ਆਗਰਾ : ਆਗਰਾ ਵਿਚ ਸੋਮਵਾਰ ਸਵੇਰੇ ਇਕ ਪਰਵਾਰ ’ਤੇ ਮੁਸੀਬਤਾਂ ਦਾ ਪਹਾੜ ਟੁੱਟ ਗਿਆ। ਥਾਣਾ ਫ਼ਤਿਹਬਾਦ ਦੇ ਨਿਬੋਹਰਾ ਦੇ ਪਿੰਡ ਧਰੀਆਈ ਵਿਚ ਘਰ ਸਾਹਮਣੇ ਖੁਲ੍ਹੇ ਕਰੀਬ 100 ਫ਼ੁੱਟ ਡੂੰਘੇ ਬੋਰਵੈੱਲ ਵਿਚ ਤਿੰਨ ਸਾਲ ਦਾ ਬੱਚਾ ਡਿੱਗ ਗਿਆ। ਹਾਦਸਾ ਉਸ ਸਮੇਂ ਵਾਪਰਿਆ ਜਦ ਬੱਚਾ ਖੇਡ ਰਿਹਾ ਸੀ। ਨਾਲ ਖੇਡ ਰਹੇ ਬੱਚਿਆਂ ਨੇ ਤੁਰੰਤ ਉਸ ਦੇ ਮਾਪਿਆਂ ਨੂੰ ਜਾ ਕੇ ਦਸਿਆ ਤੇ ਭਾਜੜ ਮੱਚ ਗਈ। ਆਲੇ ਦੁਆਲੇ ਦੇ ਲੋਕ ਇਕੱਠੇ ਹੋ ਗਏ ਤੇ ਬੱਚੇ ਨੂੰ ਕੱਢਣ ਦੀਆਂ ਕੋਸ਼ਿਸ਼ਾਂ ਸ਼ੁਰੂ ਹੋ ਗਈਆਂ। ਪੁਲਿਸ ਨੂੰ ਵੀ ਸੂਚਨਾ ਦਿਤੀ ਗਈ। ਜਾਣਕਾਰੀ ਅਨੁਸਾਰ ਤਿੰਨ ਸਾਲਾ ਸ਼ਿਵਾ ਘਰ ਦੇ ਬਾਹਰ ਖੇਡ ਰਿਹਾ ਸੀ। ਇਸੇ ਦੌਰਾਨ ਉਹ ਬੋਰਵੈਲ ਵਿਚ ਡਿੱਗ ਪਿਆ। ਤਾਜ਼ਾ ਜਾਣਕਾਰੀ ਮੁਤਾਬਕ ਜਦ ਬੱਚੇ ਨੂੰ ਬਾਹਰ ਕੱਢਣ ਦੀਆਂ ਸਾਰੀਆਂ ਕੋਸ਼ਿਸ਼ਾਂ ਨਾਕਾਮ ਹੋ ਗਈਆਂ ਤਾਂ ਫ਼ੌਜ ਨੂੰ ਇਤਲਾਹ ਦਿਤੀ ਗਈ। ਮੌਕੇ ’ਤੇ ਫ਼ੌਜ ਪਹੁੰਚ ਗਈ ਹੈ ਅਤੇ ਬੱਚੇ ਨੂੰ ਕੱਢਣ ਦੇ ਯਤਨ ਜਾਰੀ ਹਨ।