ਕੁਦਰਤੀ ਆਫਤਾਂ ਸਮੇਂ ਕੰਮ ਦਾ ਤਜਰਬਾ ਰੱਖਣ ਵਾਲੇ ਅਫਸਰਾਂ ਨੂੰ ਮੁੱਖ ਦਫਤਰਾਂ ਚੋਂ ਕੱਢ ਕੇ ਲਗਾਇਆ ਜਾਵੇ ਜਮੀਨੀ ਪੱਧਰ ਤੇ

ਚੰਡੀਗੜ : ਕੁਦਰਤੀ ਆਫ ਸ਼ਬਦ ਹੀ ਡਰਾਉਣਾ ਨਹੀਂ ਸਗੋਂ ਜਮੀਨੀ ਪੱਧਰ ਤੇ ਮਨੁੱਖੀ ਜਨ ਜੀਵਨ ਨੂੰ ਤਹਿਸ-ਨਹਿਸ ਕਰ ਸਕਦਾ ਹੈ। ਸਾਰੀ ਦੁਨੀਆਂ ਨੂੰ ਪਤਾ ਹੈ ਕਿ ਪੰਜਾਬ ਇਸ ਸਮੇਂ ਹੜਾਂ ਦੀ ਮਾਰ ਹੇਠ ਹੈ ਇਸ ਸਮੇਂ ਸਰਕਾਰਾਂ ਨੂੰ ਦੋਸ਼ ਦੇਣਾ ਜਾਂ ਵਿਰੋਧੀਆਂ ਤੇ ਹਮਲੇ ਕਰਨੇ ਮੁਨਾਸਬ ਨਹੀਂ ਮੈਂ ਸਦਾ ਲਿਖਦਾ ਹਾਂ ਕਿ ਕੁਦਰਤੀ ਆਫਤ ਸਮੇਂ ਸਿਰਫ ਮੱਦਦ ਦੀ ਜਰੂਰਤ ਹੁੰਦੀ ਹੈ। ਸਰਕਾਰਾਂ ਕੋਲ ਬਹੁਤ ਪਾਵਰ ਹੁੰਦੀ ਹੈ, ਹੀਲੇ-ਵਸੀਲੇ ਹੁੰਦੇ ਹਨ ਜਿਸ ਨਾਲ ਇਹ ਲੋਕਾਂ ਦੀ ਮੱਦਦ ਕਰ ਸਕਦੀ ਹੈ।ਇਸ ਲਈ ਲੋੜ ਹੁੰਦੀ ਹੈ ਸਹੀ ਸਮੇਂ ਤੇ ਸਹੀ ਫੈਸਲਾ ਲੈਣ ਦੀ ਪੰਜਾਬ ਸਰਕਾਰ ਨੂੰ ਹੁਣ ਸਹੀ ਫੈਸਲਾ ਲੈਣਾ ਚਾਹੀਦਾ ਹੈ ਸਰਕਾਰ ਨੂੰ ਚਾਹੀਦਾ ਹੈ ਕਿ ਚੰਗੇ ਅਫਸਰ ਚੁਣੇ ਜਾਣ ਜੋ ਕੁਦਰਤੀ ਆਫਤ ਸਮੇਂ ਕੰਮ ਕਰਨ ਦਾ ਤਜਰਬਾ ਰੱਖਦੇ ਹਨ। ਹੇਠਲੇ ਪੱਧਰ ਤੇ ਸਰਕਾਰੀ ਮਸ਼ੀਨਰੀ ਜੋ ਕੰਮ ਕਰ ਰਹੀ ਹੈ, ਉਸ ਨੂੰ ਚੰਗੇ ਅਫਸਰ ਲੀਡ ਕਰਨ ਤਾਂ ਜੋ ਸਰਕਾਰੀ ਮਸ਼ੀਨਰੀ ਅਤੇ ਖਜ਼ਾਨੇ ਦੀ ਸਹੀ ਵਰਤੋਂ ਹੋ ਸਕੇ। ਹੁਣ ਫੌਰੀ ਤੌਰ ਤੇ ਅਜਿਹੇ ਅਫਸਰਾਂ ਨੂੰ ਸਰਕਾਰ ਆਈਡੈਂਟੀਫਾਈ ਕਰੇ ਜੋ ਜਮੀਨੀ ਪੱਧਰ ਤੇ ਕੁਦਰਤੀ ਆਫਤਾਂ ਸਮੇਂ ਕੰਮ ਕਰਨ ਦੇ ਮਾਹਿਰ ਹਨ। ਉਹਨਾਂ ਨੂੰ ਚੰਡੀਗੜ੍ਹ ਮੁੱਖ ਦਫਤਰਾਂ ਵਿੱਚੋਂ ਬਦਲ ਕੇ ਲੋੜੀਦੇ ਪ੍ਰਭਾਵਿਤ ਜ਼ਿਲ੍ਹਿਆਂ ਵਿੱਚ ਫੌਰੀਤੌਰ ਤੇ ਤਬਦੀਲ ਕਰ ਦੇਣਾ ਚਾਹੀਦਾ ਹੈ। ਬੇਸ਼ੱਕ ਪੂਰੇ ਪੰਜਾਬ ਵਿੱਚ ਅਫਸਰਸ਼ਾਹੀ ਹੇਠਲੇ ਪੱਧਰ ਤੇ ਕੰਮ ਕਰ ਵੀ ਰਹੀ ਹੈ ਪਰ ਡਿਪਟੀ ਕਮਿਸ਼ਨਰ ਸ੍ਰੀ ਅੰਮ੍ਰਿਤਸਰ ਸਾਹਿਬ ਸ੍ਰੀਮਤੀ ਸਾਕਸੀ ਸਾਹਨੀ ਦੀ ਸੋਸ਼ਲ ਮੀਡੀਆ ਤੇ ਇਨੀ ਦਿਨੀ ਖੂਬ ਚਰਚਾ ਹੈ, ਪੰਜਾਬ ਦੇ ਲੋਕਾਂ ਨੇ ਉਹਨਾਂ ਨੂੰ ਮਾਝੇ ਦੀ ਬੇਟੀ ਦਾ ਖਿਤਾਬ ਵੀ ਦੇ ਦਿੱਤਾ ਹੈ। ਇਸ ਲੇਡੀ ਅਫਸਰ ਨੇ ਹੇਠਲੇ ਪੱਧਰ ਤੇ ਉਤਰ ਕੇ ਲੋਕਾਂ ਦੀਆਂ ਮੁਸ਼ਕਿਲਾਂ ਸੁਣੀਆਂ ਅਤੇ ਉਹਨਾਂ ਨੂੰ ਆਪਣੇ ਪਣ ਦਾ ਅਹਿਸਾਸ ਕਰਵਾਇਆ, ਜਿਸ ਨਾਲ ਅੱਜ ਉਹ ਪੂਰੇ ਪੰਜਾਬ ਦੇ ਲੋਕਾਂ ਦੇ ਹਮਦਰਦੀ ਬਣ ਗਏ ਹਨ। ਬੇਸ਼ੱਕ ਪੂਰੇ ਪੰਜਾਬ ਵਿੱਚ ਅਫਸਰ ਸ਼ਾਹੀ ਪੰਜਾਬ ਦੇ ਹੜ ਪੀੜਤਾਂ ਦੀ ਮੱਦਦ ਕਰਨ ਵਿੱਚ ਲੱਗੀ ਹੋਈ ਹੈ ਪਰ ਇੱਕ ਦੋ ਨਾਮ ਜਰੂਰ ਉਭਰ ਕੇ ਆਏ ਹਨ ਜੋ ਇਸ ਸਮੇਂ ਕੰਮ ਕਰ ਰਹੇ ਹਨ ਜਾਂ ਜਿਨਾਂ ਨੇ ਇਸ ਤੋਂ ਪਹਿਲਾਂ ਕਰੋਨਾ ਕਾਲ ਸਮੇਂ ਪੰਜਾਬ ਵਿੱਚ ਕੰਮ ਕੀਤਾ ਸੀ, ਜਿਸ ਵਿੱਚ ਮੁੱਖ ਨਾਮ ਸ੍ਰੀ ਸੰਦੀਪ ਗੋਇਲ IPS ਦਾ ਗੂੰਜ ਰਿਹਾ ਹੈ। ਇਸ ਕੁਦਰਤੀ ਆਫਤ ਸਮੇਂ ਬਰਨਾਲਾ ਦੇ ਲੋਕ ਸ੍ਰੀ ਸੰਦੀਪ ਗੋਇਲ ਨੂੰ ਯਾਦ ਕਰ ਰਹੇ ਹਨ। ਬਰਨਾਲਾ ਦੇ ਲੋਕ ਕਹਿ ਰਹੇ ਹਨ ਕਿ ਸੰਦੀਪ ਗੋਇਲ ਵਰਗੇ ਅਫਸਰ ਨੂੰ ਹੇਠਲੇ ਪੱਧਰ ਤੇ ਕਮਾਂਡ ਸੰਭਾ ਦੇਣੀ ਚਾਹੀਦੀ ਹੈ ਕਿਉਂਕਿ ਉਹਨਾਂ ਨੂੰ ਬਾਖੂਬੀ ਪਤਾ ਹੈ ਕਿ ਕਿਸ ਤਰ੍ਹਾਂ ਕੰਮ ਕਰਨਾ ਹੈ,ਕਿਸ ਚੀਜ਼ ਦੀ ਜਰੂਰਤ ਪਵੇਗੀ। ਜਿਵੇਂ ਉਹਨਾਂ ਕਰੋਨਾ ਕਾਲ ਸਮੇਂ ਲੋਕਾਂ ਨੂੰ ਕਰੋਨਾ ਤੋਂ ਬਚਣ ਲਈ ਇੱਕ ਡੰਡੇ ਦੀ ਵਰਤੋਂ ਕਰਕੇ ਜਾਣੂ ਕਰਵਾਇਆ ਅਤੇ ਜ਼ਿਲ੍ਹੇ ਦੇ ਹਰ ਪਿੰਡ ,ਹਰ ਜਗ੍ਹਾ ਕੈਂਪ ਲਗਵਾ ਕੇ ਲੋਕਾਂ ਨੂੰ ਜਾਗਰੂਤ ਕੀਤਾ। ਇਥੋਂ ਤੱਕ ਕਿ ਕਰੋਨਾ ਪੀੜਤਾਂ ਲਈ ਵੱਖਰੇ ਸੈਂਟਰ ਵੀ ਸਥਾਪਿਤ ਕੀਤੇ। ਉਸ ਸਮੇਂ ਬਰਨਾਲਾ ਪੁਲਿਸ ਮੁਖੀ ਦਾ ਦਫਤਰ ਸਿਰਫ ਪੁਲਿਸ ਦਫਤਰ ਨਹੀਂ ਸੀ, ਇੱਕ ਵੱਡਾ ਹਸਪਤਾਲ ਅਤੇ ਇੱਕ ਹੈਲਪ ਕੇਂਦਰ ਬਣ ਗਿਆ ਸੀ। ਸਾਬਨ,ਮਾਸਕ,ਸੈਨੀਟਾਈਜ਼ਰ, ਸਨੈਟਰੀ ਪੈਡ,ਆੜੋਮਾਸ ਖੌਰੇ ਅਜੇਹਾ ਕੀ ਕੁਝ ਲਿਖਣਾ ਰਹਿ ਜਾਵੇਗਾ ਜੋ ਸਿਹਤ ਕਿੱਟਾਂ ਵਿੱਚ ਉਸ ਸਮੇਂ ਗੋਇਲ ਵੱਲੋਂ ਲੋਕਾਂ ਦੇ ਸਹਿਯੋਗ ਨਾਲ ਪਾਇਆ ਗਿਆ। ਇੱਕ ਵੱਖਰਾ ਹੋਰ ਪੈਕਟ ਵੀ ਬਣਾਇਆ ਗਿਆ ਸੀ ਜਿਸ ਵਿੱਚ ਘਰ ਵਿੱਚ ਖਾਣਾ ਬਣਾਉਣ ਲਈ ਹਰ ਤਰ੍ਹਾਂ ਦੀ ਆਈਟਮ ਪਾਈ ਗਈ ਸੀ। ਭੁਪਿੰਦਰ ਸਿੰਘ ਨੇ ਗੱਲ ਕਰਦਿਆਂ ਕਿਹਾ ਕਿ ਅਸੀਂ ਕਦੇ ਵੀ ਅਜਿਹਾ ਅਫਸਰ ਨਾ ਪਹਿਲਾਂ ਦੇਖਿਆ ਸੀ ਨਾ ਹੀ ਸ਼ਾਇਦ ਬਾਅਦ ਵਿੱਚ ਦੇਖਿਆ ਜਾਵੇਗਾ,ਜਿਸਨੇ ਬੜੇ ਹੀ ਸਲੀਕੇ ਅਤੇ ਤਰੀਕੇ ਨਾਲ ਕਰੋਨਾ ਕਾਲ ਸਮੇਂ ਲੋੜਵੰਦਾਂ ਦੀ ਮੱਦਦ ਕੀਤੀ।ਬਰਨਾਲਾ ਜਿਲੇ ਦੇ ਲੋਕ ਖੁਦ ਹੈਰਾਨ ਸਨ ਜੋ ਉਹਨਾਂ ਸੋਚਿਆ ਨਹੀਂ ਸੀ ਉਹ ਵੀ ਹੋ ਰਿਹਾ ਸੀ। ਗੁਰਪ੍ਰੀਤ ਕੌਰ ਸਮਾਜਸੇਵੀ ਨੇ ਕਿਹਾ ਕਿ ਸ੍ਰੀ ਗੋਇਲ ਨੇ ਜਾਣਾ ਨਾਲ ਰਾਸ਼ਣ ਦੀਆਂ ਗੱਡੀਆਂ ਵੀ ਲੈ ਕੇ ਜਾਣੀਆਂ, ਸਮਾਨ ਵੀ ਵੰਡਣਾ ਅਤੇ ਲੋਕਾਂ ਨੂੰ ਕਰੋਨਾ ਤੋਂ ਬਚਣ ਲਈ ਜਾਗਰੂਤ ਵੀ ਕਰਨਾ। ਬਰਨਾਲਾ ਹੀ ਨਹੀਂ ਪੂਰੇ ਪੰਜਾਬ ਦੇ ਲੋਕ ਇਹ ਮਹਿਸੂਸ ਕਰ ਰਹੇ ਹਨ ਕਿ ਅਜਿਹੇ ਅਫਸਰ ਪੰਜਾਬ ਵਿੱਚ ਆਏ ਫਲੱਡ ਦੌਰਾਨ ਹੇਠਲੇ ਪੱਧਰ ਤੇ ਲਗਾਏ ਜਾਣ ਤਾਂ ਪੀੜਤ ਪਰਿਵਾਰਾਂ ਦੇ ਦੁੱਖ ਕੁਝ ਘੱਟ ਸਕਦੇ ਹਨ ਕਿਉਂਕਿ ਸੁਹਿਰਦ ਅਫਸਰ ਨੂੰ ਸਹੀ ਪਤਾ ਹੁੰਦਾ ਹੈ ਕਿ ਆਫਤ ਤੋਂ ਪਹਿਲਾਂ ਅਤੇ ਬਾਅਦ ਵਿੱਚ ਕਿਸ ਚੀਜ਼ ਦੀ ਜਰੂਰਤ ਹੈ। ਜਿਸ ਤਰ੍ਹਾਂ ਸਰਕਾਰ ਇਸ ਸਮੇਂ ਹੜ ਪੀੜਤ ਇਲਾਕਿਆਂ ਦੇ ਜਰੂਰੀ ਵਿਭਾਗਾਂ ਵਿੱਚ ਅਫਸਰਾਂ ਅਤੇ ਮੁਲਾਜ਼ਮਾ ਦੀਆਂ ਤਾਇਨਾਤੀਆਂ ਕਰ ਰਹੀ ਹੈ, ਉਸੇ ਤਰ੍ਹਾਂ ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਕੁਝ ਕਾਬਲ ਅਫਸਰ ਜੋ ਆਫਤ ਸਮੇਂ ਕਾਬਿਲਤਾ ਰੱਖਦੇ ਹਨ ਕਿ ਕਿਸ ਤਰ੍ਹਾਂ ਕੰਮ ਕਰਨਾ ਹੈ, ਉਹਨਾਂ ਨੂੰ ਚੰਡੀਗੜ੍ਹੋਂ ਮੁੱਖ ਦਫਤਰਾਂ ਵਿੱਚੋਂ ਬਦਲ ਕੇ ਹੇਠਲੇ ਪੱਧਰ ਤੇ ਲਗਾਵੇ।