ਦਿਨ ਦਿਹਾੜੇ ਘਰ ਦੇ ਬਾਹਰ ਖੜੀ ਕਾਰ ਚੋਰੀ

ਜੀਰਕਪੁਰ : ਮੋਟਰਸਾਈਕਲ ਤੇ ਸਵਾਰ ਹੋ ਕੇ ਆਏ ਦੋ ਅਣਪਛਾਤੇ ਚੋਰ ਅੱਜ ਦਿਨ ਦਿਹਾੜੇ ਕਰੀਬ ਸਾਢੇ 11 ਵਜੇ ਬਲਟਾਣਾ ਖੇਤਰ ਵਿੱਚ ਸਥਿਤ ਸੈਣੀ ਵਿਹਾਰ ਫੇਸ-1 ਕਲੋਨੀ ਵਿਖੇ ਘਰ ਦੇ ਬਾਹਰ ਖੜੀ ਸਵਿਫਟ ਕਾਰ ਚੋਰੀ ਕਰਕੇ ਲੈ ਗਏ। ਹੈਰਾਨੀ ਦੀ ਗੱਲ ਹੈ ਕੀ ਚੋਰ ਘਰ ਦੇ ਡਾਇਨਿੰਗ ਟੇਬਲ ਤੇ ਪਈ ਗੱਡੀ ਦੀ ਆਰਸੀ ਅਤੇ ਚਾਬੀ ਚੁੱਕ ਕੇ ਗੱਡੀ ਚੋਰੀ ਕਰਕੇ ਲੈ ਗਏ ਹਨ। ਚੋਰੀ ਦੀ ਘਟਨਾ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ ਹੈ ਜਿਸ ਦੇ ਆਧਾਰ ਤੇ ਜੀਰਕਪੁਰ ਪੁਲਿਸ ਨੇ ਅਣਪਛਾਤੇ ਚੋਰਾਂ ਦੀ ਭਾਲ ਆਰੰਭ ਕਰ ਦਿੱਤੀ ਹੈ। ਹਾਸਲ ਜਾਣਕਾਰੀ ਅਨੁਸਾਰ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਰਾਜੇਸ਼ ਗੁਪਤਾ ਵਾਸੀ ਮਕਾਨ ਨੰਬਰ 35 ਸੈਣੀ ਵਿਹਾਰ ਫੇਸ-1 ਨੇ ਦੱਸਿਆ ਕਿ ਉਸ ਦੀ ਸਵਿਫਟ ਕਾਰ ਘਰ ਦੇ ਬਾਹਰ ਖੜੀ ਸੀ ਅੱਜ ਜਦੋਂ ਉਹ ਦੁਪਹਿਰ ਵੇਲੇ ਆਪਣੇ ਘਰ ਆਇਆ ਤਾਂ ਉਸਦੀ ਕਾਰ ਆਪਣੀ ਥਾਂ ਤੋਂ ਗਾਇਬ ਸੀ ਉਸ ਨੇ ਦੱਸਿਆ ਕਿ ਸੀਸੀਟੀਵੀ ਫੁਟੇਜ ਵਿੱਚ ਨਜ਼ਰ ਆ ਰਿਹਾ ਹੈ ਕਿ ਦੋ ਚੋਰ ਹਰਿਆਣਾ ਨੰਬਰ ਦੇ ਪਲੈਟੀਨਾ ਮੋਟਰਸਾਈਕਲ ਤੇ ਸਵਾਰ ਹੋ ਕੇ ਆਏ ਜਿਨਾਂ ਨੇ ਪਹਿਲਾਂ ਉਸ ਦੇ ਘਰ ਦਾ ਦਰਵਾਜ਼ਾ ਖੋਲ ਕੇ ਡਾਇਨਿੰਗ ਟੇਬਲ ਤੇ ਪਈ ਕਾਰ ਦੀ ਚਾਬੀ ਅਤੇ ਆਰਸੀ ਚੁੱਕੀ ਅਤੇ ਕਾਰ ਸਟਾਰਟ ਕਰਕੇ ਫਰਾਰ ਹੋ ਗਏ ਘਟਨਾ ਦੇ ਸਮੇਂ ਘਰ ਦੇ ਬਾਕੀ ਮੈਂਬਰ ਘਰ ਦੀ ਪਹਿਲੀ ਮੰਜ਼ਿਲ ਤੇ ਗਏ ਹੋਏ ਸਨ ਜਿਨਾਂ ਨੂੰ ਘਰ ਵਿੱਚ ਚੋਰਾਂ ਦੇ ਵੜਨ ਦਾ ਪਤਾ ਹੀ ਨਹੀਂ ਲੱਗਿਆ। ਰਜੇਸ਼ ਗੁਪਤਾ ਵੱਲੋਂ ਬਲਟਾਣਾ ਪੁਲਿਸ ਨੂੰ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਮੁਹਈਆ ਕਰਵਾ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ ਪੀਰ ਬਾਬਾ ਸੜਕ ਤੇ ਸਥਿਤ ਅਗਰਵਾਲ ਕਰਿਆਨਾ ਸਟੋਰ ਦੇ ਮਾਲਕ ਨੇ ਦੱਸਿਆ ਕਿ ਬੀਤੇ ਦੋ ਦਿਨਾਂ ਤੋਂ ਲਗਾਤਾਰ ਚੋਰ ਉਸ ਦੀ ਦੁਕਾਨ ਦੇ ਤਾਲੇ ਤੋੜ ਰਹੇ ਹਨ ਪਰੰਤੂ ਤਾਲੇ ਤੋੜਨ ਦਾ ਸ਼ੋਰ ਹੋਣ ਤੇ ਉਹ ਕਾਲੇ ਤੋੜ ਕੇ ਬਿਨਾਂ ਚੋਰੀ ਕੀਤੇ ਫਰਾਰ ਹੋ ਰਹੇ ਹਨ। ਦੁਕਾਨਦਾਰ ਵੱਲੋਂ ਵੀ ਮਾਮਲੇ ਦੀ ਸ਼ਿਕਾਇਤ ਪੁਲਿਸ ਨੂੰ ਦਿੱਤੀ ਗਈ ਹੈ ਬਲਟਾਣਾ ਪੁਲਿਸ ਅਨੁਸਾਰ ਉਹਨਾਂ ਵੱਲੋਂ ਸੀਸੀ ਟੀਵੀ ਫੁਟੇਜ ਦੇ ਆਧਾਰ ਤੇ ਚੋਰਾਂ ਦੀ ਭਾਲ ਆਰੰਭ ਕਰ ਦਿੱਤੀ ਗਈ ਹੈ।