ਕੁਲੈਕਟਰ ਨੂੰ ਰੋਅਬ ਮਾਰਨਾ ਪਿਆ ਮਹਿੰਗਾ, ਗਈ ਨੌਕਰੀ

ਛੱਤੀਸਗੜ੍ਹ : ਛੱਤੀਸਗੜ੍ਹ ਦੇ ਇਕ ਕੁਲੈਕਟਰ ਨੂੰ ਆਪਣੇ ਅਹੁੱਦੇ ਦਾ ਰੋਅਬ ਮਾਰਨਾ ਐਨਾ ਮਹਿੰਗਾ ਪਿਆ ਕਿ ਨੌਕਰੀ ਵੀ ਜਾਂਦੀ ਰਹੀ। ਦਰਅਸਲ ਸੂਰਜਪੁਰ ਜ਼ਿਲ੍ਹੇ ਦੇ ਕੁਲੈਕਟਰ ਰਣਵੀਰ ਸ਼ਰਮਾ ਜਿਨ੍ਹਾਂ ਨੇ Lockdown ਦੌਰਾਨ ਦਵਾਈ ਲੈਣ ਨਿਕਲੇ ਇਕ ਨੌਜਵਾਨ ਦੀ ਜੰਮ ਕੇ ਕੁੱਟਮਾਰ ਕਰ ਦਿੱਤੀ ਸੀ। ਇਸ ਘਟਨਾ ਦੀ ਇੱਕ ਵੀਡੀਓ ਵੀ ਵਾਇਰਲ ਹੋਈ ਸੀ ਅਤੇ ਹੁਣ ਛੱਤੀਸਗੜ੍ਹ ਦੇ ਮੁੱਖ ਮੰਤਰੀ ਭੂਪੇਸ਼ ਬਘੇਲ ਨੇ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਉਣ ਦੇ ਨਿਰਦੇਸ਼ ਦਿੱਤੇ। ਉਨ੍ਹਾਂ ਦੀ ਜਗ੍ਹਾ ਆਈ.ਏ.ਐੱਸ. ਗੌਰਵ ਕੁਮਾਰ ਸਿੰਘ ਨੂੰ ਨਵਾਂ ਜ਼ਿਲ੍ਹਾ ਅਧਿਕਾਰੀ ਬਣਾਇਆ ਗਿਆ ਹੈ। ਮੁੱਖ ਮੰਤਰੀ ਭੂਪੇਸ਼ ਬਘੇਲ ਨੇ ਟਵੀਟ ਕੀਤਾ,''ਸੋਸ਼ਲ ਮੀਡੀਆ ਦੇ ਮਾਧਿਅਮ ਨਾਲ ਸੂਰਜਪੁਰ ਕਲੈਕਟਰ ਰਣਬੀਰ ਸ਼ਰਮਾ ਵਲੋਂ ਇਕ ਨੌਜਵਾਨ ਨਾਲ ਗਲਤ ਰਵੱਈਏ ਦਾ ਮਾਮਲਾ ਮੇਰੇ ਨੋਟਿਸ 'ਚ ਆਇਆ ਹੈ। ਇਹ ਬੇਹੱਦ ਦੁਖ਼ਦ ਅਤੇ ਨਿੰਦਾਯੋਗ ਹੈ। ਛੱਤੀਸਗੜ੍ਹ 'ਚ ਇਸ ਤਰ੍ਹਾਂ ਦੀ ਕੋਈ ਘਟਨਾ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਕਲੈਕਟਰ ਰਣਬੀਰ ਸ਼ਰਮਾ ਨੂੰ ਤੁਰੰਤ ਪ੍ਰਭਾਵ ਤੋਂ ਹਟਾਉਣ ਦੇ ਨਿਰਦੇਸ਼ ਦਿੱਤੇ ਹਨ।'' ਜਾਣਕਾਰੀ ਅਨੁਸਾਰ ਕਲੈਕਟਰ ਰਣਬੀਰ ਸ਼ਰਮਾ ਲਾਕਡਾਊਨ ਦਾ ਮੁਆਇਨਾ ਕਰਨ ਨਿਕਲੇ। ਇਸ ਦੌਰਾਨ ਸੜਕਾਂ 'ਤੇ ਲੋਕਾਂ ਦੀ ਆਵਾਜਾਈ ਦੇਖ ਉਹ ਨਾਰਾਜ਼ ਹੋ ਗਏ। ਉਨ੍ਹਾਂ ਦੀ ਨਜ਼ਰ ਉਸ ਨੌਜਵਾਨ 'ਤੇ ਪਈ। ਆਪਣੇ ਨਾਲ ਚੱਲ ਰਹੇ ਸੁਰੱਖਿਆ ਮੁਲਾਜ਼ਮਾਂ ਨੂੰ ਕਹਿ ਕੇ ਉਨ੍ਹਾਂ ਨੇ ਨੌਜਵਾਨ ਨੂੰ ਰੁਕਵਾਇਆ ਅਤੇ ਉਸ ਨੂੰ ਪਹਿਲਾਂ ਇਕ ਥੱਪੜ ਮਾਰ ਦਿੱਤਾ। ਇਸ ਦੌਰਾਨ ਨੌਜਵਾਨ ਦਵਾਈ ਦੀ ਪਰਚੀ ਵੀ ਦਿਖਾਉਂਦਾ ਰਿਹਾ ਪਰ ਕਲੈਕਟਰ ਨੇ ਉਸ ਦੀ ਇਕ ਨਾ ਸੁਣੀ ਅਤੇ ਨੌਜਵਾਨ ਦਾ ਮੋਬਾਇਲ ਖੋਹ ਕੇ ਉਸ ਨੂੰ ਸੜਕ 'ਤੇ ਪਟਕ ਦਿੱਤਾ। ਇਸ ਸਮੇਂ ਕਿਸੇ ਵਿਅਕਤੀ ਨੇ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ਉਤੇ ਪਾ ਦਿਤੀ ਜਿਸ ਕਾਰਨ ਇਹ ਮਾਮਲਾ ਉਜਾਗਰ ਹੋ ਸਕਿਆ ।