ਨਵੀਂ ਦਿੱਲੀ: ਦੋ ਦਿਨ ਪਹਿਲਾਂ ਖ਼ਬਰ ਆਈ ਸੀ ਕਿ ਏਅਰ ਇੰਡੀਆ ਦੇ ਯਾਤਰੀਆਂ ਦਾ ਡਾਟਾ ਹੈਕਰਾਂ ਨੇ ਚੋਰੀ ਕਰ ਲਿਆ ਹੈ ਅਤੇ ਹੁਣ ਖ਼ਬਰ ਆ ਰਹੀ ਹੈ ਕਿ ਪੀਜ਼ਾ ਕੰਪਨੀ ਡੋਮੀਨੋਜ਼ ਕੋਲੋਂ 18 ਕਰੋੜ ਭਾਰਤੀਆਂ ਦਾ ਡਾਟਾ ਪਿਛਲੇ ਮਹੀਨੇ ਚੋਰੀ ਹੋ ਗਿਆ ਸੀ ਜਿਸ ਦਾ ਪਤਾ ਹੁਣ ਲੱਗਾ ਹੈ। ਇਥੇ ਦਸ ਦਈਏ ਕਿ ਪੀਜ਼ਾ ਖਾਣ ਦੇ ਸ਼ੌਂਕੀਆਂ ਦੀ ਹੁਣ ਜਾਣਕਾਰੀ ਜਨਤਕ ਹੋ ਗਈ ਹੈ। ਹੁਣ ਕੋਈ ਵੀ ਗਾਹਕ ਦਾ ਮੋਬਾਈਲ ਨੰਬਰ ਸਰਚ ਕਰਕੇ ਉਸਦੀ ਲੋਕੇਸ਼ਨ, ਆਰਡਰ ਦਾ ਸਥਾਨ, ਮਿਤੀ ਤੇ ਸਮਾਂ ਪਤਾ ਕਰ ਸਕਦਾ ਹੈ। ਇਹ ਪ੍ਰਾਈਵੇਸੀ ਦੀ ਘੋਰ ਉਲੰਘਣਾ ਹੈ। ਰਾਜਹਰੀਆ ਨੇ ਇੱਕ ਸਕਰੀਨ ਸ਼ਾਟ ਪਾਇਆ ਜਿਸ ਵਿੱਚ ਇਹ ਦਰਸਾਇਆ ਗਿਆ ਸੀ ਕਿ ਗਾਹਕਾਂ ਦਾ ਤੈਅ ਸਥਾਨ ਨਕਸ਼ਾ ਇਸ ਚੋਰੀ ਹੋਏ ਡੇਟਾ ਦੀ ਵਰਤੋਂ ਕਰਕੇ ਬਣਾਇਆ ਜਾ ਸਕਦਾ ਹੈ। ਹੈਕਰਾਂ ਨੇ ਡਾਰਕ ਵੈੱਬ ਤੇ ਇਸ ਡਾਟਾ ਲਈ ਸਰਚ ਇੰਜਣ ਬਣਾ ਦਿੱਤਾ ਹੈ। ਜਿੱਥੇ ਗਾਹਕਾਂ ਦੀ ਨਿਜੀ ਜਾਣਕਾਰੀ ਅਸਾਨੀ ਨਾਲ ਹਾਸਲ ਕੀਤੀ ਜਾ ਸਕਦੀ ਹੈ। ਇਸ ਵਿੱਚ ਲੋਕਾਂ ਦੇ ਮੋਬਾਈਲ ਨੰਬਰ, ਈਮੇਲ, ਜੀਪੀਐਸ ਲੋਕੇਸ਼ਨ ਤੱਕ ਸ਼ਾਮਲ ਹੈ। ਜਾਣਕਾਰੀ ਅਨੁਸਾਰ ਜੇ ਤੁਸੀਂ ਕਦੇ ਡੋਮੀਨੋਜ਼ 'ਤੇ ਇੱਕ ਆਨਲਾਈਨ ਆਰਡਰ ਦਿੱਤਾ ਹੈ, ਤਾਂ ਸੰਭਵ ਹੈ ਕਿ ਤੁਹਾਡੀ ਜਾਣਕਾਰੀ ਵੀ ਚੋਰੀ ਹੋ ਗਈ ਹੋਵੇ। ਜਨਤਕ ਕੀਤੀ ਗਈ ਇਹ ਨਿੱਜੀ ਜਾਣਕਾਰੀ ਗਾਹਕਾਂ ਦੀ ਜਾਸੂਸੀ ਕਰਨ ਲਈ ਵਰਤੀ ਜਾ ਰਹੀ ਹੈ। ਅਪ੍ਰੈਲ ਵਿੱਚ, ਹੈਕਰਸ ਨੇ ਡੋਮੀਨੋਜ਼ ਇੰਡੀਆ ਤੋਂ 13 ਟੈਰਾਬਾਈਟ (ਟੀਬੀ) ਡਾਟਾ ਚੋਰੀ ਕਰਨ ਦਾ ਦਾਅਵਾ ਕੀਤਾ ਸੀ। ਉਸਨੇ ਕਿਹਾ ਸੀ, ਉਨ੍ਹਾਂ 250 ਕਰਮਚਾਰੀਆਂ ਤੇ 18 ਕਰੋੜ ਗਾਹਕਾਂ ਦੀ ਨਿੱਜੀ ਜਾਣਕਾਰੀ ਹਾਸਲ ਕੀਤੀ ਹੈ।