ਟੀ-ਸੀਰੀਜ਼ ਦੇ ਮਾਲਕ ਭੂਸ਼ਣ ਕੁਮਾਰ ਵਿਰੁਧ ਬਲਾਤਕਾਰ ਦਾ ਪਰਚਾ ਦਰਜ

ਮੁੰਬਈ : ਟੀ-ਸੀਰੀਜ਼ ਦੇ ਮੈਨੇਜਿੰਗ ਡਾਇਰੈਕਟਰ ਭੂਸ਼ਣ ਕੁਮਾਰ ਵਿਰੁਧ ਮੁੰਬਈ ਦੇ ਡੀਐਨ ਨਗਰ ਪੁਲਿਸ ਸਟੇਸ਼ਨ ਵਿਚ ਬਲਾਤਕਾਰ ਦਾ ਪਰਚਾ ਦਰਜ ਹੋਇਆ ਹੈ। 30 ਸਾਲ ਦੀ ਔਰਤ ਨੇ ਕੁਮਾਰ ਵਿਰੁਧ ਬਲਾਤਕਾਰ ਦਾ ਦੋਸ਼ ਲਾਇਆ ਹੈ। ਔਰਤ ਦਾ ਕਹਿਣਾ ਹੈ ਕਿ ਭੂਸ਼ਣ ਨੇ ਉਸ ਨੂੰ ਅਪਣੇ ਪ੍ਰਾਜੈਕਟ ਵਿਚ ਕੰਮ ਦੇਣ ਦਾ ਲਾਲਚ ਦੇ ਕੇ ਵੱਖ ਵੱਖ ਥਾਵਾਂ ’ਤੇ ਲਿਜਾ ਕੇ ਰੇਪ ਕੀਤਾ ਸੀ। ਔਰਤ ਮੁਤਾਬਕ ਇਹ ਘਟਨਾਵਾਂ 2017 ਤੋਂ ਲੈ ਕੇ 2020 ਦੌਰਾਨ ਵਾਪਰੀਆਂ। ਇਸ ਮਾਮਲੇ ਵਿਚ ਪੁਲਿਸ ਨੇ ਭੂਸ਼ਣ ਕੁਮਾਰ ਵਿਰੁਧ ਆਈਪੀਸੀ ਦੀ ਧਾਰਾ 376 ਤੇ ਹੋਰ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਹੈ। ਭੂਸ਼ਣ ਇਸ ਵੇਲੇ ਮੁੰਬਈ ਤੋਂ ਬਾਹਰ ਹੈ। ਔਰਤ ਨੇ ਇਹ ਦੋਸ਼ ਵੀ ਲਾਇਆ ਹੈ ਕਿ ਭੂਸ਼ਣ ਕੁਮਾਰ ਨੇ ਉਸ ਦੀਆਂ ਤਸਵੀਰਾਂ ਅਤੇ ਵੀਡੀਉ ਫੈਲਾਉਣ ਦੀ ਧਮਕੀ ਦਿਤੀ ਸੀ ਹਾਲਾਂਕਿ ਇਨ੍ਹਾਂ ਦੋਸ਼ਾਂ ਬਾਬਤ ਟੀ.ਸੀਰੀਜ਼ ਵਲੋਂ ਕੋਈ ਸਪੱਸ਼ਟੀਕਰਨ ਨਹੀਂ ਆਇਆ। 2018 ਵਿਚ ਮੀ-ਟੂ ਮੁਹਿੰਮ ਦੌਰਾਨ ਭੂਸ਼ਣ ਕੁਮਾਰ ਉਤੇ ਇਕ ਔਰਤ ਨੇ ਜਿਸਮਾਨੀ ਸ਼ੋਸ਼ਣ ਦਾ ਦੋਸ਼ ਲਾਇਆ ਸੀ। ਭੂਸ਼ਣ ਨੇ ਉਨ੍ਹਾਂ ਦੋਸ਼ਾਂ ਨੂੰ ਗ਼ਲਤ ਦਸਿਆ ਸੀ। ਇਸ ਮਾਮਲੇ ਵਿਚ ਉਸ ਦੀ ਪਤਨੀ ਦਿਵਿਆ ਵੀ ਸਮਰਥਨ ਵਿਚ ਆਈ ਸੀ। ਦਿਵਿਆ ਨੇ ਕਿਹਾ ਸੀ-ਟੀਸੀਰੀਜ਼ ਅੱਜ ਜਿਸ ਮੁਕਾਮ ’ਤੇ ਹੈ, ਉਹ ਮੇਰੇ ਪਤੀ ਦੀ ਸਖ਼ਤ ਮਿਹਨਤ ਦਾ ਨਤੀਜਾ ਹੈ। ਲੋਕ ਤਾਂ ਭਗਵਾਨ ਕ੍ਰਿਸ਼ਨ ਵਿਰੁਧ ਵੀ ਖੜੇ ਹੋ ਗੲੈ ਸਨ। ਜ਼ਿਕਰਯੋਗ ਹੈ ਕਿ ਭੂਸ਼ਣ ਕੁਮਾਰ ਕਈ ਸੁਪਰਹਿੱਟ ਫ਼ਿਲਮਾਂ ਦਾ ਵੀ ਨਿਰਮਾਣ ਕਰ ਚੁੱਕ ਹਨ।