਂ ਦਾ ਜ਼ਿਕਰ ਕਰਦਿਆਂ ਵੀਡੀਉ ਵੀ ਸਾਂਝੀ ਕੀਤੀ। ਵੀਡੀਉ ਵਿਚ ਭਾਰਤ ਦੇ ਟੀਕਾਕਰਨ ਅੰਕੜਿਆ ’ਤੇ ਰੌਸ਼ਨੀ ਪਾਈ ਗਈ ਹੈ ਜਿਸ ਦਾ ਉਦੇਸ਼ ਕੋਰੋਨਾ ਵਾਇਰਸ ਦੀ ਤੀਜੀ ਲਹਿਰ ਨੂੰ ਰੋਕਣਾ ਅਤੇ ਦਸੰਬਰ 2021 ਤਕ ਦੋਹਾਂ ਖੁਰਾਕਾਂ ਨਾਲ 60 ਫੀਸਦੀ ਆਬਾਦੀ ਦਾ ਟੀਕਾਕਰਲ ਕਰਨ ਦਾ ਟੀਚਾ ਹੈ। ਅੰਕੜਿਆਂ ਵਿਚ ਇਸ ਗੱਲ ਦਾ ਜ਼ਿਕਰ ਹੈ ਕਿ ਹਰ ਦਿਨ 93 ਲੱਖ ਲੋਕਾਂ ਦਾ ਟੀਕਾਕਰਨ ਕਰਨ ਦੀ ਲੋੜ ਹੈ।