ਮੁੰਬਈ : ਬੀਤੇ ਜ਼ਮਾਨੇ ਦੇ ਮਸ਼ਹੂਰ ਅਦਾਕਾਰ ਦਲੀਪ ਕੁਮਾਰ ਨੂੰ ਅੱਜ ਹਸਪਤਾਲ ਤੋਂ ਛੁੱਟੀ ਮਿਲ ਗਈ। ਉਨ੍ਹਾਂ ਨੂੰ ਸਟਰੈਚਰ ’ਤੇ ਬਾਹਰ ਲਿਆਂਦਾ ਗਿਆ। ਉਹ ਬੇਹੱਦ ਕਮਜ਼ੋਰ ਨਜ਼ਰ ਆਏ। ਉਨ੍ਹਾਂ ਦੇ ਮੂੰਹ ’ਤੇ ਮਾਸਕ ਲੱਗਾ ਹੋਇਆ ਸੀ। ਉਨ੍ਹਾਂ ਦੀ ਪਤਨੀ ਸਾਇਰਾ ਬਾਨੋ ਕਦੇ ਹੱਥ ਹਿਲਾ ਕੇ ਬਾਹਰ ਮੌਜੂਦ ਮੀਡੀਆ ਵਾਲਿਆਂ ਦਾ ਧਨਵਾਦ ਕਰ ਰਹੀ ਸੀ ਤਾਂ ਕਦੇ ਦਲੀਪ ਕੁਮਾਰ ਦਾ ਮੱਥਾ ਚੁੰਮ ਰਹੀ ਸੀ। 98 ਸਾਲ ਦੇ ਦਲੀਪ ਕੁਮਾਰ ਇਥੇ ਪੰਜ ਦਿਨ ਦਾਖ਼ਲ ਰਹੇ। ਐਤਵਾਰ ਨੂੰ ਸਾਹ ਲੈਣ ਵਿਚ ਤਕਲੀਫ਼ ਹੋਣ ਦੇ ਬਾਅਦ ਉਨ੍ਹਾਂ ਨੂੰ ਹਸਪਤਾਲ ਦਾਖ਼ਲ ਕਰਾਇਆ ਗਿਆ ਸੀ। ਜਾਂਚ ਵਿਚ ਪਤਾ ਲੱਗਾ ਕਿ ਉਨ੍ਹਾਂ ਦੇ ਫੇਫੜਿਆਂ ਵਿਚ ਪਾਣੀ ਭਰ ਗਿਆ ਸੀ। ਇਸ ਹਾਲਤ ਨੂੰ ਬਾਇਲਿਟਲ ਪਲਯੂਰਲ ਇਨਫ਼ਿਊਜ਼ਨ ਕਿਹਾ ਜਾਂਦਾ ਹੈ। ਹਿੰਦੂਜਾ ਹਸਪਤਾਲ ਦੇ ਡਾਕਟਰ ਜਲੀਲ ਪਾਰਕਰ ਨੇ ਕਿਹਾ, ‘ਫੇਫੜਿਆਂ ਵਿਚ ਪਾਣੀ ਭਰਨਾ ਉਮਰ ਸਬੰਧੀ ਦਿੱਕਤ ਹੈ।’ ਦਲੀਪ ਕੁਮਾਰ ਵਲੋਂ ਫ਼ੈਜ਼ਲ ਫ਼ਾਰੂਕੀ ਨੇ ਉਨ੍ਹਾਂ ਦੇ ਡਿਸਚਾਰਜ ਹੋਣ ਦੀ ਜਾਣਕਾਰੀ ਸੋਸ਼ਲ ਮੀਡੀਆ ਵਿਚ ਦਿਤੀ। ਉਨ੍ਹਾਂ ਲਿਖਿਆ, ‘ਤੁਹਾਡੇ ਪਿਆਰ, ਸਨੇਹ ਅਤੇ ਦੁਆਵਾਂ ਨਾਲ ਦਲੀਪ ਸਾਹਿਬ ਹਸਪਤਾਲ ਤੋਂ ਘਰ ਜਾ ਰਹੇ ਹਨ। ਡਾਕਟਰਾਂ ਦੀ ਪੂਰੀ ਟੀਮ ਜ਼ਰੀਏ ਅੱਲ੍ਹਾ ਦਾ ਰਹਿਮ ਰਿਹਾ।’