ਚੰਡੀਗੜ੍ਹ: ਪੂਰੇ ਦੇਸ਼ ਵਿਚ ਅਤਿ ਦੀ ਗ਼ਰਮੀ ਪੈ ਰਹੀ ਹੈ ਅਜਿਹੇ ਵਿਚ ਸਾਰਿਆਂ ਨੂੰ ਬਾਰਸ਼ ਦਾ ਇੰਤਜਾਰ ਹੈ ਪਰ ਇਹ ਉਡੀਕ ਕੁਝ ਦੇਰ ਲਈ ਲੰਮੀ ਹੋ ਸਕਦੀ ਹੈ। ਇਹ ਕਹਿਣਾ ਹੈ ਮੌਸਮ ਵਿਭਾਗ ਦਾ । ਦਰਅਸਲ ਰਾਜਸਥਾਨ, ਦਿੱਲੀ, ਹਰਿਆਣਾ ਤੇ ਪੰਜਾਬ ਦੇ ਕੁਝ ਹਿੱਸਿਆਂ ਨੂੰ ਛੱਡ ਕੇ ਮਾਨਸੂਨ ਦੇਸ਼ ਦੇ ਬਾਕੀ ਹਿੱਸਿਆਂ 'ਚ ਛਾਅ ਚੁੱਕਿਆ ਹੈ। ਅਗਲੇ ਸੱਤ ਦਿਨਾਂ ਦੌਰਾਨ ਦੇਸ਼ ਦੇ ਬਾਕੀ ਹਿੱਸਿਆਂ 'ਚ ਮਾਨਸੂਨ ਦੇ ਹੋਰ ਅੱਗੇ ਵਧਣ ਦੀ ਸੰਭਾਵਨਾ ਨਹੀਂ ਹੈ।
ਦਿੱਲੀ-ਐਨਸੀਆਰ 'ਚ 26 ਜੂਨ ਦੇ ਆਸਪਾਸ ਹਲਕੀ ਬਾਰਸ਼ ਹਣ ਦਾ ਅੰਦਾਜ਼ਾ ਹੈ। ਪਰ ਇਸ ਖੇਤਰ ਨੂੰ ਅਜੇ ਮਾਨਸੂਨੀ ਬਾਰਸ਼ ਦਾ ਹੋਰ ਇੰਤਜ਼ਾਰ ਕਰਨਾ ਪਵੇਗਾ। ਮੌਸਮ ਵਿਭਾਗ ਨੇ ਇਸ ਤੋਂ ਪਹਿਲਾਂ ਅੰਦਾਜ਼ਾ ਲਾਇਆ ਸੀ ਕਿ ਮਾਨਸੂਨ 12 ਦਿਨ ਪਹਿਲਾਂ ਯਾਨੀ 15 ਜੂਨ ਤਕ ਦਿੱਲੀ ਪਹੁੰਚ ਸਕਦਾ ਹੈ। ਆਮਤੌਰ 'ਤੇ ਮਾਨਸੂਨ 27 ਜੂਨ ਤਕ ਦਿੱਲੀ ਪਹੁੰਚ ਜਾਂਦਾ ਹੈ ਤੇ ਅੱਠ ਜੁਲਾਈ ਤਕ ਪੂਰੇ ਦੇਸ਼ 'ਚ ਛਾਅ ਜਾਂਦਾ ਹੈ।
ਮੌਸਮ ਦਾ ਅਨੁਮਾਨ ਲਾਉਣ ਵਾਲੀ ਨਿੱਜੀ ਕੰਪਨੀ ਸਕਾਈਮੈੱਟ ਵੈਦਰ ਮੁਤਾਬਕ ਪੱਛਮੀ ਹਵਾਵਾਂ ਕੁਝ ਦਿਨਾਂ ਤੋਂ ਉੱਤਰ-ਪੱਛਮੀ ਭਾਰਤ ਦੇ ਬਾਕੀ ਹਿੱਸਿਆਂ 'ਚ ਮਾਨਸੂਨ ਅੱਗੇ ਵਧਣ ਤੋਂ ਰੋਕ ਰਹੀਆਂ ਹਨ। ਇਨ੍ਹਾਂ ਦੇ ਘੱਟੋ-ਘੱਟ ਇਕ ਹਫ਼ਤਾ ਬਣੇ ਰਹਿਣ ਦੀ ਉਮੀਦ ਹੈ। ਦੇਸ਼ ਦੇ ਇਸ ਮਾਨਸੂਨੀ ਮੌਸਮ 'ਚ ਹੁਣ ਤਕ 37 ਫੀਸਦ ਵਾਧੂ ਬਾਰਸ਼ ਹੋ ਚੁੱਕੀ ਹੈ। ਮੌਸਮ ਵਿਭਾਗ ਦੇ ਮੁਤਾਬਕ 21 ਜੂਨ ਤਕ ਆਮ 10.05 ਸੈਂਟੀਮੀਟਰ ਦੇ ਮੁਕਾਬਲੇ 13.78 ਮੈਂਟੀਮੀਟਰ ਬਾਰਸ਼ ਦਰਜ ਕੀਤੀ ਗਈ। ਉੱਤਰ-ਪੱਛਮੀ ਭਾਰਤ 'ਚ 40.5 ਮਿਲੀਮੀਟਰ ਆਮ ਬਾਰਸ਼ ਦੇ ਮੁਕਾਬਲੇ 71.3 ਮਿਮੀ ਬਾਰਸ਼ ਹੋਈ ਜੋ 76 ਫੀਸਦ ਜ਼ਿਆਦਾ ਹੈ।