ਟੀਐਮਸੀ ਸੰਸਦ ਮੈਂਬਰ ਅਤੇ ਅਦਾਕਾਰਾ ਨੁਸਰਤ ਦੇ ਪਤੀ ਨੇ ਦਿਤੇ ਉਸ ਨੂੰ ਜਵਾਬ

ਕੋਲਕਾਤਾ : ਬੰਗਾਲੀ ਅਦਾਕਾਰਾ ਅਤੇ ਤ੍ਰਿਣਮੂਲ ਕਾਂਗਰਸ ਦੀ ਸੰਸਦ ਮੈਂਬਰ ਨੁਸਰਤ ਜਹਾਂ ਦੇ ਦੋਸ਼ਾਂ ਦਾ ਉਸ ਦੇ ਪਤੀ ਨਿਖਿਲ ਜੈਨ ਨੇ ਜਵਾਬ ਦਿਤਾ ਹੈ। ਉਨ੍ਹਾਂ ਕਿਹਾ ਕਿ ਜਦ ਅਸੀਂ ਇਕੱਠੇ ਰਹਿ ਰਹੇਸੀ ਤਾਂ ਮੈਂ ਕਈ ਵਾਰ ਨੁਸਰਤ ਨੂੰ ਵਿਆਹ ਰਜਿਸਟਰ ਕਰਾਉਣ ਲਈ ਕਿਹਾ ਪਰ ਉਸ ਨੇ ਮੇਰੀ ਗੱਲ ਨਾ ਸੁਣੀ। 5 ਨਵੰਬਰ 2020 ਨੂੰ ਨੁਸਰਤ ਅਪਣਾ ਬੈਗ ਅਤੇ ਸਮਾਨ ਲੈ ਕੇ ਅਪਣੇ ਨਿਜੀ ਫ਼ਲੈਟ ਵਿਚ ਸ਼ਿਫ਼ਟ ਹੋ ਗਈ। ਫਿਰ ਅਸੀਂ ਕਦੇ ਵੀ ਨਾਲ ਨਹੀਂ ਰਹੇ। ਉਹ ਅਪਣੀਆਂ ਸਾਰੀਆਂ ਚੀਜ਼ਾਂ ਅਤੇ ਕਾਗਜ਼ ਵੀ ਲੈ ਗਈ। ਜ਼ਿਕਰਯੋਗ ਹੈ ਕਿ ਨੁਸਰਤ ਨੇ ਪਿਛਲੇ ਦਿਨੀਂ ਅਪਣੇ ਪਤੀ ਤੋਂ ਅਲੱਗ ਹੋਣ ਦਾ ਐਲਾਨ ਕੀਤਾ ਸੀ ਅਤੇ ਉਸ ਉਤੇ ਬੈਂਕ ਖਾਤੇ ਵਿਚੋਂ ਪੈਸੇ ਕਢਵਾਉਣ ਦਾ ਦੋਸ਼ ਲਾਇਆ ਸੀ। ਨਿਖਿਲ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੁਸਰਤ ਤੋਂ ਗ਼ਲਤ ਤਰੀਕੇ ਨਾਲ ਕਦੇ ਵੀ ਪੈਸੇ ਨਹੀਂ ਲਏ। ਨੁਸਰਤ ਨੇ ਵਿਆਹ ਤੋਂ ਪਹਿਲਾਂ ਕਰਜ਼ਾ ਲਿਆ ਸੀ, ਉਸ ਦੇ ਦਬਾਅ ਨੂੰ ਘਟਾਉਣ ਲਈ ਨਿਖਿਲ ਨੇ ਨੁਸਰਤ ਦੀ ਆਰਥਕ ਮਦਦ ਕੀਤੀ ਸੀ। ਨਿਖਿਲ ਦਾ ਕਹਿਣਾ ਹੈ ਕਿ ਬੈਂਕ ਸਟੇਟਮੈਂਟ ਵਿਚੋਂ ਸਾਰਾ ਕੁਝ ਪਤਾ ਚੱਲ ਸਕਦਾ ਹੈ। ਉਸ ਨੇ ਕਿਹਾ ਕਿ ਉਸ ਨੇ ਨੁਸਰਤ ਵਾਸਤੇ ਬਹੁਤ ਕੁਝ ਕੀਤਾ ਪਰ ਵਿਆਹ ਦੇ ਕੁਝ ਹੀ ਸਮੇਂ ਬਾਅਦ ਨੁਸਰਤ ਦਾ ਵਿਹਾਰ ਬਦਲ ਗਿਆ। ਉਸ ਨੇ ਕਿਹਾ ਕਿ ਸਾਡੇ ਵਿਚਾਲੇ ਪਿਆਰ ਨਹੀਂ ਸੀ, ਇਸ ਦੇ ਬਾਵਜੂਦ ਮੈਂ ਵੀ ਨੁਸਰਤ ਨੂੰ ਪ੍ਰਪੋਜ਼ ਕੀਤਾ ਸੀ। ਅਸੀਂ ਸੁਸਾਇਟੀ ਵਿਚ ਪਤੀ ਪਤਨੀ ਵਾਂਗ ਰਹੇ। ਕੋਲਕਾਤਾ ਵਿਚ ਵਿਆਹ ਦੀ ਪਾਰਟੀ ਦਿਤੀ। ਤੁਰਕੀ ਵੀ ਗਏ ਪਰ ਨੁਸਰਤ ਦਾ ਸੁਭਾਅ ਵਿਆਹ ਤੋਂ ਬਾਅਦ ਬਦਲ ਗਿਆ।