ਨਵੀਂ ਦਿੱਲੀ: ਸਾਬਕਾ ਕੇਂਦਰੀ ਮੰਤਰੀ ਜਿਤਿਨ ਪ੍ਰਸਾਦ ਦੇ ਭਾਜਪਾ ਵਿਚ ਸ਼ਾਮਲ ਹੋਣ ਦੇ ਬਾਅਦ ਹੁਣ ਕਾਂਗਰਸ ਅੰਦਰ ਵੀ ਘੁਸਰ-ਮੁਸਰ ਸ਼ੁਰੂ ਹੋ ਗਈ ਹੈ। ਜਿਤਿਨ ਦੇ ਬਾਅਦ ਉਨ੍ਹਾਂ ਆਗੂਆਂ ਦੀ ਚਰਚਾ ਹੈ ਜੋ ਪਾਰਟੀ ਹਾਈ ਕਮਾਨ ਨਾਲ ਨਾਰਾਜ਼ਗੀ ਜ਼ਾਹਰ ਕਰ ਚੁੱਕੇ ਹਨ। ਕਾਂਗਰਸ ਦੇ ਸੀਨੀਅਰ ਆਗੂ ਕਪਿਲ ਸਿੱਬਲ ਨੇ ਦਾਅਵਾ ਕੀਤਾ ਹੈ ਕਿ ਉਹ ਸੱਚੇ ਕਾਂਗਰਸੀ ਹਨ ਅਤੇ ਭਾਜਪਾ ਵਿਚ ਕਦੇ ਨਹੀਂ ਜਾਣਗੇ। ਉਨ੍ਹਾਂ ਜਿਤਿਨ ਦੇ ਭਾਜਪਾ ਵਿਚ ਜਾਣ ’ਤੇ ਹੈਰਾਨੀ ਜ਼ਾਹਰ ਕਰਨ ਦੇ ਨਾਲ ਪਾਰਟੀ ਲੀਡਰਸ਼ਿਪ ਨੂੰ ਇਸ਼ਾਰਿਆਂ ਵਿਚ ਸੁਨੇਹਾ ਦਿਤਾ। ਕਾਂਗਰਸ ਛੱਡਣ ਦੇ ਸਵਾਲ ’ਤੇ ਕਪਿਲ ਨੇ ਕਿਹਾ, ‘ਅਸੀਂ ਸੱਚੇ ਕਾਂਗਰਸੀ ਹਾਂ, ਮੈਂ ਅਪਣੇ ਜੀਵਨ ਵਿਚ ਕਦੇ ਵੀ ਭਾਜਪਾ ਵਿਚ ਸ਼ਾਮਲ ਹੋਣ ਬਾਰੇ ਨਹੀਂ ਸੋਚਾਂਗਾ।’ ਉਨ੍ਹਾਂ ਕਿਹਾ ਕਿ ਅਜਿਹੇ ਫ਼ੈਸਲੇ ਨੂੰ ਮੇਰੇ ਮ੍ਰਿਤਕ ਸਰੀਰ ਵਿਚੋਂ ਹੋ ਕੇ ਲੰਘਣਾ ਪਵੇਗਾ। ਹੋ ਸਕਦਾ ਹੈ ਕਿ ਜੇ ਕਾਂਗਰਸ ਲੀਡਰਸ਼ਿਪ ਮੈਨੂੰ ਜਾਣ ਲਈ ਕਹਿੰਦੀ ਹੈ ਤਾਂ ਮੈਂ ਉਸ ਆਧਾਰ ’ਤੇ ਪਾਰਟੀ ਛੱਡਣ ਲਈ ਸੋਚ ਸਕਦਾ ਹਾਂ ਪਰ ਭਾਜਪਾ ਵਿਚ ਸ਼ਾਮਲ ਨਹੀਂ ਹੋਵਾਂਗਾ। ਜਿਤਿਨ ਪ੍ਰਸਾਦ ਦੇ ਭਾਜਪਾ ਵਿਚ ਸ਼ਾਮਲ ਹੋਣ ਬਾਰੇ ਉਨ੍ਹਾਂ ਕਿਹਾ, ‘ਜਿਤਿਨ ਨੇ ਜੋ ਕੀਤਾ ਹੈ,ਮੈਂ ਉਸ ਦੇ ਵਿਰੁਧ ਨਹੀਂ ਹਾਂ। ਜ਼ਰੂਰ ਕੋਈ ਕਾਰਨ ਰਿਹਾ ਹੋਵੇਗਾ ਜੋ ਜ਼ਾਹਰ ਨਹੀਂ ਹੋਇਆ ਪਰ ਭਾਜਪਾ ਨਾਲ ਜੁੜਨ ਦਾ ਫ਼ੈਸਲਾ ਮੈਂ ਸਮਝ ਨਹੀਂ ਸਕਦਾ। ਇਹ ਦਸਦਾ ਹੈ ਕਿ ਅਸੀਂ ‘ਆਇਆ ਰਾਮ ਗਯਾ ਰਾਮ’ ਤੋਂ ‘ਪ੍ਰਸਾਦ ਪਾਲਿਟਿਕਸ ਵਿਚ ਪਹੁੰਚ ਗਏ ਹਾਂ ਜਿਥੇ ਪ੍ਰਸਾਦ ਮਿਲੇ ਉਥੇ ਪਾਰਟੀ ਜੁਆਇਨ ਕਰ ਲਓ। ਜ਼ਿਕਰਯੋਗ ਹੈ ਕਿ ਪਿਛੇ ਜਿਹੇ ਕਪਿਲ ਸਿੱਬਲ ਸਮੇਤ ਕੁਲ 23 ਸੀਨੀਅਰ ਆਗੂਆਂ ਨੇ ਹਾਈ ਕਮਾਨ ਵਿਚ ਲੀਡਰਸ਼ਿਪ ਤਬਦੀਲੀ ਦੀ ਵਕਾਲਤ ਕੀਤੀ ਸੀ।