ਪਠਾਨਕੋਟ: ਵੈਸ਼ਨੋ ਦੇਵੀ ਮੰਦਰ ਵਿਚ ਅੱਜ ਸ਼ਾਮ ਨੂੰ ਭਿਆਨਕ ਅੱਗ ਲੱਗ ਗਈ। ਅੱਗ ਦੀਆਂ ਲਪਟਾਂ ਅਤੇ ਧੂੰਆਂ ਦੂਰ ਦੂਰ ਤਕ ਵਿਖਾਈ ਦਿਤਾ। ਰੀਪੋਰਟਾਂ ਮੁਤਾਬਕ ਅੱਗ ਮੰਦਰ ਦੀ ਗੁਫ਼ਾ ਤੋਂ 100 ਮੀਟਰ ਦੀ ਦੂਰੀ ’ਤੇ ਕਾਲਿਕਾ ਭਵਨ ਲਾਗੇ ਕਾਊਂਟਰ ਨੰਬਰ ਦੋ ’ਤੇ ਲੱਗੀ ਹੈ। ਸ੍ਰੀ ਮਾਤਾ ਵੈਸ਼ਨੋ ਦੇਵੀ ਸ਼ਰਾਈਨ ਬੋਰਡ ਦੇ ਸੀਈਓ ਨੇ ਦਸਿਆ ਕਿ ਅੱਗ ’ਤੇ ਕਾਬੂ ਪਾ ਲਿਆ ਗਿਆ ਹੈ। ਅੱਗ ਲੱਗਣ ਦਾ ਕਾਰਨ ਸ਼ਾਰਟ ਸਰਕਟ ਦਸਿਆ ਜਾ ਰਿਹਾ ਹੈ। ਮੰਦਰ ਵਿਚ ਅੱਗ ਲੱਗਣ ਬਾਰੇ ਪਤਾ ਚਲਦਿਆਂ ਹੀ ਫ਼ਾਇਰ ਵਿਭਾਗ ਦੇ ਮੁਲਾਜ਼ਮ ਤੁਰੰਤ ਮੌਕੇ ’ਤੇ ਪਹੁੰਚ ਗਏ। ਉਨ੍ਹਾਂ ਉਥੇ ਮੌਜੂਦ ਲੋਕਾਂ ਦੀ ਮਦਦ ਨਾਲ ਅੱਗ ਬੁਝਾਈ। ਅੱਗ ਨਾਲ ਫ਼ਿਲਹਾਲ ਕਿਸੇ ਦੇ ਝੁਲਸਣ ਦੀ ਖ਼ਬਰ ਨਹੀਂ ਹੈ। ਕਿਹਾ ਜਾ ਰਿਹਾ ਹੈ ਕਿ ਕੈਸ਼ ਕਾਊਂਟਰ ਪੂਰੀ ਤਰ੍ਹਾਂ ਸੁਆਹ ਹੋ ਗਿਆ ਹੈ। ਅੱਗ ਦੀਆਂ ਲਪਟਾਂ ਭੈਰੋਂ ਘਾਟੀ ਤਕ ਵਿਖਾਈ ਦਿਤੀਆਂ। ਕਿਹਾ ਜਾ ਰਿਹਾ ਹੈ ਕਿ ਵੀਆਈਪੀ ਗੇਟ ਲਾਗੇ ਕਾਊਂਟਿੰਗ ਰੂਮ ਵਿਚ ਸ਼ਾਰਟ ਸਰਕਿਟ ਹੋਇਆ ਪਰ ਫ਼ਿਲਹਾਲ ਇਸ ਦੀ ਪੁਸ਼ਟੀ ਨਹੀਂ ਹੋ ਸਕੀ। ਅੱਗ ਸ਼ਾਮ ਲਗਭਗ ਸਵਾ ਚਾਰ ਵਜੇ ਲੱਗੀ ਅਤੇ ਪੰਜ ਵਜੇ ਤਕ ਇਸ ’ਤੇ ਕਾਬੂ ਪਾ ਲਿਆ ਗਿਆ। ਸ਼ੁਰੂਆਤੀ ਅਲਾਰਮ ਉਥੇ ਤੈਨਾਤ ਸੀਆਰਪੀਐਫ਼ ਮੁਲਾਜ਼ਮਾਂ ਨੇ ਵਜਾਇਆ ਸੀ।