ਬਠਿੰਡਾ : ਇਥੋਂ ਦੇ ਨੇੜਲੇ ਪਿੰਡ ਨਰੂਆਣਾ ਦੇ ਰਹਿਣ ਵਾਲੇ ਗੈਂਗਸਟਰ ਤੋਂ ਸਮਾਜਸੇਵੀ ਬਣੇ ਕੁਲਵੀਰ ਨਰੂਆਣਾ ਦਾ ਉਸ ਦੇ ਸਾਥੀ ਸਣੇ ਕਤਲ ਉਸ ਦੇ ਹੀ ਗੰਨਮੈਨ ਨੇ ਕਰ ਦਿਤਾ ਅਤੇ ਅਤੇ ਫ਼ਰਾਰ ਹੋ ਗਿਆ ਹੈ। ਮ੍ਰਿਤਕ ਕੁਲਵੀਰ ਸਿੰਘ ਉਪਰ ਪਹਿਲਾਂ ਵੀ ਜਾਨਲੇਵਾ ਹਮਲੇ ਹੋਏ ਸਨ ਪਰ ਉਦੋਂ ਉਨ੍ਹਾਂ ਦੀ ਕਿਸਮਤ ਚੰਗੀ ਸੀ ਕਿ ਉਹ ਬਚ ਗਏ ਸਨ ਪਰ ਇਸ ਵਾਰ ਹੋਣੀ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ। ਜ਼ਿਕਰਯੋਗ ਹੈ ਕਿ ਕੁਲਵੀਰ ਨਰੂਆਣਾ ਦਾ ਕਤਲ ਉਸਦੇ ਹੀ ਨਿਜੀ ਗੰਨਮੈਨ ਵਲੋਂ ਕੀਤਾ ਗਿਆ ਹੈ। ਨਰੂਆਣਾ ਦੇ ਨਿਜੀ ਗੰਨਮੈਨ ਦਾ ਨਾਮ ਮਨਪ੍ਰੀਤ ਸਿੰਘ ਮੰਨਾ ਹੈ। ਇਥੇ ਦਸ ਦਈਏ ਕਿ ਅੱਜ ਸਵੇਰੇ ਨਰੂਆਣਾ ਦੀ ਰਿਹਾਇਸ਼ ‘ਤੇ ਹੀ ਉਸ ਨੂੰ ਗੋਲੀ ਮਾਰੀ। ਕੁਝ ਹਫਤੇ ਪਹਿਲਾਂ ਨਰੂਆਣਾ ‘ਤੇ ਰਿਗ ਰੋਡ ‘ਤੇ ਵਿਰੋਧੀਆਂ ਵਲੋਂ ਤਾਬੜਤੋੜ ਫਾਇਰਿੰਗ ਕੀਤੀ ਗਈ ਸੀ ਪਰ ਉਸ ਵਕਤ ਉਨ੍ਹਾਂ ਦੀ ਜਾਨ ਬਚ ਗਈ ਸੀ। ਉਸ ਵਕਤ ਇੱਕ ਦਰਜਨ ਤੋਂ ਜਿਆਦਾ ਫਾਇਰ ਹੋਏ ਸਨ ਅਤੇ ਕੁਝ ਗੋਲੀਆਂ ਕੁਲਵੀਰ ਦੀ ਬੁਲੇਟ ਪਰੂਫ ਗੱਡੀ ‘ਚ ਜਾ ਲੱਗੀਆਂ ਜਿਸਦੇ ਕਾਰਨ ਉਹ ਉਦੋਂ ਵਾਲ-ਵਾਲ ਬਚ ਗਏ ਸਨ। ਸੂਚਨਾ ਮਿਲਣ ਉਤੇ ਪੁਲਿਸ ਨੇ ਮੌਕੇ ਦਾ ਜਾਇਜ਼ਾ ਲਿਆ ਅਤੇ ਮੁਲਜ਼ਮ ਨੂੰ ਕਾਬੂ ਕਰਨ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿਤੀ ਹੈ। ਇਥੇ ਇਹ ਵੀ ਦਸ ਦਈਏ ਕਿ ਸਾਬਕਾ ਗੈਂਗਸਟਰ ਕੁਲਵੀਰ ਨਰੂਆਣਾ ਜੇਲ ਤੋਂ ਜ਼ਮਾਨਤ 'ਤੇ ਆ ਕੇ ਸਮਾਜ ਸੇਵੀ ਕੰਮਾਂ ‘ਚ ਲੱਗਾ ਸੀ ਅਤੇ ਸਾਬਕਾ ਗੈਂਗਸਟਰ ਲੱਖਾ ਸਿਧਾਣਾ ਨੂੰ ਵੀ ਕਿਸਾਨ ਅੰਦੋਲਨ ‘ਚ ਸਹਿਯੋਗ ਦਿੱਤਾ ਸੀ।